Jeremiah 34

Ilonggo (Ang Biblia (1982))

← Chapter 33 Jump to: Chapter 35 →

1Ang polong nga nag-abut kay Jeremias gikan sa Ginoo, sang si Nabucodonosor nga hari sang Babilonia, kag ang bug-os niya nga hangaway kag ang tanan nga ginharian sang duta nga yara sa idalum sang iya kagamhanan kag ang tanan nga mga katawohan nag-away batok sa Jerusalem kag batok sa tanan niya nga kabanwaanan:

2“Amo ini ang ginasiling sang Ginoo, ang Dios sang Israel: Kadto kag magpamolong kay Sedequias nga hari sang Juda kag sugiri sia, ‘Amo ini ang ginasiling sang Ginoo: Yari karon, ihatag ko ini nga banwa sa kamut sang hari sang Babilonia, kag sonogon niya ini sa kalayo.

3Indi ka makapalagyo sa iya kamut, kondi sa pagkamatuud madakpan kag itugyan ka sa iya kamut; ang imo mga mata magatan-aw sa mga mata sang hari sang Babilonia kag magapakighambal sia sa imo sa baba kag baba; kag magakadto ka sa Babilonia.’

4Apang pamatii ang polong sang Ginoo, O Sedequias nga hari sang Juda! Amo ini ang ginasiling sang Ginoo nahanungud sa imo: ‘Indi ka mapatay sa espada.

5Mapatay ka sa paghidait. Kag subong nga ang mga pahumut ginsonog tungud sa imo mga ginikanan, ang mga hari anay nga una sa imo, sa amo ang mga tawo magasonog sing mga pahumut nga sa imo kag magapanalabiton sa imo, nga nagasiling, “Abaw ginoo!”’ Kay nahambal ko ang polong, nagsiling ang Ginoo.”

6Niyan si Jeremias nga manalagna nagpamolong sini tanan nga polong kay Sedequias nga hari sang Juda, sa Jerusalem,

7sang nagapakig-away ang hangaway sang hari sang Babilonia batok sa Jerusalem kag batok sa tanan nga kabanwaanan sang Juda nga nabilin, batok sa Laquis kag batok sa Azeka; kay ini sila lamang ang nabilin sang mga banwa sang Juda nga napamakuran nga mga banwa.

8Ang polong nga nag-abut kay Jeremias gikan sa Ginoo, sa tapus nga si Hari Sedequias nagpakigkatipan sa bug-os nga katawohan nga yara sa Jerusalem sa pagbantala sing kahilwayan sa ila,

9nga hilwayon sang tagsa ka tawo ang iya ulipon nga lalaki, kag sang tagsa ka tawo ang iya ulipon nga babayi, nga Hebreo nga lalaki ukon Hebreo nga babayi, nga wala bisan sin-o nga mag-ulipon sa ila, sa iya utud nga Judio.

10Kag ang tanan nga principe kag ang bug-os nga katawohan nagtuman, nga nakasimpon sa katipan nga ang tagsatagsa maghilway sang iya ulipon nga lalaki, kag ang tagsatagsa sang iya ulipon nga babayi, agud nga wala na gid sing bisan sin-o nga mag-ulipon sa ila; nagtuman sila kag ginpalakat sila.

11Apang sa olihi nagliwat sila kag ginpabalik nila ang mga alagad kag ang mga ulipon nga babayi nga ginhilway nila, kag ginsakup sila nga mga alagad kag mga ulipon nga babayi.

12Busa ang polong sang Ginoo nag-abut kay Jeremias gikan sa Ginoo:

13“Amo ini ang ginasiling sang Ginoo, ang Dios sang Israel: Nagpakigkatipan ako sa inyo mga ginikanan sang adlaw nga ginpagowa ko sila gikan sa duta sang Egipto, gikan sa balay sang kahiolipnan, nga nagasiling,

14Sa katapusan sang pito ka tuig hilwayon ninyo sang tagsa ka tawo ang iya utud nga Hebreo nga ginbaligya sa imo kag nakaalagad sa imo sing anum ka tuig; hilwayon mo sia gikan sa imo.’ Apang ang inyo mga ginikanan wala magpamati sa akon ukon naglingig sang ila idulungug.

15Kamo karon nagliso kag naghimo sang matarung sa akon mga mata sa pagbantala sing kahilwayan sa tagsa ka tawo sa iya isigkatawo, kag nagpakigkatipan kamo sa akon atubangan sa balay nga ginatawag sa akon ngalan;

16apang nagliwat kamo kag nagpasipala sang akon ngalan nga nagpabalik ang tagsa ka tawo sang iya ulipon nga lalaki kag ang tagsa ka tawo sang iya ulipon nga babayi, nga ginhilway ninyo sa ila kabubut-on, kag ginsakup ninyo sila nga mangin-inyo mga alagad nga lalaki kag mga alagad nga babayi.

17Busa, amo ini ang ginasiling sang Ginoo: Wala kamo magpamati sa akon sa pagbantala sing kahilwayan, ang tagsa ka tawo sa iya utud kag ang tagsa ka tawo sa iya isigkatawo; yari karon, nagabantala ako sa inyo sing kahilwayan, nagasiling ang Ginoo, sa espada, sa kamatay, kag sa tiggulutum. Himoon ko nga itumbotumbo kamo pakadto-pakari sa tunga sang tanan nga ginharian sang duta.

18Kag ang mga tawo nga naglalis sang akon katipan nga wala magtuman sang mga polong sang katipan nga ginhimo nila sa akon atubangan, himoon ko kaangay sang ginpihak nila ang tinday nga baka kag nag-agi sa ulut sa mga pinihak niya—

19ang mga principe sang Juda, ang mga principe sang Jerusalem, ang mga eunuco, ang mga sacerdote, kag ang bug-os nga katawohan sang duta nga nag-agi sa ulut sang mga bahin sang tinday nga baka;

20ihatag ko gid sila sa kamut sang ila mga kaaway kag sa kamut sang mga nagatinguha sang ila kabuhi. Ang ila mga bangkay manginkalan-on sang kapispisan sang mga langit kag sang kasapatan sang duta.

21Kag si Sedequias nga hari sang Juda, kag ang iya mga principe ihatag ko sa kamut sang ila mga kaaway kag sa kamut sang mga nagatinguha sang ila kabuhi, sa kamut sang hangaway sang hari sang Babilonia nga nagtaliwan gikan sa inyo.

22Yari karon, sogoon ko, nagasiling ang Ginoo, kag pabalikon sila sa sini nga banwa; kag awayon nila ini, kag agawon ini, kag sonogon ini sa kalayo. Pamingawon ko ang kabanwaanan sang Juda nga wala sing pumuluyo.”

← Chapter 33 Jump to: Chapter 35 →