Jeremiah 43

Ilonggo (Ang Biblia (1982))

← Chapter 42 Jump to: Chapter 44 →

1Sang nakatapus si Jeremias sa pagpamolong sa bug-os nga katawohan sang tanan nga polong sang Ginoo nga Dios nila, nga ginpadala sang Ginoo nga Dios nila sa iya sa ila, bisan ini tanan nga polong,

2nagpamolong si Azarias nga anak ni Osaya kag si Johanan nga anak ni Carea kag ang tanan nga tawo nga bugalon, nga nagsiling kay Jeremias, “Nagapamolong ka sing dimatuud. Ang Ginoo nga aton Dios wala magpadala sa imo sa pagsiling, ‘Dili kamo magsulud sa Egipto sa pagpanlugayaw didto’;

3kondi si Baruc nga anak ni Nerias nagasugyot sa imo batok sa amon, sa pagtugyan sa amon sa kamut sang mga Caldeanhon, agud nga mapatay kami nila kag madala kami nga bihag sa Babilonia.”

4Gani si Johanan nga anak ni Carea kag ang tanan nga pangolo sang mga kusug kag ang bug-os nga katawohan wala magtuman sang tingug sang Ginoo, sa pagpuyo sa duta sang Juda.

5Apang si Johanan nga anak ni Carea kag ang tanan nga pangolo sang mga kusug nagkuha sang tanan nga nabilin sang Juda nga nagbalik gikan sa tanan nga pungsud diin ginsobol sila sa pagpanlugayaw sa duta sang Juda—

6ang mga lalaki, ang mga babayi, ang kabataan, ang babayi nga mga anak sang hari, kag ang tagsa ka tawo nga ginbilin ni Nabuzaradan nga pangolo sang mga bantay upud kay Gedalias nga anak ni Ahicam, ang anak ni Safan; si Jeremias man nga manalagna kag si Baruc nga anak ni Nerias.

7Kag nag-abut sila sa duta sang Egipto, kay wala sila magtuman sa tingug sang Ginoo. Kag nag-abut sila sa Tafnes.

8Niyan nag-abut ang polong sang Ginoo kay Jeremias sa Tafnes:

9“Kuha ka sing dalagku nga mga bato sa imo kamut, kag ilubung sila sa galagala sa natisaan nga yara sa salamputan sang balay ni Faraon sa Tafnes, sa itololok sang mga tawo sang Juda,

10kag isiling sa ila, ‘Amo ini ang ginasiling sang Ginoo sang mga kasoldadosan, ang Dios sang Israel: Yari karon, magapadala ako kag magakuha kay Nabucodonosor nga hari sang Babilonia, nga akon alagad, kag magapahamtang sang iya trono sa ibabaw sini nga mga bato nga ginlubung ko, kag magahumlad sia sang iya layanglayang nga harianon sa ibabaw nila.

11Magakari sia kag magasakit sang duta sang Egipto, nga ang mga sa kamatayon ihatag sa kamatayon, ang mga sa kabihagan sa kabihagan, kag ang mga sa espada sa espada.

12Magapadabdab ako sing kalayo sa mga balay sang mga dios sang Egipto; kag sonogon niya sila kag dalhon sila nga bihag; magapanaput sia sang duta sang Egipto, subong sang manugpahalab nga nagasuklub sang iya panapton; kag magagowa sia gikan didto sa paghidait.

13Sia man magawagwag sang mga obelisco sang Bet-semes nga yara sa duta sang Egipto; kag ang mga balay sang mga dios sang Egipto sonogon niya sa kalayo.’”

← Chapter 42 Jump to: Chapter 44 →