Jeremiah 37

Ilonggo (Ang Biblia (1982))

← Chapter 36 Jump to: Chapter 38 →

1Si Sedequias nga anak ni Josias naghari, sa tal-us ni Conias nga anak ni Joaquim, nga ginhimo nga hari sa duta sang Juda ni Nabucodonosor nga hari sang Babilonia.

2Apang bisan sia ukon ang iya mga alagad ukon ang katawohan sang duta wala magpamati sang mga polong sang Ginoo nga ginpamolong niya paagi sa manalagna nga si Jeremias.

3Si Hari Sedequias nagpadala kay Jucal nga anak ni Selemias, kag kay Sofonias nga sacerdote, nga anak ni Maasias, pakadto kay Jeremias nga manalagna, nga nagasiling, “Pangamuyo karon tungud sa amon sa Ginoo nga aton Dios.”

4Karon si Jeremias nagsulud kag naggowa sa katawohan, kay wala nila masulud sia sa bilanggoan.

5Ang hangaway ni Faraon naggowa sa Egipto; kag sang nabatian sang mga Caldeanhon nga nagakibon sang Jerusalem ang mga balita nahanungud sa ila, naghalin sila sa Jerusalem.

6Niyan nag-abut ang polong sang Ginoo kay Jeremias nga manalagna:

7“Amo ini ang ginasiling sang Ginoo, ang Dios sang Israel: Amo ini ang isiling ninyo sa hari sang Juda nga nagpadala sa inyo sa akon sa pagpakisayud nahanungud sa akon, ‘Yari karon, ang hangaway ni Faraon nga naggowa sa pagbulig sa inyo nagabalik sa Egipto, sa ila kaugalingon nga duta.

8Kag ang mga Caldeanhon magabalik kag magaaway batok sini nga banwa; agawon nila ini kag sonogon ini sa kalayo.

9Amo ini ang ginasiling sang Ginoo, Dili pagdayai ang inyo kaugalingon, nga nagasiling, “Ang mga Caldeanhon sa pagkamatuud magataliwan sa aton,” kay indi sila magtaliwan.

10Kay bisan samaron ninyo ang bug-os nga hangaway sang mga Caldeanhon nga nagaaway batok sa inyo, kag mabilin lamang sa ila ang mga tawo nga pilason, apang magatindug ang tagsa ka tawo sa iya layanglayang, kag magasonog sini nga banwa sa kalayo.’”

11Karon sang naghalin ang hangaway sang mga Caldeanhon sa Jerusalem bangud sa kahadluk sang hangaway ni Faraon,

12niyan ni Jeremias naggowa sa Jerusalem pakadto sa duta sang Benjamin sa pagbaton sang iya bahin didto sa tunga sang katawohan.

13Sang didto sia sa Gawang sang Benjamin, isa ka pangolo sang bilanggoan yadto didto, nga ginhingalanan si Irias nga anak ni Selemias, ang anak ni Hananias, gindakup niya si Jeremias nga manalagna, nga nagasiling, “Ikaw nagadangup sa mga Caldeanhon.”

14Niyan si Jeremias nagsiling, “Dimatuud ini; wala ako nagadangup sa mga Caldeanhon.” Apang wala sia magpamati sa iya, gani gindakup ni Irias ni Jeremias kag gindala sia sa mga principe.

15Kag ang mga principe nagsingkal kay Jeremias, kag ginsakit sia kag ginsulud sia sa bilanggoan sa balay ni Jonatan nga escriba, kay ginhimo nila yadto nga bilanggoan.

16Sang nagsulud si Jeremias sa bilanggoan nga madulum kag sa mga huluthulut, kag nagpabilin didto si Jeremias sa madamu nga mga adlaw,

17niyan si Hari Sedequias nagpadala kag nagkuha sa iya. Ang hari nagpamangkot sa iya sing tago sa iya balay, kag nagsiling, “May polong bala gikan sa Ginoo?” Kag si Jeremias nagsiling. “May yara,” Nagsiling man sia, “Itugyan ka man sa kamut sang hari sang Babilonia.”

18Labut pa nagsiling si Jeremias kay Hari Sedequias, “Sa ano bala ako nakasala sa imo ukon sa imo mga alagad ukon sa sini nga katawohan, nga ginbutang ninyo ako sa bilanggoan?

19Diin bala karon ang inyo mga manalagna nga nagtaga sa inyo, nga nagasiling, ‘Ang hari sang Babilonia indi magkari batok sa inyo ukon batok sa sini nga duta’?

20Karon pamatii, ginaampo ko sa imo, O ginoo ko nga hari: Batona ang akon pangabay sa atubangan mo, kag indi mo ako pagpabalikon sa balay ni Jonatan nga escriba, basi nga mapatay ako didto.”

21Niyan nagsogo si Hari Sedequias, kag ginbutang nila si Jeremias sa luwang sang bantay; kag ginhatagan nila sia sing isa ka bilog nga tinapay adlawadlaw gikan sa dalan sang mga manugtinapay, tubtub nga ang tanan nga tinapay sang banwa naorot. Sa amo nagpabilin s Jeremias sa luwang sang bantay.

← Chapter 36 Jump to: Chapter 38 →