Jeremiah 27

Ilonggo (Ang Biblia (1982))

← Chapter 26 Jump to: Chapter 28 →

1Sa pagsugud sang paghari ni Sedequias nga anak ni Josias, hari sang Juda, nag-abut ining polong kay Jeremias gikan sa Ginoo.

2Amo ini ang ginasiling sang Ginoo sa akon: “Buhat ka sing mga tabang kag mga gota, kag ibutang sila sa imo liog.

3Ipadala sila sa hari sang Edom, sa hari sang Moab, sa hari sang mga anak ni Amon, sa hari sang Tiro, kag sa hari sang Sidon paagi sa kamut sang mga manugbalita nga nag-abut sa Jerusalem kay Sedequias nga hari sang Juda.

4Tulinan sila sa ila mga agalon: ‘Amo ini ang ginasiling sang Ginoo sang mga kasoldadosan, ang Dios sang Israel: Amo ini ang isiling ninyo sa inyo mga agalon:

5“Ginhimo ko ang duta, ang mga tawo kag ang mga sapat nga yara sa kadaygan sang duta, paagi sa akon dakung gahum kag sa akon inuntay nga butkon, kag ginahatag ko ini sa ginakabig ko nga matarung sa akon.

6Karon ginhatag ko ini tanan nga duta sa kamut ni Nabucodonosor nga hari sang Babilonia, nga akon alagad, kag ang kasapatan sang latagon man ginhatag ko sa iya sa pag-alagad sa iya.

7Ang tanan nga pungsud magaalagad sa iya kag sa iya anak kag sa anak sang iya anak, tubtub nga mag-abut ang tion sang iya kaugalingon nga duta; niyan madamu nga pungsud kag dalagku nga mga hari ang magahimo sa iya nga ulipon nila.

8“‘“Apang kon ang bisan anong pungsud ukon ginharian ang indi mag-alagad sa among Nabucodonosor nga hari sang Babilonia, kag indi magbutang sang ila liog sa idalum sang gota sang hari sang Babilonia, inang pungsud silotan ko, nagasiling ang Ginoo, sa espada, sa tiggulutum, kag sa kamatay, tubtub nga mapapas ko sila paagi sa iya kamut.

9Gani dili kamo magpamati sa inyo mga manalagna, sa inyo mga manuglagpat, sa inyo mga damgo, sa inyo mga manugpakot, ukon sa inyo mga manugdiwata, nga nagapamolong sa inyo, ‘Dili kamo mag-alagad sa hari sang Babilonia.’

10Kay sila nagatagna sa inyo sing butig, sa pagpapalayo sa inyo sa inyo duta, kag agud nga sobolon ko kamo, kag mawala kamo.

11Apang ang pungsud nga magpasakup sang ila liog sa gota sang hari sang Babilonia kag mag-alagad sa iya, inang pungsud ibilin ko sa ila kaugalingon nga duta, nagasiling ang Ginoo, kag pangumahon nila ini kag magapuyo sa sini.” ’”

12Nagpamolong ako kay Sedequias nga hari sang Juda sono sa sini tanan nga polong: “Ipasakup ang inyo mga liog sa gota sang hari sang Babilonia, kag alagda sia kag ang iya katawohan, kag magkabuhi.

13Ngaa bala nga magakalamatay ikaw kag ang imo katawohan paagi sa espada, sa tiggulutum, kag sa kamatay, sono sa ginpamolong sang Ginoo nahanungud sa katawohan nga indi mag-alagad sa hari sang Babilonia?

14Dili kamo magpamati sa mga polong sang mga manalagna nga nagapamolong sa inyo, ‘Dili kamo mag-alagad sa hari sang Babilonia,’ kay nagatagna sila sa inyo sing butig.

15Kay ako wala magpadala sa ila, nagasiling ang Ginoo, kondi sila nagatagna sing dimatuud sa akon ngalan, agud nga masobol ko kamo kag mawala kamo, kamo kag ang mga manalagna nga nagatagna sa inyo.”

16Nagpamolong man ako sa mga sacerdote kag sa sining bug-os nga katawohan, nga nagasiling, “Amo ini ang ginasiling sang Ginoo: Dili kamo magpamati sa mga polong sang inyo mga manalagna nga nagatagna sa inyo nga nagasiling, ‘Yari karon, ang mga gamit sang balay sang Ginoo ibalik na sing madali gikan sa Babilonia,’ kay nagatagna sila sa inyo sing butig.

17Dili kamo magpamati sa ila; alagda ang hari sang Babilonia kag magkabuhi. Ngaa bala nga manginmamingaw ining banwa?

18Apang kon sila mga manalagna, kag kon yara sa ila ang polong sang Ginoo, magpakilooy sila karon sa Ginoo sang mga kasoldadosan, nga ang mga gamit nga nabilin sa balay sang Ginoo sa balay sang hari sang Juda, kag sa Jerusalem indi pagdalhon sa Babilonia.

19Kay amo ini ang ginasiling sang Ginoo sang mga kasoldadosan nahanungud sang mga haligi, sang dagat, sang mga tulungtungan, kag sang salin sang mga gamit nga nabilin sa sining banwa,

20nga wala pagkuhaa ni Nabucodonosor nga hari sang Babilonia, sang pagbihag niya kay Jeconias nga anak ni Joaquim, hari sang Juda, gikan sa Jerusalem pa Babilonia, kag ang tanan nga dungganon sang Juda kag Jerusalem—

21amo ini ang ginasiling sang Ginoo sang mga kasoldadosan, ang Dios sang Israel, nahanungud sang mga gamit nga nabilin sa balay sang Ginoo, sa balay sang hari sang Juda, kag sa Jerusalem:

22Dalhon sila sa Babilonia kag magpabilin sila didto tubtub sa adlaw nga ako magaduaw sa ila, nagasiling ang Ginoo. Niyan pataklaron ko sila kag iuli sila sa sining duug.”

← Chapter 26 Jump to: Chapter 28 →