Jeremiah 20

Ilonggo (Ang Biblia (1982))

← Chapter 19 Jump to: Chapter 21 →

1Karon si Pasur nga sacerdote, lalaki nga anak ni Imer, nga puno nga manugdumala sa balay sang Ginoo, nakabati kay Jeremias nga nagapanagna sini nga mga butang.

2Niyan ginbunal ni Pasur si Jeremias nga manalagna, kag ginbutang sia sa mga pandug nga yara sa naibabaw nga Gawang ni Benjamin nga yara sa balay sang Ginoo.

3Sa madason nga adlaw, sang ginkuha ni Pasur si Jeremias sa mga pandug, nagsiling sa iya si Jeremias, “Ang Ginoo wala magtawag sang imo ngalan nga Pasur, kondi Magormissabib.

4Kay amo ini ang ginasiling sang Ginoo: Yari karon, himoon ko ikaw nga kakugmat sa imo kaugalingon kag sa tanan nimo nga abyan. Mapukan sila paagi sa espada sang ila mga kaaway samtang ang imo mga mata makakita sini. Kag itugyan ko ang bug-os nga Juda sa kamut sang hari sang Babilonia; dalhon sila niya nga bihag sa Babilonia, kag patyon sila sa espada.

5Labut pa, itugyan ko ang tanan nga manggad sini nga banwa, ang tanan nga daug sini, ang tanan nga bilidhon nga butang sini, kag ang tanan nga bahandi sang mga hari sang Juda itugyan ko sa kamut sang ila mga kaaway, kag himoon sila nila nga inagaw, kag kuhaon sila, kag dalhon sila sa Babilonia.

6Kag ikaw, Pasur, kag ang tanan nga nagapuyo sa imo balay, magakadto sa kabihagan; magakadto ka sa Babilonia; kag didto mapatay ka, kag ilubung ka didto, ikaw kag ang tanan mo nga abyan, nga sa ila nagtagna ka sing dimatuud.”

7O Ginoo, ikaw nagbuyok sa akon, kag nabuyok ako; ikaw makusug pa sa akon, kag naglandas. Nanginkaladlawan ako sa bug-os nga adlaw; ang tagsatagsa nagauligyat sa akon.

8Kay sa masunsun nga nagapamolong ako, nagasinggit ako, nagasinggit ako, “Paglugus kag kalaglagan!” Bangud nga ang polong sang Ginoo nanginkahuluy-an sa akon kag yuyubitan sa bug-os nga adlaw.

9Kon nagasiling ako, “Indi na gid ako magsambit sa iya, ukon magpamolong pa sa iya ngalan,” niyan yara sa akon tagiposoon ang subong sang kalayo nga nagadabdab nga natakpan sa akon mga tul-an, kag ginalapyo ako sa pagbatas, kag indi ako makapugung.

10Kay nakabati ako sang pagpakalaut sang kadamuan. Ang kakugmat yara sa tagsa ka luyo! “Panghiwalaa sia! Ipanghiwala naton sia!” Ginasiling sang tanan ko nga naandan nga abyan, sila nga nagabantay sang akon pagkapukan. “Ayhan mabuyok sia, niyan magalandas kita batok sa iya. kag magatimalus kita sa iya.”

11Apang ang Ginoo upud sa akon subong nga gamhanan kag makakulugmat; busa ang mga manughingabut sa akon masandad, indi sila maglandas. Pakahuy-an sila sing bug-os, bangud nga wala sila maghisayo sing maalamon. Ang ila dayon nga pagkadidungganon indi gid malipatan.

12O Ginoo sang mga kasoldadosan, nga nagatilaw sang matarung, nga nagatan-aw sang tagiposoon kag sang painoino, patan-awa ako sang imo pagtimalus sa ila, kay sa imo ginpahayag ko ang akon kahimtangan.

13Ambaha ang Ginoo; dayawa ninyo ang Ginoo! Kay ginluwas niya ang kalag sang may kinawad-on gikan sa kamut sang mga nagahimo sing malaut.

14Pinakamalaut ang adlaw nga natawo ako! Indi pagpakamaayoha ang adlaw nga ang akon iloy nag-anak sa akon!

15Pinakamalaut ang tawo nga nagdala sing mga balita sa akon amay, “Anak nga lalaki ang natawo sa imo,” nga naghimo sa iya nga masadya gid.

16Manginsubong yadtong tawo sa kabanwaanan nga gindaug sang Ginoo nga walay kalooy; pabati-a sia sang singgit sa kaagahon kag pagpaandam sa kaodtohon,

17bangud nga wala niya ako pagpatya gikan sa tiyan; sa amo ang akon iloy nangin-akon lulubngan kuntani, kag ang iya tiyan daku sing dalayon.

18Ngaa bala naggowa ako sa tiyan sa pagtan-aw sang kabudlayan kag sang kasubo, nga ang akon mga adlaw maubus sa kahuya?

← Chapter 19 Jump to: Chapter 21 →