Jeremiah 23

Ilonggo (Ang Biblia (1982))

← Chapter 22 Jump to: Chapter 24 →

1“Kailo sa mga manugpahalab nga nagalaglag kag nagapaaplaag sang mga carnero sang akon halalban!” nagasiling ang Ginoo.

2Busa amo ini ang ginasiling sang Ginoo, Dios sang Israel, batok sa mga manugpahalab nagapahalab sang akon katawohan: “Ginpaaplaag ninyo ang akon panong, kag gintabog sila, kag wala magduaw sa ila. Yari karon, iduaw ko sa inyo ang kalaut sang inyo mga hinimoan, nagasiling ang Ginoo.

3Niyan tiponon ko ang salin sang akon panong gikan sa tanan nga duta diin ginsobol ko sila, kag ibalik ko sila sa ila mga toril, kag magamabungahon sila kag magabuad.

4Magabutang ako sing mga manugpahalab sa ibabaw nila nga magapahalab sa ila, kag indi na sila mahadluk, ukon mahangawa, kag walay bisan ano nga makulang, nagasiling ang Ginoo.

5“Yari karon, nagaabut ang mga adlaw, nagasiling ang Ginoo, nga magabangon ako kay David sing matarung nga Sanga, kag sia magagahum subong nga hari kag magahisayo sing maalamon, kag magahikot sing katarungan kag pagkamatarung sa duta.

6Sa iya mga adlaw ang Juda maluwas, kag ang Israel magapuyo sing malig-on. Kag amo ini ang ngalan nga itawag sa iya: ‘Ang Ginoo aton pagkamatarung.’

7“Busa, yari karon, nagaabut ang mga adlaw, nagasiling ang Ginoo, nga indi na sila magsiling, ‘Sa nagakabuhi ang Ginoo nga nagpataklad sang katawohan sang Israel gikan sa duta sang Egipto,’

8kondi ‘Sa nagakabuhi ang Ginoo nga nagpataklad kag nagtuytuy sang kaliwat sang panimalay sang Israel gikan sa aminhan nga duta kag gikan sa tanan nga duta diin ginsobol ko sila.’ Niyan magapuyo sila sa ila kaugalingon nga duta.”

9Nahanungud sa mga manalagna: Ang akon tagiposoon sa sulud ko naboong, ang tanan kong tul-an nagakurug; kaangay ako sang tawo nga hobog, kaangay sang tawo nga gindaug sang alak, bangud sa Ginoo kag bangud sa iya balaan nga polong.

10Kay ang duta puno sang mga makihilahion; bangud sang pagsumpa ang duta nagakalisud, ang mga halalban sang kamingawan nagmala. Ang dalanon nila malaut, kag ang ila kusug indi matarung.

11Tingub ang manalagna kag ang sacerdote mapasipalahon; bisan sa akon balay nakita ko ang ila pagkamalaut, nagasiling ang Ginoo.

12Busa ang ila dalanon manginsa ila subong sang madanlug nga mga duug sa kadudulman, tabogon sila kag mapukan sa sini; kay magadala ako sing malaut sa ila sa tuig sang pagduaw sa ila, nagasiling ang Ginoo.

13Nakakita ako sing kabuangan sa mga manalagna sang Samaria: nagtagna sila paagi kay Baal kag nagpasayup sang akon katawohan nga Israel.

14Apang sa mga manalagna sang Jerusalem man nakita ko ang makasiligning butang: nagapanglahi sila kag nagalakat sa kabutigan; ginapabakud nila ang mga kamut sang mga nagahimo sing malaut, agud nga wala gid sing magliso gikan sa iya pagkamalaut; tanan sila sa akon nanginsubong sang Sodoma, kag ang iya mga pumuluyo subong sang sa Gomorra.”

15Busa amo ini ang ginasiling sang Ginoo sang mga kasoldadosan nahanungud sang mga manalagna: “Yari karon, pakan-on ko sila sing ajenjo, kag paimnon ko sila sang mga tubig nga mapait; kay gikan sa mga manalagna sang Jerusalem naggowa ang pagkadidiosnon pakadto sa bug-os nga duta.”

16Amo ini ang ginasiling sang Ginoo sang mga kasoldadosan: “Dili kamo magpamati sang mga polong sang mga manalagna nga nagatagna sa inyo, sila nagatudlo sa inyo sang kadayawan; nagapamolong sila sing palanan-awon sang ila kaugalingon nga tagiposoon, kag indi gikan sa baba sang Ginoo.

17Nagasiling sila sing dalayon sa ila nga nagatamay sang polong sang Ginoo, ‘May paghidait kamo; kag sa tagsatagsa nga nagalakat sa pagkabatinggilan sang iya kaugalingon nga tagiposoon, nagasiling sila, ‘Walay malaut nga maabut sa imo.’”

18Kay sin-o bala ang nagtindug sa kasapulan sang Ginoo, agud nga maghantup sia kag magpamati sa iya polong, sin-o bala ang nagtanda sang iya polong kag nakabati sini?

