Jeremiah 26

Ilonggo (Ang Biblia (1982))

← Chapter 25 Jump to: Chapter 27 →

1Sa pagsugud sang paghari ni Joaquim nga lalaki nga anak ni Josias, hari sang Juda, nag-abut ini nga polong gikan sa Ginoo,

2“Amo ini ang ginasiling sang Ginoo: Tindug ka sa luwang sang balay sang Ginoo, kag ipamolong sa tanan nga kabanwaanan sang Juda nga nagakara sa pagsimba sa balay sang Ginoo ang tanan nga polong nga ginasogo ko sa imo nga ipamolong sa ila; dili pag-ibani sing bisan isa ka polong.

3Ayhan magapamati sila, kag magabiya ang tagsa ka tawo sa iya malaut nga dalanon, agud nga magkalisud ako sang malaut nga ginatuyo ko nga himoon sa ila bangud sang kalaut sang ila mga hinimoan.

4Isiling mo sa ila, ‘Amo ini ang ginasiling sang Ginoo: Kon indi kamo magpamati sa akon, sa paglakat sa akon kasogoan nga ginbutang ko sa atubangan ninyo,

5sa pagpamati sa mga polong sang akon mga alagad nga mga manalagna nga ginapadala ko sa inyo, bisan nga nagabangon sing aga pa kag nagapadala sa ila, apang wala kamo magpamati,

6niyan himoon ko ini nga balay kaangay sang Silo, kag himoon ko ini nga banwa nga pinakamalaut sa tanan nga pungsud sang duta.’”

7Ang mga sacerdote kag ang mga manalagna kag ang bug-os nga katawohan nakabati kay Jeremias nga nagapamolong sini nga mga polong sa balay ang Ginoo.

8Kag sang nakatapus si Jeremias sa pagpamolong sang tanan nga ginsogo sa iya sang Ginoo nga ipamolong sa bug-os nga katawohan, gindakup sia sang mga sacerdote kag sang mga manalagna kag sang bug-os nga katawohan, nga nagasiling, “Mapatay ka sing totoo!

9Ngaa bala nagtagna ka sa ngalan sang Ginoo, nga nagasiling, ‘Ini nga balay manginkaangay sang Silo, kag ini nga banwa manginmamingaw, nga wala sing pumuluyo’?” Kag ang bug-os nga katawohan nagtipon kay Jeremias sa balay sang Ginoo.

10Sang nakabati sini nga mga butang ang mga principe sang Juda, nagsaka sila sa balay sang Ginoo gikan sa balay sang hari kag naglingkod sila sa salamputan sang Bag-o nga Gawang sang balay sang Ginoo.

11Niyan nagpamolong ang mga sacerdote kag ang mga manalagna sa mga principe kag sa bug-os nga katawohan, “Ini nga tawo takus sa kamatayon, kay nagtagna sia batok sini nga banwa, subong sang nabatian ninyo sang inyo mga idulungug.”

12Niyan si Jeremias nagpamolong sa tanan nga principe kag sa bug-os nga katawohan, nga nagasiling, “Ang Ginoo nagpadala sa akon sa pagtagna batok sini nga balay kag batok sini nga banwa sang tanan nga polong nga inyo nabatian.

13Busa karon kaayoha ang inyo mga dalanon kag ang inyo mga hinimoan, kag tumana ang tingug sang Ginoo nga inyo Dios, kag magakalisud ang Ginoo sang malaut nga ginmitlang niya batok sa inyo.

14Apang nahanungud sa akon, yari karon, yari ako sa inyo mga kamut. Himoa sa akon ang maayo kag matarung sa inyo mga mata.

15Lamang kilalaha ninyo sing totoo nga kon patyon ninyo ako, magadala kamo sing dugo nga wala sing sala sa inyo kaugalingon kag sa sini nga banwa kag sa iya mga pumuluyo, kay sa pagkamatuud ginpadala ako sang Ginoo sa inyo sa pagpamolong sini tanan nga polong sa inyo mga idulungug.”

16Niyan ang mga principe kag ang bug-os nga katawohan nagsiling sa mga sacerdote kag sa mga manalagna, “Ini nga tawo indi takus sa kamatayon, kay nagpamolong sia sa aton sa ngalan sang Ginoo nga aton Dios.”

17Niyan may nagtindug gikan sa mga tigulang sang duta kag nagpamolong sa bug-os nga katilingban sang katawohan, nga nagsiling,

18“Si Miqueas nga Morasnon nagtagna sa mga adlaw ni Esequias nga hari sang Juda, kag nagpamolong sia sa bug-os nga katawohan sang Juda: ‘Amo ini ang ginasiling sang Ginoo sang mga kasoldadosan, Ang Sion aradohon subong sang ulumhan; ang Jerusalem mangintinumpok, kag ang bukid sang balay subong sang mataas nga mga duug sang talon.’

19Ginpatay bala sia ni Esequias nga hari sang Juda kag sang bug-os nga Juda? Wala bala sia magkahadluk sa Ginoo kag magpakilooy sang kahamuut sang Ginoo, kag ang Ginoo nagkalisud sang malaut nga ginmitlang niya batok sa ila? Sa amo magahimo kita sing daku nga malaut batok sa aton kaugalingon nga mga kalag.”

20May tawo man nga nagtagna sa ngalan sang Ginoo, si Urias nga lalaking anak ni Semaya sang Kiryat-jearim. Nagtagna sia batok sining banwa kag batok sining duta sono sa tanan nga polong ni Jeremias.

21Kag sang nabatian ang iya mga polong ni Hari Joaquim, pati sang tanan niyang gamhanan nga tawo kag sang tanan nga principe, ang hari nagtinguha sa pagpatay sa iya; apang sang nakabati sini si Urias, nahadluk sia kag nagpalagyo kag nagkadto sa Egipto.

22Niyan si Hari Joaquim nagpadala sing mga tawo sa Egipto, si Elnatan nga lalaking anak ni Acbor kag pila ka tawo upud sa iya,

23kag ginpagowa nila si Urias sa Egipto kag gindala sia kay Hari Joaquim, nga nagpatay sa iya sa espada kag nagpilak sang iya bangkay sa mga lulubngan sang mga timawa.

24Apang ang kamut ni Ahicam nga anak ni Sapan yara upud kay Jeremias agud nga indi sia pag-itugyan nila sa mga kamut sang katawohan sa pagpatay sa iya.

← Chapter 25 Jump to: Chapter 27 →