Jeremiah 39

Ilonggo (Ang Biblia (1982))

← Chapter 38 Jump to: Chapter 40 →

1Sa ikasiam nga tuig ni Sedequias nga hari sang Juda, sa ikapulo nga bulan, nag-abut si Nabucodonosor nga hari sang Babilonia kag ang bug-os niya nga hangaway batok sa Jerusalem kag nagkibon sini;

2sa ikapulo kag isa nga tuig ni Sedequias, sa ikap-at nga bulan, sa ikasiam nga adlaw sang bulan, nahimo ang bulho sa banwa.

3Sang naagaw ang Jerusalem, ang tanan nga principe sang hari sang Babilonia nagsulud, kag naglingkod sa natunga nga gawang: si Nergal-sarezer, si Samgar-nebo, si Sarsequim nga Rab-saris, si Nergal-sarezer nga Rab-mag, pati ang tanan nga iban nga principe sang hari sang Babilonia.

4Sang nakita sila ni Sedequias nga hari sang Juda kag sang tanan nga tawo nga hangaway, niyan nagpalagyo sila, kag naggowa sa banwa sa kagab-ihon paagi sa dalan sang katamnan sang hari paagi sa gawang sa ulut sang duha ka kuta; kag naggowa sia pakadto sa Araba.

5Apang ang hangaway sang mga Caldeanhon naglagas sa ila, kag naabut si Sedequias sa kapatagan sang Jerico; kag sang nadakup nila sia, gindala nila sia kay Nabucodonosor nga hari sang Babilonia, sa Ribla, sa duta sang Hamat; kag ginhukman niya sia.

6Ginpatay sang hari sang Babilonia ang mga anak ni Sedequias sa atubangan sang iya mga mata sa Ribla; kag ginpatay man sang hari sang Babilonia ang tanan nga dungganon sang Juda.

7Labut pa ginlukat niya ang mga mata ni Sedequias, kag gingapus sia sa mga grilyos sa pagdala sa iya sa Babilonia.

8Ginsonog sa kalayo sang mga Caldeanhon ang balay sang hari kag ang kabalayan sang katawohan, kag ginlumpag ang mga kuta sang Jerusalem.

9Niyan si Nabuzaradan, nga pangolo sang bantay, nagdala nga bihag sa Babilonia sang salin sang katawohan nga nabilin sa banwa, sang mga nagpalagyo man nga nagdangup sa iya, kag sang salin sang katawohan nga nabilin.

10Si Nabuzaradan, nga pangolo sang bantay, nagbilin sang imol sang katawohan nga wala sing bisan ano sa duta sang Juda, kag ginhatagan sila sing mga ulubasan kag mga uma sa amo nga tion.

11Karon si Nabucodonosor nga hari sang Babilonia nagtulin kay Nabuzaradan, nga pangolo sang mga bantay, nahanungud kay Jeremias, nga nagasiling,

12“Kuhaa sia, tatapa sia sing maayo kag dili sia pagsakita, kondi himoa sa iya sono sa isiling niya sa imo.”

13Gani si Nabuzaradan nga pangolo sang bantay, si Nabusazban nga Rab-saris, si Nergal-sarezer nga Rab-mag, kag ang tanan nga puno nga mga manugdumala sang hari sang Babilonia

14nagpadala kag nagkuha kay Jeremias pagowa sa luwang sang bantay. Gintugyan nila sia kay Gedalias nga anak ni Ahicam, ang anak ni Safan, agud nga dalhon niya sia pauli. Gani nagpuyo sia sa tunga sang katawohan.

15Karon ang polong sang Ginoo nag-abut kay Jeremias samtang nabilanggo sia sa luwang sang bantay:

16“Lakat, kag ipamolong kay Ebed-melec nga Etiopiahanon, ‘Amo ini ang ginasiling sang Ginoo sang mga kasoldadosan, ang Dios sang Israel: Yari karon, dalhon ko ang akon mga polong sa sini nga banwa nga sa kalaut kag indi nga sa kaayohan, kag matuman sila sa imo atubangan sa sadto nga adlaw.

17Apang luwason ko ikaw sa sadto nga adlaw, nagasiling ang Ginoo, kag indi ikaw itugyan sa kamut sang mga tawo nga ginakahadlukan mo.

18Kay sa pagkamatuud luwason ko ikaw, kag indi ka mapukan sa espada; kondi ang imo kabuhi mangin-inagaw sa imo, bangud nga nagsalig ka sa akon, nagasiling ang Ginoo.’”

← Chapter 38 Jump to: Chapter 40 →