2 Chronicles 22

Kirundi (Bibliya Yera 1951, 1967 (Burundi))

← Chapter 21 Jump to: Chapter 23 →

1Maz’ ababa i Yerusalemu bimika Ahaziya umuhererezi wiwe ngw asubire ku ngoma yiwe, kuko ca gitero cari kizananye n’ Abarabo mu rugamba cari cishe bakuru biwe bose. Nuko Ahaziya mwene Yehoramu umwami w’ Abayuda aba ari we yima.

2Ahaziya aho yatangura kwima, yar’ amaze imyaka mirongwine n’ ibiri; araheza amara umwaka umwe i Yerusalemu ari ku ngoma. Nyina yitwa Ataliya, umwuzukuru wa Omuri.

3Na we yagendera mu ngeso z’ab’ inzu ya Ahabu, kuko nyina yamugīra inama zo gukora ivyaha.

4Akora ivyo Uhoraho abona kw ari bibi, nk’ ukw ab’ inzu ya Ahabu nyene bāgenda bakora, kukw ari bo basigaye ar’ abajanama biwe se amaze gutanga, bakamukwegera mu rupfu.

5Nuko yemera inama zabo, atabara Yoramu mwene Ahabu umwami w’Abisirayeli, baja gutera Hazayeli umwami w’i Siriya i Ramoti‐gileyadi; maz’ Abasiriya bakomeretsa Yoramu.

6Nukw aratabaruka, aja i Yezireli kugira ngw arwarirey’ izo nguma bāmukomerekereje i Rama, igihe yarwanya Hazayeli umwami w’i Siriya. Bukeye Ahaziya mwene Yehoramu umwami w’i Buyuda, amanuka i Yezireli kurāba Yoramu mwene Ahabu ukw ameze, kuko yar’ arwaye.

7Kandi Ahaziya kuja kurāba Yoramu vyari bivuye ku Mana, kugira ngw agweyo; kukw ashitseyo yajanye na Yoramu kuja guhūra na Yehu mwene Nimushi, uwo Uhoraho yari yimikishije amavuta, kugira ngw ahenebereze inzu ya Ahabu.

8Maz’ igihe Yehu yarikw arashitsa itēka ryāciriwe inzu ya Ahabu, asanga abaganwa b’i Buyuda bājeho, n’abahungwabo ba Ahaziya bāmugendako, arabica.

9Maz’ arondera Ahaziya, bamufatira aho yari yinyegeje i Samariya, bamushīra Yehu, baramwica; baraheza baramuhamba, kuko bāvuga, bati N’ umwuzukuru wa Yehoshafati yarondeza Uhoraho umutima wiwe wose. Maze mu nzu ya Ahaziya ntihāsigaramwo ūshoboye kuganza.

10Maze Ataliya nyina wa Ahaziya abonye k’umwana wiwe Ahaziya apfuye, arahaguruka ageseza abo mu nda y’ingoma y’i Buyuda bose.

11Ariko Yehoshabeyati umukobga w’umwami afata Yowasi mwene Ahaziya, amukūra mu bana b’umwami bariko baricwa, amushira mu cumba kibīkwamw’ amariri, hamwe n’umurezi wiwe. Uko ni ko Yehoshabeyati, umukobga w’umwami Yehoramu, muka Yehoyada umuherezi, mushiki wa Ahaziya, yamunyegeje Ataliya, kugira ngo ntamwice.

12Maz’ amarana na bo imyaka itandatu, anyegejwe mu ngoro y’ Imana; Ataliya na we aba ari we aganza igihugu.

← Chapter 21 Jump to: Chapter 23 →