Jeremiah 12

Ilonggo (Ang Biblia (1982))

← Chapter 11 Jump to: Chapter 13 →

1Matarung ikaw, O Ginoo, kon magsuay ako sa imo; apang magapakigbais ako sa imo sang akon kahimtangan. Ngaa bala nga nagauswag ang dalanon sang malauton? Ngaa bala nga matawhay sila tanan nga labi gid kamabudhion?

2Gintanum mo sila, kag nagpanggamut sila; nagatubo sila kag nagapamunga; malapit ka sa ila baba kag malayo sa ila tagiposoon.

3Apang ikaw, O Ginoo, nakakilala sa akon; nakakita ka sa akon, kag nagatilaw sang akon tagiposoon ayon sa imo. Guyuda sila kaangay sang carnero nga ilihawon, kag amana sila sa adlaw sang pag-ihaw.

4Tubtub bala san-o magakalisud ang duta, kag malaya ang mga gamhon sang bug-os nga duta? Tungud sang pagkamalaut sang mga nagapuyo sa iya ang kasapatan nagakapapas kag ang kapispisan, bangud nga nagsiling sila, “Indi sia makakita sang aton kaolihian.”

5“Kon nagdalagan ka upud sa mga tawo nga nagatiil, kag ginlapyo ka nila, paano bala ang pagpalumba mo sa mga kabayo? Kag bisan sa duta sang paghidait malig-on ka, apang ano bala ang mahimo mo sa bugal sang Jordan?

6Kay bisan ang imo mga utud kag ang panimalay sang imo amay, bisan sila nagmabudhion sa imo; bisan sila nagsininggit sing mabaskug sa olihi nimo; dili sila pagpatiha, bisan nagapamolong sila sing matahum nga mga polong sa imo.”

7“Ginbayaan ko ang akon panimalay, ginsikway ko ang akon panublion; gintugyan ko ang hinigugma gid sang akon kalag sa kamut sang iya mga kaaway.

8Ang akon panublion nanginsa akon subong sang leon sa talon, nagbungat sia sang iya tingug batok sa akon; busa gindumtan ko sia.

9Ang akon panublion nanginsa akon bala subong sang pispis nga may pintokpintok nga mananagit? Ang mga pispis nga mananagit batok bala sa iya sa palibut? Lakat kamo, tipona ang tanan nga kasapatan sang latagon; dalha sila sa paglamon.

10Madamung mga manugpahalab naglaglag sang akon ulubasan, gintasak nila ang akon bahin, ginhimo nila nga mamingaw nga kamingawan ang akon matahum nga bahin.

11Ginhimo nila ini nga mamingaw; nagakalisud ini sa akon, nga mamingaw. Ang bug-os nga duta ginpamingaw, bangud nga walay tawo nga nagasapak sini sa iya tagiposoon.

12Ang mga manuglaglag nagaabut sa tanan nga hublas nga kataasan sa kamingawan; kay ang espada sang Ginoo nagalamon kutub sa isa ka ukbung sang duta tubtub sa isa ka ukbung sang duta; walay unud nga may paghidait.

13Nagsab-ug sila sing trigo kag nag-ani sing talongon, ginsakit nila ang ila kaugalingon apang walay kapuslanan. Magkalahuya kamo sang inyo mga bunga bangud sang mapintas nga kaakig sang Ginoo.”

14Amo ini ang ginasiling sang Ginoo batok sa tanan nga akon malaut nga isigkatawo nga nagatandug sang panublion nga ginpapanubli ko sa akon katawohan nga Israel: “Yari karon, gabuton ko sila sa ila duta, kag gabuton ko sa ila ang panimalay sang Juda.

15Kag sa tapus nga magabut ko sila, magabalik ako kag magakalooy sa ila, kag ibalik sila ang tagsa ka tawo sa iya panublion kag ang tagsa ka tawo sa iya duta.

16Kag mahanabu, kon magtoon sila sing makugihon sang mga dalanon sang akon katawohan, sa pagsumpa sa akon ngalan, ‘Sa nagakabuhi ang Ginoo,’ subong sang pagtudlo nila sa akon katawohan sa pagsumpa kay Baal, niyan patindugon sila sa tunga sang akon katawohan.

17Apang kon indi sila magpamati, niyan gabuton ko inang pungsud nga nagagabut kag nagalaglag sini, nagasiling ang Ginoo.”

← Chapter 11 Jump to: Chapter 13 →