19Yari karon, ang unus sang Ginoo! Ang kasingkal nagagowa, ang unus nga nagaalimpulus; magalupok ini sa olo sang malauton.

20Ang kaakig sang Ginoo indi magbalik tubtub nga mahikot kag mahimo niya ang mga tinutuyo sang iya tagiposoon. Sa olihing mga adlaw mahangpan ninyo ini sing himpit.

21“Wala ko pag-ipadala ang mga manalagna, apang nagdalagan sila; ako wala magpamolong sa ila, apang nagtagna sila.

22Apang kon nagtindug sila kuntani sa akon kasapulan, niyan napabati nila kuntani ang akon katawohan sang akon mga polong, napalipas sila gikan sa ila malaut nga dalanon, gikan sa kalaut sang ila mga hinimoan.

23“Dios bala ako nga malapit, nagasiling ang Ginoo, kag indi Dios nga malayo?

24May makapanago bala sa tago nga mga duug agud nga indi ko makita sia? nagasiling ang Ginoo. Wala ko bala ginapuno ang langit kag ang duta? nagasiling ang Ginoo.

25Ako nakabati sang nasiling sang mga manalagna, nga nagatagna sing kabutigan sa akon ngalan, nga nagasiling, ‘Nagdamgo ako, nagdamgo ako!’

26Tubtub bala san-o nga ini manginsa tagiposoon sang mga manalagna nga nagatagna sing kabutigan kag nagatagna sing limbong sa ila kaugalingon nga tagiposoon,

27nga nagahunahuna sa pagpalimot sa akon katawohan sang akon ngalan paagi sa ila mga damgo nga ginasugid nila sa isa kag isa, subong sang ila mga ginikanan nga nalimot sa akon ngalan tungud kay Baal?

28Ang manalagna nga may damgo, magsugid sing damgo, apang ang may iya sang akon polong magpamolong sia sang akon polong sing matutum. Ano bala ang dagami sa trigo? nagasiling ang Ginoo.

29Indi bala ang akon polong kaangay sang kalayo, nagasiling ang Ginoo, kag kaangay sang palo nga nagapusa sang igang?

30Busa, yari karon, batok ako sa mga manalagna, nagasiling ang Ginoo, nga nagakawat sang akon polong ang isa sa isa.

31Yari karon, batok ako sa mga manalagna, nagasiling ang Ginoo, nga nagagamit sang ila mga dila, kag nagasiling, ‘Ang Ginoo nagsiling.’

32Yari karon, batok ako sa mga nagatagna sing mga damgo nga binutig, nagasiling ang Ginoo, kag ginasugid ini sila kag ginapasayup ang akon katawohan paagi sa ila mga kabutigan kag sa ila walay pulus nga pagpabugal, apang wala ko sila pag-ipadala ukon ginsogo sila; gani wala sila gid sing mahatag nga kapuslanan sa sining katawohan, nagasiling ang Ginoo.

33“Kon ini nga katawohan, ukon ang manalagna, ukon ang sacerdote magpamangkot sa imo, ‘Ano bala ang lulan sang Ginoo?’ niyan magsiling ka sa ila, ‘Kamo amo ang lulan, kag ipilak ko kamo, nagasiling ang Ginoo.’

34Kag nahanungud sang manalagna, sang sacerdote, ukon sang katawohan nga magasiling, ‘Ang lulan sang Ginoo,’ silotan ko gid ina nga tawo kag ang iya panimalay.

35Amo ini ang isiling ninyo, ang tagsatagsa sa iya isigkatawo kag ang tagsatagsa sa iya utud, ‘Ano bala ang ginsabat sang Ginoo?’ ukon ‘Ano bala ang ginpamolong sang Ginoo?’

36Apang ‘ang lulan sang Ginoo, dili na ninyo pag-isambit, kay ang kaugalingon nga polong sang tagsa ka tawo manginlulan niya, kay ginpatiko ninyo ang mga polong sang Dios nga buhi, ang Ginoo sang mga kasoldadosan, nga Dios naton.

37Amo ini ang isiling mo sa manalagna, ‘Ano bala ang ginsabat sa imo sang Ginoo?’ ukon ‘Ano ang ginpamolong sang Ginoo?’

38Apang kon magsiling kamo, ‘Ang lulan sang Ginoo,’ busa amo ini ang ginasiling sang Ginoo, ‘Bangud nga ginasiling ninyo ini nga polong, “Ang lulan sang Ginoo,” sang ako nagpadala sa inyo, nga nagasiling, “Dili kamo magsiling, ‘Ang lulan sang Ginoo,’”

39busa, yari karon, kalimtan ko kamo sing bug-os kag ipilak ko malayo sa akon atubangan, kamo kag ang banwa nga ginhatag ko sa inyo kag sa inyo mga ginikanan.

40Kag magadala ako sa inyo sing dayon nga kahuluy-an kag wala sing katubtuban nga kahuya, nga indi malimtan.’”

← Chapter 22 Jump to: Chapter 24 →