2 Chronicles 23

Kirundi (Bibliya Yera 1951, 1967 (Burundi))

← Chapter 22 Jump to: Chapter 24 →

1Mu mwaka ugira indwi, Yehoyada arashikama, asezerana isezerano n’abagabisha bagaba amajana, ni bo aba: Azariya mwene Yerohamu, na Ishimayeli mwene Yehohanani, na Azariya mwene Obedi, na Mayaseya mwene Adaya, na Elishafati mwene Zikuri.

2Bagendūra Ubuyuda, bakoranya Abalewi babakūye mu bisagara vyose vy’i Buyuda, hamwe n’abakuru b’amazu ya ba sekuruza b’Abisirayeli, baza i Yerusalemu.

3Nukw iryo koraniro ryose risezerana isezerano n’umwami, bari mu ngoro y’Imana. Yehoyada arababarira, at’ Eh’ umwana w’umwami azoganza, bibe nk’uk’ Uhoraho yavuze ku ruvyaro rwa Dawidi.

4Kand’ uko mukwiye kubigenza n’uku: aho muzozira kw isabato ku rubu rwanyu, ikigiragatatu canyu c’ abaherezi n’Abalewi kize gishibame ku miryango;

5ikindi kigiragatatu kize gishibame ku ngoro y’umwami; ikindi kigiragatatu kize gishibame ku kirimba citwa Yesodi; abandi bantu bose baze babe mu ntangāro y’ingoro y’ Uhoraho.

6Ariko ntihaze hagire uwinjira mur’ iyo ngoro atar’ abaherezi n’abo mu Balewi baramukiwe gukorerayo; abo bo baze binjire kuko bejejwe; arikw abantu bose baze bitondere ivyo Uhoraho yageze.

7Abalewi baze bakikize umwami impande zose, umuntu wese afise ibirwanishwa mu ntoke; ūzopfa kwinjira mur’ iyo ngoro, aze yicwe; kandi muze mugume ku mwami uko yinjiye n’ukw asohotse.

8Nukw Abalewi n’Abayuda bose babigenza nk’uk’ uwo muherezi Yehoyada yageze kwose; umuntu wese azana abo kuja ku mbu zabo kw isabato, bahitana n’abari bazirangije kur’ iyo sabato nyene, kuk’ uwo muherezi Yehoyada atārekuye abāri barangije imbu zabo.

9Nuk’ uwo muherezi Yehoyada aha abagabisha bagaba amajana amacumu n’inkinzo nto‐nto na nini‐nini vyar’ ivy’ umwami Dawidi, bikabīkwa mu ngoro y’Imana.

10Nukw atondesha abantu bose kur’ iyo ngoro, uhereye ku ruhande rw’i buryo ugashitsa ku rw’i bumoso, bakīkūza igicaniro n’iyo ngoro ah’ umwami ari, impande zose, umuntu wese afise ibirwanishwa mu ntoke.

11Maze basohokana uwo mwana w’umwami, bamwambika igitsibo c’ubgami, bamuha n’Ibishinga intahe, bamugira umwami. Yehoyada n’abahungu biwe bamwimikisha amavuta, baravuga, bat’ Umwami n’ ahangame!

12Maze Ataliya yumvise urwamo rw’abantu biruka batāzīra umwami, aza ah’ abantu bari mu ngoro y’Uhoraho.

13Yitegereje abona umwami ahagararanye n’ inkingi mu muryango, n’abagabisha n’abavuza inzumbete bamuhagaze i ruhande, n’abantu bose bo mu gihugu banezerewe bavuza inzumbete; abaririmvyi na bo bāriko baravuza ibintu bivuga, batera indirimbo z’amatāzīrano. Ataliya araheza yitantamurirakw impuzu ziwe, aravuga, ati N’ umugararizo! N’umugararizo!

14Maz’ umuherezi Yehoyada abarira abagabisha bagaba amajana, bashiriweho kugaba ingabo zose, ati Ni mumusohore, mumucishe hagati y’imirongo y’ingabo, kandi ni hagira ūmukurikira ni yicishwe inkota; kuk’ uwo muherezi yar’ avuze, ngo Ntimumutsinde mu ngoro y’Uhoraho.

15Nuko baramukīnjūrira, ajana inzira ishika kw irembo ry’amafarasi rija mu rugo rw’umwami; bamwiciraho.

16Maze Yehoyada ashinga isezerano hagati yiwe n’abantu bose n’umwami, ngo babe abantu b’ Uhoraho.

17Abantu bose baca bagenda ku ngoro ya Bayali, barayisangangura, bamenagura n’ibicaniro vyayo n’ibishushanyo vyayo, kandi Matani umuherezi wa Bayali bamwicira imbere y’ibicaniro.

18Maze Yehoyada ashirah’ abateramyi bo guteramira ingoro y’Uhoraho, bakarābga n’abaherezi n’Abalewi, abo Dawidi yashinze ko baba mu ngoro y’Uhoraho, ngo bosereze Uhoraho ibimazi, nk’uko vyanditswe mu vyagezwe vya Mose, bavyose banezerewe baririmba, nk’uko Dawidi yabishinze nyene.

19Ashiraho n’abashibamyi bo ku birimba vy’urugo rw’ ingoro y’Uhoraho, kugira ngo ntihaze hagire umuntu ahumanye ku kintu na kimwe abicamwo.

20Ajana ba bagabisha bagaba amajana, n’abaganwa, n’abagaba abantu, n’abantu bose bo mu gihugu; basohokana umwami mu ngoro y’Uhoraho, baramumanukana, bajana inzira ica mu kirimba co haruguru, bamushikana mu ngoro i bgami; baraheza bamushira ku ntebe y’ubgami.

21Maz’ abantu bose bo mu gihugu baranezerwa, haba umutēkāno ku murwa. Uko ni ko bicishije Ataliya inkota.

← Chapter 22 Jump to: Chapter 24 →