Jeremiah 22

Ilonggo (Ang Biblia (1982))

← Chapter 21 Jump to: Chapter 23 →

1Amo ini ang ginasiling sang Ginoo: “Dulhog ka sa panimalay sang hari sang Juda, kag ipamolong didto ini nga polong,

2kag isiling, ‘Pamatii ang polong sang Ginoo, O Hari sang Juda, nga nagalingkod sa trono ni David, ikaw, kag ang imo mga alagad, kag ang imo katawohan nga nagasulud paagi sini nga mga gawang.

3Amo ini ang ginasiling sang Ginoo: Hikuta ninyo ang katarungan kag pagkamatarung, kag luwasa sia nga ginkawatan gikan sa kamut sang manugpigus. Kag dili maghimo sing malain ukon magpanglugus sa manlulugayaw, sa ilo, kag sa balo nga babayi, kag dili magpaagay sing dugo nga wala sing sala sa sini nga duug.

4Kay kon himoon ninyo ini nga butang sa pagkamatuud, niyan masulud sa mga gawang sini nga balay ang mga hari nga nagalingkod sa trono ni David, nga nagasakay sa mga kangga kag sa mga kabayo, sia, kag ang iya mga alagad, kag ang iya katawohan.

5Apang kon indi kamo magpamati sini nga mga polong, nagasumpa ako sa akon kaugalingon, nagasiling ang Ginoo, nga ini nga balay manginmamingaw.

6Kay amo ini ang ginasiling sang Ginoo nahanungud sa balay sang hari sang Juda: “‘Ikaw amo ang Galaad sa akon, ang olo sang Libano, apang sa pagkamatuud himoon ko ikaw nga kamingawan, kabanwaanan nga wala ginapuy-i.

7Magaaman ako sing mga manuglaglag batok sa imo, ang tagsatagsa may iya nga mga hinganiban; kag pudlon nila ang imo mga cedro nga pinili, kag ipilak sila sa kalayo.

8“‘Kag ang madamu nga pungsud magaagi sa sini nga banwa, kag sila magasiling ang tagsa ka tawo sa iya isigkatawo, “Ngaa bala nga amo ini ang ginhimo sang Ginoo sa sini nga daku nga banwa?”

9Niyan magasabat sila, “Bangud nga ginbayaan nila ang katipan sang Ginoo nga ila Dios, kag nagsimba sa iban nga mga dios kag nag-alagad sa ila.” ’”

10Dili kamo maghibi tungud sa iya nga patay, ukon maghaya sa iya; kondi maghibi sing tama tungud sa nagataliwan, kay indi na sia magbalik ukon makakita sang iya duta nga natawohan.

11Kay amo ini ang ginasiling sang Ginoo nahanungud kay Sallum nga anak ni Josias, hari sang Juda, nga naghari sa tal-us ni Josias nga iya amay, nga naggowa sa sini nga duug: “Indi na gid sia magbalik diri,

12kondi sa duug diin gindala nila sia nga bihag, didto sia mapatay, kag indi na makakita sia sini nga duta.”

13“Kailo sia nga nagapatindug sang iya balay tungud sa pagkadimatarung, kag sang iya mga hulut sa dikatarungan; nga nagagamit sang pag-alagad sang iya isigkatawo sa wala sing sohol, kag wala nagahatag sa iya sang bayad sa iya;

14nga nagasiling, ‘Magapatindug ako nga sa akon sing balay nga masangkad nga may malapad nga mga hulut,’ kag ginahimoan sia sing mga talambuan, nga ginakisamihan ini sing cedro, kag ginapintahan sing bermellon.

15Magahari ka bala bangud nga nagahingamo ka sa paglabaw sa cedro? Wala bala magkaon kag mag-inum ang imo amay kag maghimo sang katarungan kag pagkamatarung? Niyan nanginmaayo sa iya.

16Sia naghukom sang kasaba sang makalolooy kag sang nawad-an; niyan nanginmaayo. Indi bala ini sa pagkilala sa akon? nagasiling ang Ginoo.

17Apang ang imo mga mata kag ang imo tagiposoon indi amo kondi tungud sa imo pagkamahamkonon, sa pagpaagay sing dugo nga wala sing sala, kag sa pagpigus kag sa paglugus sa paghimo sini.”

18Busa amo ini ang ginasiling sang Ginoo nahanungud kay Joaquim nga anak ni Josias, hari sang Juda: “Indi sila magpanalabiton tungud sa iya, nga nagasiling, ‘Abaw utud ko nga lalaki!’ ukon ‘Abaw utud ko nga babayi!’ Indi sila magpanalabiton tungud sa iya, nga nagasiling, ‘Abaw ginoo!’ ukon ‘Abaw ang iya himaya!’

19Ilubung sia subong sang paglubung sang asno, nga sagnoyon kag ipilak sa unhan sang mga gawang sang Jerusalem.”

20“Taklad ka sa Libano, kag magsinggit, kag bayawa ang imo tingug sa Basan; singgit ka kutub sa Abarim, kay ang tanan mo nga hinigugma ginalaglag.

21Nagpamolong ako sa imo sa kauswagan mo, apang nagsiling ka, ‘Indi ako magpamati.’ Amo ini ang imo kinabatasan kutub sa imo pagkapamatan-on, nga wala ka magtuman sang akon tingug.

22Ang hangin magasagud sang tanan mo nga manugpahalab, kag ang imo mga hinigugma bihagon; niyan sa pagkamatuud mahuy-an kag malisang ka tungud sang tanan mo nga pagkamalaut.

23O pumuluyo sang Libano, nga nagapugad sa mga cedro, makaalawa ka sing daku kon mag-abut sa imo ang mga kasakit, ang kasakit subong sang babayi nga ginasakit!”

24“Sa nagakabuhi ako, nagasiling ang Ginoo, bisan si Conias nga lalaki nga anak ni Joaquim nga hari sang Juda, singsing nga inugpat-in sang akon kamut nga too, apang gikan didto gabuton ko ikaw

25kag itugyan ko ikaw sa kamut sang mga nagatinguha sang imo kabuhi, sa kamut sang imo ginakahadlukan, bisan sa kamut ni Nabucodonosor nga hari sang Babilonia kag sa kamut sang mga Caldeanhon.

26Ipilak ko ikaw kag ang imo iloy nga nag-anak sa imo sa iban nga duta, nga wala ninyo matawohi, kag didto magakalamatay kamo.

27Apang sa duta nga ginahandum sang ila kalag nga balikan, didto indi na sila magbalik.”

28Ini bala nga tawo si Conias sinikway nga suludlan nga binoong, suludlan bala sia nga wala gid sing nagakalipay? Ngaa bala ginpilak sia kag ang iya kaliwat sa duta nga wala nila makilala?

29O duta, duta, duta, pamatii ang polong sang Ginoo!

30Amo ini ang ginasiling sang Ginoo: “Isulat ninyo ini nga tawo nga wala sing anak, tawo nga indi mag-uswag sa iya mga adlaw; kay wala gid sing tawo sa iya kaliwat nga magauswag nga nagalingkod sa trono ni David, kag nagagahum sa Juda.”

← Chapter 21 Jump to: Chapter 23 →