Jeremiah 18

Ilonggo (Ang Biblia (1982))

← Chapter 17 Jump to: Chapter 19 →

1Ang polong nga nag-abut kay Jeremias gikan sa Ginoo:

2“Tindug, kag dulhog pakadto sa balay sang maninihon, kag didto pabation ko ikaw sang akon mga polong.”

3Niyan nagdulhog ako pakadto sa balay sang maninihon, kag nagahimo sia sing buluhaton sa mga aliling.

4Kag sang nasamad ang suludlan nga ginhimo niya sa lunang sa kamut sang maninihon, ginhimo niya ini liwat nga iban nga suludlan, sono sa minamaayo sa maninihon nga himoon ini.

5Niyan nag-abut sa akon ang polong sang Ginoo:

6“O panimalay sang Israel, indi bala ako makahimo sa inyo subong sining maninihon? nagasiling ang Ginoo. Yari karon, subong nga ang lunang yara sa kamut sang maninihon, amo ini kamo sa akon kamut, O panimalay sang Israel.

7Sa ano nga tion magpamolong ako nahanungud sa pungsud ukon sa ginharian, sa paggabut kag sa paglumpag kag sa paglaglag sini,

8kon inang pungsud nga tungud sa iya nakapamolong ako, magtalikod sa ila kalaut, ako magakalisud sang malaut nga ginhunahuna ko nga himoon sa ila.

9Kag sa anong tion magpamolong ako nahanungud sa pungsud ukon sa ginharian sa pagpatindug kag pagtanum sini,

10kon maghimo sila sang malaut sa akon itololok, nga wala nila ginatuman ang akon tingug, niyan magakalisud ako sang kaayohan nga akon igahatag sa ila.

11Busa karon, ipamolong sa mga tawo sang Juda kag sa mga pumuluyo sang Jerusalem: ‘Amo ini ang ginasiling sang Ginoo, Yari karon, ako nagahuman sing malaut batok sa inyo kag nagapahito ako batok sa inyo sing padugi. Magbalik kamo karon, ang tagsatagsa gikan sa iya malaut nga dalanon, kag kaayoha ang inyo mga dalanon kag ang inyo mga binuhatan.’

12“Apang nagasiling sila, ‘Wala na sing kapuslanan! Magalakat kami sono sa amon kaugalingon nga mga padugi, kag magahimo kami ang tagsatagsa sono sa pagkabatinggilan sang iya malaut nga tagiposoon.’

13“Busa amo ini ang ginasiling sang Ginoo: Pamangkot kamo karon sa mga pungsud, kon sin-o ang nakabati sang subong nga mga butang? Ang mga ulay sang Israel nakahimo sang makasiligning butang.

14Magauntat bala ang nieve sang Libano sa igang sang latagon? Mahubas bala ang mga tubig nga matugnaw nga nagailig gikan sa malayo?

15Kay ang akon katawohan nalipat sa akon, nagsonog sila sing incienso sa dimatuud nga mga dios; ginpasandad sila sa ila mga dalanon, sa mga dalanon nga dumaan, sa paglakat sa mga banas, sa dalan nga wala mapataas,

16sa paghimo sang ila duta nga kabulungan, dayon nga panagutsutan. Ang tagsatagsa nga nagaligad mabulung kag magalungolungo sang iya olo.

17Paaplaagon ko sila subong sang sa salatan sa atubangan sang kaaway. Pakitaan ko sila sang likod, indi sang nawung, sa adlaw sang ila kalalat-an.”

18Niyan nagsiling sila, “Kari, magpahito kita sing mga padugi batok kay Jeremias, kay ang kasogoan indi mawala gikan sa sacerdote ukon ang laygay gikan sa maalam, ukon ang polong gikan sa manalagna. Kari, pilason naton sia sang dila, kag indi kita magsapak sang bisan ano sang iya mga polong.”

19O Ginoo, talupangda ako, kag pamatii ang akon pangabay.

20Ibalus bala ang malaut tungud sa maayo? Apang nagkutkut sila sing boho tungud sa akon kalag. Panumduma kon paano ang pagtindug ko sa imo atubangan sa paghambal sing maayo tungud sa ila, sa pagpahilayo sa ila sang imo kasingkal.

21Busa itugyan ang ila mga anak sa tiggulutum; ihatag sila sa gahum sang espada, pawad-i sing anak ang ila mga asawa kag pabaloha. Ipapatay sa kamatayon ang ila mga lalaki, ang ila mga pamatan-on nga lalaki ipapilas sa espada sa inaway.

22Ipabati ang pagsinggit gikan sa ila mga balay, kon magdala ka sing hinali sing kabon sa ila! Kay nagkutkut sila sing boho sa pagdakup sa akon, kag nagtago sing mga siod nga sa akon mga tiil.

23Apang, Ginoo, ikaw nakahibalo sang bug-os nilang laygay batok sa akon sa pagpatay sa akon. Dili pagpatawara ang ila kalautan, ukon pagpanasa ang ila sala gikan sa imo itololok. Ipasalakay sila sa atubangan mo; himoa sa ila sa tion sang imo kaakig.

← Chapter 17 Jump to: Chapter 19 →