Jeremiah 9

Ilonggo (Ang Biblia (1982))

← Chapter 8 Jump to: Chapter 10 →

1Kabay kuntani nga ang akon olo mga tubig, kag ang akon mga mata tuburan sang mga luha, agud nga maghibi ako sa adlaw kag gab-i tungud sa mga pinatay gikan sa anak sang akon katawohan!

2Kabay kuntani nga ako sa kamingawan may dalayonan sang mga manlalakat nga mga tawo, agud nga mabayaan ko ang akon katawohan kag magpalayo sa ila! Kay sila tanan makihilahion, katilingban sang mga tawong mabudhion.

3Ginapabawud nila ang ila dila sa kabutigan subong nga ila pana; nagkusug sa duta apang indi sa kamatooran; kay nagapadayon sila gikan sa malaut pa malaut, kag wala nila ako pagkilalaha, nagasiling ang Ginoo.

4Mag-andam kamo ang tagsatagsa sa iya isigkatawo, kag dili kamo magsalig sa bisan kay sin-ong utud; kay ang tagsa ka utud buut gid magtal-us, kag ang tagsa ka isigkatawo nagalibud nga may mga pagpatopato.

5Nagalimbong ang tagsatagsa sa iya isigkatawo, kag wala nagapamolong sang kamatooran; gintudloan nila ang ila dila sa pagpamolong sing kabutigan; ginbudlay nila ang ila kaugalingon sa paghimo sing kalautan.

6Ang imo puluy-an yara sa tunga sang paglimbong, tungud sa limbong, nagadumili sila sa pagkilala sa akon, nagasiling ang Ginoo.

7Busa amo ini ang ginasiling sang Ginoo sang mga kasoldadosan: “Yari karon, tunawon ko sila kag tilawan sila, kay paano pa bala ang paghimo ko, bangud sang babaying anak sang akon katawohan?

8Baslay nga makamamatay ang dila nila; nagapamolong ini sing limbong; ang isa sa iya baba nagapamolong sing madaiton sa iya isigkatawo, apang sa sulud sang iya tagiposoon nagapuut sia sa iya.

9Indi ko bala sila pagsilotan tungud sining mga butang? nagasiling ang Ginoo. indi bala magtimalus ang akon kalag sa subong sining pungsud?

10“Tungud sa mga bukid ako magahibi kag magahaya, kag tungud sa mga halalban sang kamingawan magapanalabiton, bangud nga nasonog sila sa bagay nga walay magaagi, kag walay mga tawo nga makabati sang tingug sang kahayupan; ang kapispisan sang mga langit kag ang kasapatan nagpalagyo kag wala na sila.

11Himoon ko ang Jerusalem nga mga tinumpok, puluy-an sang mga chacal; kag himoon ko nga mamingaw ang kabanwaanan sang Juda, nga walay pumuluyo.”

12Sin-o bala ang tawong maalam nga makahangup sini? Kay sin-o bala nag-pamolong ang baba sang Ginoo, nga ipahayag niya ini? Ngaa bala nalaglag ang duta kag nasonog subong sang kamingawan, sa bagay nga wala gid sing nagaagi?

13Kag ang Ginoo nagasiling: “Bangud nga ginbayaan nila ang akon kasogoan nga ginpahamtang ko sa atubangan nila, kag wala nagtuman sa akon tingug, ukon naglakat sa sini,

14kondi nagsonod sa pagkabatinggilan sang ila tagiposoon kag sa mga Baal, nga gintudlo sa ila sang mga ginikanan nila.

15Busa amo ini ang ginasiling sang Ginoo sang mga kasoldadosan, ang Dios sang Israel: Yari karon, pakan-on ko ining katawohan sing ajenjo, kag paimnon sila sing tubig nga makahililo.

16Paaplaagon ko man sila sa mga pungsud nga bisan sila ukon ang ila mga ginikanan wala makakilala; kag ipadala ko ang espada sa olihi nila, tubtub nga mapapas ko sila.”

17Amo ini ang ginasiling sang Ginoo sang mga kasoldadosan: “Pamalandong kamo, kag ipatawag ang manughaya nga mga babayi agud nga magkari sila; pakadtoi ang sampaton nga mga babayi agud nga magkari sila;

18magdalidali sila kag maghaya tungud sa aton, agud nga ang aton mga mata magpaagay sing mga luha, kag ang aton mga ilalakub magpatubud sing mga tubig.

19Kay ang tingug sang paghaya mabatian gikan sa Sion: ‘Daw ano nga paglaglag sa aton! Ginligban kita sing daku, bangud nga ginabayaan naton ang duta, bangud nga ginpamukan nila ang aton mga puluy-an.’”

20Apang pamatii ang polong sang Ginoo, O mga babayi, kag pabatona ang inyo idulungug sang polong sang iya baba; ton-i ang inyo mga anak nga babayi sing paghaya, kag ang tagsatagsa sang iya isigkatawo sing panalabiton.

21Kay ang kamatayon nagsaka sa aton mga talambuan, nagsulud ini sa aton mga palacio, sa pagpapas sang mga anak gikan sa luwas kag sang mga pamatan-on gikan sa mga dalan.

22Magpamolong, “Amo ini ang ginasiling sang Ginoo: ‘Ang mga bangkay sang mga tawo mapukan subong sang ipot sa wayang, subong sang inupong sa olihi sang mangangani; walay magatipon sa ila.’”

23Amo ini ang ginasiling sang Ginoo: “Dili maghimaya ang maalam sa iya kaalam, ukon maghimaya ang gamhanan nga tawo sa iya gahum, ang manggaranon dili maghimaya sa iya manggad;

24kondi ang nagahimaya maghimaya sa sini, nga sia may paghangup kag nakakilala sa akon, nga ako amo ang Ginoo nga nagahikot sing kalolo, sing katarungan, kag pagkamatarung sa duta; kay sa sining mga butang nagakalipay ako, nagasiling ang Ginoo.”

25“Yari karon, nagaabut ang mga adlaw, nagasiling ang Ginoo, nga silotan ko ang tanan nga circuncidado sa ila pagkadicircuncidado—

26ang Egipto, ang Juda, ang Edom, ang mga anak ni Amon, ang Moab, kag ang tanan nga nagagulub sang ila bohok, nga magapuyo sa kamingawan; kay ang tanan nga pungsud mga dicircuncidado, kag ang bug-os nga panimalay sang Israel dicircuncidado sa tagiposoon.”

← Chapter 8 Jump to: Chapter 10 →