Jeremiah 8

Ilonggo (Ang Biblia (1982))

← Chapter 7 Jump to: Chapter 9 →

1“Sa sadto nga tion, nagasiling ang Ginoo, pagowaon nila sa mga lulubngan ang mga tul-an sang mga hari sang Juda, ang mga tul-an sang mga sacerdote, ang mga tul-an sang mga manalagna, kag ang mga tul-an sang mga pumuluyo sang Jerusalem;

2kag laptahon sila nila sa dayag sang adlaw kag sang bulan kag sang bug-os nga kasoldadosan sang langit, nga ginhigugma nila kag nga gin-alagad nila, kag ginsonod nila, kag ginpangita nila kag ginsimba nila; indi sila pagtiponon ukon ilubung; mangin-ipot sila sa ibabaw sang kadaygan sang duta.

3Pasulabihon ang kamatayon sa kabuhi sang tanan nga salin sang nabilin sini nga malaut nga panimalay sa tanan nga duug diin ginsobol ko sila, nagasiling ang Ginoo sang mga kasoldadosan.

4“Labut pa isiling mo sa ila, Amo ini ang ginasiling sang Ginoo: Mapukan bala ang mga tawo, kag indi magtindug liwat? Magatalikod bala ang isa, kag indi magbalik?

5Ngaa bala niyan ini nga katawohan nagtalikod sa dayon nga pagtalikod? Ginhakus nila ang limbong, nagdumili sila sa pagbalik.

6Nagpamati ako kag nakabati, apang wala sila magpamolong sing matarung; wala sing tawo nga nagahinulsul sang iya pagkamalaut, nga nagasiling, ‘Ano bala ang nahimo ko?’ Ang tagsatagsa naglipas sa iya alagyan, subong sang kabayo nga nagadamhag sa inaway.

7Bisan ang tulabong sa mga langit nakahibalo sang iya pinat-ud nga mga tion; kag ang tukmo, ang salimbabatang, kag ang dugwak nagabantay sang tion sang ila pag-abut; apang ang akon katawohan wala makakilala sang kasogoan sang Ginoo.

8“Paano bala nga nagasiling kamo, ‘Maalam kami, kag ang kasogoan sang Ginoo yari sa amon’? Apang, yari karon, ang dimatuud nga pluma sang mga escriba naghimo sing dimatuud.

9Ang maalam nga mga tawo nahuy-an, nahangawa sila kag nadakpan; yari karon, ginsikway nila ang polong sang Ginoo. kag ano bala nga bagay sang kaalam nga yara sa ila?

10Busa ihatag ko sa iban ang ila mga asawa kag ang ila mga latagon sa mga magatag-iya sa ila, kay kutub sa labi gid kakubus tubtub sa labi gid kadaku ang tagsatagsa natugyan sa paghamkon; kutub sa manalagna tubtub sa sacerdote ang tagsatagsa nagadimaminatud-on.

11“Gin-ayo nila sing hapaw ang samad sang babayi nga anak sang akon banwa, nga nagasiling, ‘Paghidait, paghidait,’ nga wala sing paghidait.

12Nahuya bala sila sang naghimo sila sing kangil-aran? Wala, wala gid sila mahuya; ukon makapalamula sila. Busa mapukan sila sa tunga sang mga nagakapukan; sa tion nga silotan ko sila, pukanon sila, nagasiling ang Ginoo.

13Papason ko sila sing bug-os, nagasiling ang Ginoo, manginwala sing uvas sa balagon, ukon higos sa higuera; kag magakalayong ang dahon, kag ang mga butang nga ginhatag ko sa ila magataliwan gikan sa ila.”

14Ngaa bala nagalingkod kita sing matinong? Tilipon kamo, magsulud kita sa mga banwa nga napamakuran kag maghipus kita didto; kay ang Ginoo nga aton Dios nagpahipus sa aton, kag nagpainum sa aton sing tubig nga mapait, bangud nga nakasala kita batok sa Ginoo.

15Naghulat kita sing paghidait, apang wala sing kaayohan nga nag-abut, sing tion sa pag-ayo, apang yari karon, kahangawa!

16“Kutub sa Dan mabatian ang pusnga sang iya mga kabayo; sa tingug sang paghirihiri sang ila mga makusug nagakurug ang bug-os nga duta. Kay nag-abut sila kag naglamon sang duta kag sang yara sa iya, sang banwa kag sang mga nagapuyo sa iya.

17Kay yari karon, ako magapadala sa inyo sing mga man-ug, mga man-ug nga dalitan nga indi matiwtiw, kag kagton kamo nila,” nagasiling ang Ginoo.

18Kabay kuntani nga malipay ko ang akon kaugalingon batok sa kasubo, ang akon tagiposoon nagakapunaw sa sulud nakon.

19Yari karon, ang tingug sang singgit sang babaying anak sang akon katawohan gikan sa duta nga malayo gid: “Wala bala ang Ginoo sa Sion? Wala bala sa iya ang iya Hari?” “Ngaa bala nga ginpaakig nila ako sa ila mga larawan nga tinigban, kag sa mga kadayawan nga dumuloong?”

20“Nagligad na ang ani, natapus na ang tingadlaw, kag kami wala maluwas.”

21Tungud sa samad sang babayi nga anak sang akon katawohan ginasamad ako, nagakalisud ako, ang kahangawa nagdakup sa akon.

22Wala bala sing banyus sa Galaad? Wala bala didto sing manugbolong? Ngaa bala nga ang panglawas sang babaying anak sang akon katawohan wala mapaayo?

← Chapter 7 Jump to: Chapter 9 →