Jeremiah 40

Ilonggo (Ang Biblia (1982))

← Chapter 39 Jump to: Chapter 41 →

1Ang polong nga nag-abut kay Jeremias gikan sa Ginoo sa tapus nga si Nabuzaradan nga pangolo sang bantay nagbuhi sa iya gikan sa Rama, sang ginkuha niya sia nga sa mga talikala sa tunga sang tanan nga bihag sang Jerusalem kag Juda nga gindala nga bihag sa Babilonia.

2Kag ang pangolo sang bantay nagkuha kay Jeremias kag nagsiling sa iya, “Ang Ginoo nga imo Dios nagmitlang sini nga malaut sa sini nga duug;

3ang Ginoo nagdala sini, kag naghimo sono sa iya ginpamolong. Bangud nga nagpakasala kamo batok sa Ginoo, kag wala magtuman sa iya tingug, busa ini nga butang nagaabut sa inyo.

4Karon, yari karon, ginahubaran ko ikaw sa sini nga adlaw sang mga talikala nga yara sa imo kamut. Kon maayo sa imo nga mag-upud ka sa akon sa Babilonia, kari, kag tatapon ko ikaw sing maayo; apang kon malain sa imo nga mag-upud sa akon sa Babilonia, magpaumud. Tan-awa, ang bug-os nga duta yara sa imo atubangan; kadtoi kon diin ang maayo kag matarung nga kadtoan mo.

5Kon magpabilin ka, niyan balik kay Gedalias nga anak ni Ahicam, ang anak ni Safan, nga ginhimo nga pangolo-puud sang hari sang Babilonia sa kabanwaanan sang Juda, kag puyo upud sa iya sa tunga sang katawohan; ukon kadto ka sa bisan diin nga ginapakamaayo mo nga kadtoan.” Gani ang pangolo sang bantay naghatag sa iya sing mga balon kag dolot, kag ginpalakat sia.

6Niyan si Jeremias nagkadto kay Gedalias nga anak ni Ahicam, sa Mizpa, kag nagpuyo upud sa iya sa tunga sang katawohan nga nabilin sa duta.

7Sang nabatian sang tanan nga pangolo sang mga kusug nga yara sa mga latagon kag sang ila mga tawo nga ginhimo sang hari sang Babilonia si Gedalias nga anak ni Ahicam nga pangolo-puud sa duta, kag gintugyan sa iya ang mga lalaki, ang mga babayi, kag ang kabataan, sang mga imol gid sang duta, gikan sa ila nga wala madala nga bihag sa Babilonia,

8nag-abut sila kay Gedalias si Mizpa—sa Ismael nga anak ni Netanias, si Johanan kag si Jonatan nga mga anak ni Carea, si Seraya nga anak ni Tanhumet, ang mga anak ni Efai nga Netofanhon, si jezanias nga anak sang Maacanhon, sila kag ang ila mga tawo.

9Si Gedalias nga anak ni Ahicam nga anak ni Safan nagsumpa sa ila kag sa ila mga tawo, nga nagasiling, “Dili magkahadluk sa pag-alagad sa mga Caldeanhon. Magpuyo sa duta, kag mag-alagad sa hari sang Babilonia, kag manginmaayo sa inyo.

10Nahanungud sa akon, yari karon, magapuyo ako sa Mizpa, sa pagtindug sa atubangan sang mga Caldeanhon nga magaabut sa aton; apang kamo, tipon kamo sing alak kag mga bunga sang tingadlaw kag lana, kag isulud sila sa inyo mga suludlan, kag magpuyo sa inyo kabanwaanan nga nakuha ninyo.”

11Sa amo man nga bagay, sang nakabati ang tanan nga Judio nga yara sa Moab kag sa tunga sang mga anak ni Amon kag sa Edom kag ang yara sa iban nga duta, nga ang hari sang Babilonia nagbilin sing salin sa Juda kag nga ginpagahum niya sa ila si Gedalias nga anak ni Ahicam, ang anak ni Safan,

12niyan ang tanan nga Judio nagbalik gikan sa tanan nga duug diin ginsobol sila kag nag-abut sa duta sang Juda, kay Gedalias sa Mizpa; kag nagtipon sila sing madamu gid nga alak kag mga bunga sa tingadlaw.

13Labut pa si Johanan nga anak ni Carea kag ang tanan nga pangolo sang mga kusug nga yara sa mga latagon nag-abut kay Gedalias sa Mizpa

14kag nagsiling sa iya, “Wala ka bala makahibalo nga si Baalis nga hari sang mga anak ni Amon nagpadala kay Ismael nga anak ni Netanias sa pagkuha sang imo kabuhi?” Apang si Gedalias nga anak ni Ahicam wala magpati sa ila.

15Niyan ni Johanan nga anak ni Carea nagpamolong sing tago kay Gedalias sa Mizpa, “Palakta ako, kag patyon ko si Ismael nga anak ni Netanias, kag walay tawo nga makahibalo sini. Ngaa bala nga kuhaon niya ang imo kabuhi, agud nga ang tanan nga Judio nga nagatipon sa imo mag-alaplaag, kag ang salin sang Juda mawala?”

16Apang si Gedalias nga anak ni Ahicam nagsiling kay Johanan nga anak ni Carea, “Dili ka maghimo sining butang, kay nagapamolong ka sing dimatuud nahanungud kay Ismael.”

← Chapter 39 Jump to: Chapter 41 →