Jeremiah 38

Ilonggo (Ang Biblia (1982))

← Chapter 37 Jump to: Chapter 39 →

1Karon si Sefatias nga anak ni Matan, si Gedalias nga anak ni Pasur, si Jucal nga anak ni Selemias, kag si Pasur nga anak ni Malquias nakabati sang mga polong nga ginpamolong ni Jeremias sa bug-os nga katawohan,

2“Amo ini ang ginasiling sang Ginoo, Ang nagapabilin sa sini nga banwa mapatay sa espada, sa tiggulutum, kag sa kamatay; apang ang nagakadto sa mga Caldeanhon mabuhi; ang iya kabuhi mangin-inagaw sa iya, kag magakabuhi sia.

3Amo ini ang ginasiling sang Ginoo, Sa pagkamatuud itugyan ini nga banwa sa kamut sang hangaway sang hari sang Babilonia kag kuhaon niya ini.”

4Niyan ang mga principe nagsiling sa hari, “Ipapatay ini nga tawo; sa bagay nga ginapaluya niya ang mga kamut sang mga tawo sa inaway nga nabilin sini nga banwa, kag ang mga kamut sang bug-os nga katawohan, sa pagpamolong sa ila sang amo nga mga polong. Kay ini nga tawo wala nagapangita sang kaayohan sini nga katawohan, kondi sang ila kasamaran.”

5Si Hari Sedequias nagsiling, “Yari karon, sia yara sa inyo kamut; kay ang hari indi amo ang makasarang sa paghimo sing bisan ano batok sa inyo.”

6Niyan ginkuha nila si Jeremias kay ginsulud sia sa boho ni Malquias nga anak sang hari, nga yara sa luwang sang bantay, kag gintonton nila si Jeremias sang mga lubid. Kag sa boho wala sing tubig, kondi lunang, kag nagsalup si Jeremias sa lunang.

7Sang nabatian ni Ebed-melec nga Etiopiahanon, nga eunuco, nga yara sa balay sang hari, nga ginsulud nila si Jeremias sa bilanggoan nga madulum—nagalingkod ang hari niyan sa Gawang sang Benjamin—

8si Ebed-melec naggowa sa balay sang hari kag nagpamolong sa hari,

9Ginoo ko nga hari, ini nga mga tawo naghimo sing malaut sa tanan nga ginhimo nila kay Jeremias nga manalagna nga ginsulud nila sa bilanggoan nga madulum; kag madali sia mapatay sa duug diin sia, bangud sang tiggulutum; kay wala sing kalan-on sa banwa.”

10Niyan ginsogo sang hari si Ebed-melec nga Etiopiahanon, “Kuha ka gikan diri sing katloan ka tawo upud sa imo, kag batakon si Jeremias nga manalagna pagowa sa bilanggoan nga madulum sa wala pa sia mapatay.”

11Gani gindala ni Ebed-melec upud sa iya ang mga tawo kag nagkadto sa balay sang hari, sa idalum sang bahandian, kag nagkuha didto sing mga lapat kag mga panapton nga gision, kag gintonton sila sa mga lubid kay Jeremias sa sulud sang bilanggoan nga madulum.

12Niyan si Ebed-melec nga Etiopiahanon nagsiling kay Jeremias, “Ibutang karon ini nga mga lapat kag mga panapton nga gision sa idalum sang imo mga ilok nga hamil sa mga lubid.” Ginhimo ni Jeremias ang subong sini.

13Niyan ginbatak nila si Jeremias sang mga lubid kag ginpagowa sia sa bilanggoan nga madulum. Kag nagpabilin si Jeremias sa luwang sang bantay.

14Ginpakadtoan ni Hari Sedequias kag ginpakuha si Jeremias nga manalagna pakadto sa iya sa ikatlo nga salamputan nga yara sa balay sang Ginoo. Nagsiling ang hari kay Jeremias, “Nagapamangkot ako sa imo sing isa ka butang; dili iglikum sa akon ang bisan ano nga butang.”

15Si Jeremias nagsiling kay Sedequias, “Kon ipahayag ko ini sa imo, indi mo bala ako pagpatyon sing totoo? Kag kon maglaygay ako sa imo, indi ka magpamati sa akon.”

16Gani si Hari Sedequias nagsumpa sing tago kay Jeremias, “Sa nagakabuhi ang Ginoo, nga naghimo sa aton sini nga kalag, indi ko ikaw pagpatyon ukon ihatag ko ikaw sa kamut sini nga mga tawo nga nagatinguha sang imo kabuhi.”

17Niyan nagsiling si Jeremias kay Sedequias, “Amo ini ang ginasiling sang Ginoo, ang Dios sang mga kasoldadosan, ang Dios sang Israel, Kon magkadto ka sa mga principe sang hari sang Babilonia, niyan ang imo kalag magakabuhi, kag ini nga banwa indi pagsonogon sa kalayo, kag magakabuhi ka kag ang imo panimalay.

18Apang kon indi ka magkadto sa mga principe sang hari sang Babilonia, niyan ini nga banwa ihatag sa kamut sang mga Caldeanhon, kag sonogon nila ini sa kalayo, kag indi ka makapalagyo sa ila kamut.”

19Si Hari Sedequias nagsiling kay Jeremias, “Nahadluk ako sa mga Judio nga nagdangup sa mga Caldeanhon, basi nga itugyan nila ako sa ila kamut kag uligyaton nila ako.”

20Nagsiling si Jeremias, “Indi ka nila pag-itugyan. Tumana karon ang tingug sang Ginoo nga ginapamolong ko sa imo, kag manginmaayo ini sa imo, kag magakabuhi ang imo kalag.

21Apang kon magdumili ka sa pagkadto, amo ini ang polong nga ginpakita sa akon sang Ginoo:

22Yari karon, ang tanan nga babayi nga nabilin sa balay sang hari sang Juda dalhon sa principe sang hari sang Babilonia kag yadto nga mga babayi magasiling, ‘Ginsugyot ka sang imo mga abyan nga mahirup karon naglandas sa imo; karon nga ang imo mga tiil nagasalup sa lunang, nagatalikod sila sa imo.’

23Dalhon nila sa mga Caldeanhon ang tanan mo nga asawa kag ang imo mga anak, kag indi ka makapalagyo sa ila kamut, kondi dakpon ka sang kamut sang hari sa Babilonia; kag ipasonog mo ini nga banwa sa kalayo.”

24Niyan nagsiling si Sedequias kay Jeremias, “Dili pagpahibaloa ang bisan sin-o nga tawo sini nga mga polong, kag dili ka mapatay.

25Kon ang mga principe makabati nga ako nagpakighambal sa imo kag magkadto sila sa imo kag magsiling sa imo, ‘Ipahayag karon sa amon ang ginsiling mo sa hari kag ang ginsiling sang hari sa imo; indi ini pag-ilikum sa amon kag indi ka namon pagpatyon,’

26niyan isiling mo sa ila, ‘Ginapabutyag ko ang akon pangabay sa atubangan sang hari nga indi niya ako pagpabalikon sa balay ni Jonatan sa pagkamatay didto.’”

27Niyan nagkadto ang tanan nga principe kay Jeremias kag nagpamangkot sa iya, kag nagsugid sia sa ila sono sa sini tanan nga polong nga nasogo sang hari. Gani nag-untat sila sa paghambal sa iya, kay ang butang wala mahibal-i.

28Gani si Jeremias nagpabilin sa luwang sang bantay tubtub sa adlaw nga naagaw ang Jerusalem.

← Chapter 37 Jump to: Chapter 39 →