Jeremiah 33

Ilonggo (Ang Biblia (1982))

← Chapter 32 Jump to: Chapter 34 →

1Ang polong sang Ginoo nag-abut kay Jeremias sa ikaduha nga tion, samtang nabilanggo pa sia sa luwang sang bantay:

2“Amo ini ang ginasiling sang Ginoo nga naghimo sang kalibutan, ang Ginoo nga nagahuman sini sa pagpalig-on sini—ang Ginoo ang iya ngalan:

3Panawag sa akon kag ako magasabat sa imo, kag magapakita sa imo sing dalagku nga mga butang kag maiwat nga wala mo mahibal-i.

4Kay amo ini ang ginasiling sang Ginoo, ang Dios sang Israel, nahanungud sa mga balay sini nga banwa kag sa mga balay sang mga hari sang Juda nga naguba sa pagpangapin batok sa mga trinsera kag sa espada:

5Ang mga tawo nagakari sa pag-away sa mga Caldeanhon kag sa pagpuno sa ila sang mga bangkay sang mga tawo nga ginpatay ko sa akon kaakig kag sa akon kasingkal, kay bangud sa tanan nila nga pagkama-laut ginlipnan ko ang akon nawung gikan sa sini nga banwa.

6Yari karon, dalhan ko ini sing pagbolong kag pag-ayo, kag ayohon ko sila kag ipahayag ko sa ila ang bugana nga paghidait kag kamatooran.

7Pahaulian ko ang kabihagan sang Juda kag ang kabihagan sang Israel, kag patindugon sila subong sang sa una.

8Tinloan ko sila sa bug-os nila nga kalautan nga ginpakasala nila batok sa akon, kag patawaron ko ang tanan nila nga kalautan nga ginpakasala nila batok sa akon kag ginlalis nila batok sa akon.

9Kag ini nga banwa manginsa akon ngalan sang kalipay, nga sa pagdayaw kag sa himaya sa atubangan sang tanan nga pungsud sang duta nga magapamati sang tanan nga kaayohan nga ginahimo ko sa ila; sila magakahadluk kag magakurug bangud sang bug-os nga kaayohan kag sang bug-os nga paghidait nga ginapatigayon ko sa sini.

10“Amo ini ang ginasiling sang Ginoo: Sa liwat pa mabatian sa sini nga duug nga sa iya nagasiling kamo, ‘Kagulub-an ini nga wala sing tawo kag wala sing sapat,’ sa kabanwaanan sang Juda kag sa mga dalan sang Jerusalem nga mamingaw, nga wala sing tawo kag wala sing pumuluyo kag wala sing sapat,

11ang tingug sang kalipay kag ang tingug sang kasadya, ang tingug sang nobyo kag ang tingug sang nobya, ang tingug sang mga nagaamba, subong nga nagadala sila sing mga halad sang pagpasalamat sa balay sang Ginoo: ‘Magpasalamat sa Ginoo sang mga kasoldadosan, kay ang Ginoo maayo, kay ang iya malig-on nga paghigugma nagapadayon sa gihapon!’ Kay pahaulian ko ang kabihagan sang duta subong sang sa una, nagasiling ang Ginoo.

12“Amo ini ang ginasiling sang Ginoo sang mga kasoldadosan: Sa liwat pa sa sini nga duug nga kagulub-an, nga wala sing tawo kag wala sing sapat, kag sa tanan niya nga kabanwaanan, manginmay puluy-an sang mga manugpahalab nga nagapaluko sang ila mga panong.

13Sa kabanwaanan sang kabakoloran, sa kabanwaanan sang naubus nga duta, kag sa kabanwaanan sang Bagatnan, sa duta sang Benjamin, sa mga duug palibut sa Jerusalem, kag sa kabanwaanan sang Juda, magaagi liwat ang mga panong sa idalum sang mga kamut sang nagaisip sa ila, nagasiling ang Ginoo.

14“Yari karon, nagaabut ang mga adlaw, nagasiling ang Ginoo, nga himoon ko ang polong nga maayo nga ginpamolong ko sa panimalay sang Israel kag sa panimalay sang Juda.

15Sa sadto nga mga adlaw kag sa sadto nga tion patubuon ko kay David ang isa ka Sanga sang pagkamatarung; kag magahikot sia sing katarungan kag pagkamatarung sa duta.

16Sa sadto nga mga adlaw ang Juda maluwas kag ang Jerusalem magapuyo sing malig-on. Kag amo ini ang ngalan nga itawag sa iya: ‘Ang Ginoo amon pagkamatarung.’

17“Kay amo ini ang ginasiling sang Ginoo: Si David indi pagkulangon sing tawo nga magalingkod sa trono sang balay sang Israel,

18kag sa mga sacerdote nga mga Levinhon wala sing makulang nga tawo sa akon atubangan sa pagdolot sing mga halad-nga-sinonog, sa pagsonog sing mga halad-nga-kalan-on, kag sa paghalad sing dalayon.”

19Ang polong sang Ginoo nag-abut kay Jeremias:

20“Amo ini ang ginasiling sang Ginoo: Kon mabungkag ninyo ang akon katipan upud sa adlaw kag ang akon katipan upud sa gab-i, sa bagay nga wala na sing adlaw kag gab-i sa ila panag-on,

21niyan mabungkag man ninyo ang akon katipan kay David nga akon alagad, agud nga wala na sia sing anak nga lalaki nga mgahari sa iya trono, kag sa mga Levinhon nga mga sacerdote nga mga manug-alagad nakon.

22Subong nga ang kasoldadosan sang langit indi maisip ukon masukub ang balas sang dagat, sa amo pabu-aron ko ang mga kaliwatan ni David nga akon alagad, kag ang mga Levinhon nga nagaalagad sa akon.”

23Ang polong sang Ginoo nag-abut kay Jeremias:

24“Wala ka bala nagapatugsiling sang napamolong sini nga katawohan, ‘Ang duha ka panimalay nga ginpili sang Ginoo ginsikway niya sila’? Sa sini ginatamay nila ang akon katawohan agud nga indi na sila manginpungsud sa atubangan nila.

25Amo ini ang ginasiling sang Ginoo: Kon ang akon katipan upud sa adlaw kag gab-i indi magpadayon kag kon wala ko itangdo ang mga pagsolondan sang langit kag sang duta,

26niyan isikway ko man ang mga kaliwatan ni Jacob kag ni David nga akon alagad sa bagay nga indi ako magkuha sa iya mga kaliwatan sing mga manuggahum sa kaliwat ni Abraham, ni Isaac, kag ni Jacob. Kay papahaulian ko ang ila kabihagan, kag magakalooy sa ila.”

← Chapter 32 Jump to: Chapter 34 →