Jeremiah 51 — Ilonggo (Ang Biblia (1982))

1Amo ini ang ginasiling sang Ginoo: “Yari karon, magatugpo ako sing hangin nga manuglaglag batok sa Babilonia, batok sa mga nagapuyo sa Leb-kamai;

2kag magapadala ako sa Babilonia sing mga manugpahangin nga magapahangin sa iya, kag kuhaan nila sing unud ang iya duta, kay sa adlaw sang kalisud manginbatok sila sa iya sa palibut.

3Ang manugpana magabingat sang iya pana batok sa nagapakataas sang iya kaugalingon sa iya limbutong. Dili pagpasayloha ang iya mga pamatan-on nga lalaki; laglaga ninyo sing bug-os ang tanan niyang kasoldadosan.

4Magkalapukan sila nga patay sa duta sang mga Caldeanhon, kag pinalapsan sa iya mga dalan.

5Kay ang Israel kag ang Juda wala pagbayai sang ila Dios, ang Ginoo sang mga kasoldadosan; apang ang ila duta napuno sang paglapas batok sa Balaan sang Israel.

6“Palagyo gikan sa tunga sang Babilonia, magluwas ang tagsa ka tawo sang iya kabuhi! Dimawala kamo sa iya kalautan, kay tion ini sang pagtimalus sang Ginoo, hatagan niya sia sing tumbas.

7Ang Babilonia nangintagayan nga bulawan sa kamut sang Ginoo, nga naghobog sang bug-os nga duta; ang mga pungsud nag-inum sang iya alak, busa ang mga pungsud mga buangbuang.

8Sa hinali ang Babilonia napukan kag nalaglag; haya tungud sa iya! Kuha sing balsamo nga sa iya kasakit; basi ayhan mag-ayo sia.

9Ayohon kuntani namon ang Babilonia, apang wala sia mag-ayo. Bayai sia, kag magkadto kita ang tagsatagsa sa iya kaugalingon nga duta; kay ang paghukom sa iya naglambut sa langit kag ginbayaw bisan tubtub sa mga kahawaan.

10Ang Ginoo nagdala sang aton pagkamatarung; kari, ipahayag naton sa Sion ang binuhatan sang Ginoo nga aton Dios.

11“Pataluma ang mga baslay! Uyati sing malig-on ang mga taming! Ang Ginoo nagtublag sang espiritu sang mga hari sang Mediahanon, bangud nga ang iya katuyoan batok sa Babilonia sa paglaglag sini, kay amo ini ang pagtimalus sang Ginoo, ang pagtimalus sang iya templo.

12Patindug sing hayahay batok sa mga kuta sang Babilonia; bakura ang bantay; ipahamtang ang mga bantay, amana ang mga puut; kay ang Ginoo nagtuyo kag naghimo sang ginpamolong niya nahanungud sa mga pumuluyo sang Babilonia.

13O ikaw nga nagapuyo sa madamung tubig, bugana sa mga bahandi, ang imo katapusan nag-abut na, ang talaksan sang imo pagkamahamkonon.

14Ang Ginoo sang mga kasoldadosan nagsumpa sa iya kaugalingon: Sa pagkamatuud pun-on ko ikaw sing mga tawo, subong sang ulud, kag magasininggit sila batok sa imo.

15“Ginhimo niya ang duta paagi sa iya gahum, ginpalig-on niya ang kalibutan paagi sa iya kaalam, kag paagi sa iya paghangup ginhumlad niya ang kalangitan.

16Kon magmitlang sia sang iya tingug may kagubut sang mga tubig sa mga langit, kag ginpatub-ok niya ang mga alisngaw gikan sa mga ukbung sang duta. Nagahimo sia sang mga kilat nga sa ulan, kag nagapagawa sang hangin gikan sa iya mga bahandian.

17Ang tagsa ka tawo nanginsapatsapaton kag walay ihibalo; ang tagsa ka manugsalsal ginapakahuy-an tungud sa iya larawan; kay ang iya larawan nga tinunaw binutig, kag walay ginhawa sa ila.

18Mga kadayawan sila, binuhatan sang pagtalang; sa tion sang pagsilot sa ila mawala sila.

19Ang bahin ni Jacob inid kaangay sini, kay sia manughuman sang tanan nga butang, kag ang Israel amo ang kabikahan sang iya panublion; ang Ginoo sang mga kasoldadosan amo ang iya ngalan.

20“Ikaw akon parakol sa away kag mga hinganiban sa inaway: sa imo dugmokon ko ang mga pungsud; sa imo laglagon ko ang mga ginharian;

21sa imo dugmokon ko ang kabayo kag ang iya manugsakay;

22sa imo dugmokon ko ang kangga kag ang nagasakay sa iya; sa imo dugmokon ko ang lalaki kag ang babayi; sa imo dugmokon ko ang tigulang kag ang bataon; sa imo dugmokon ko ang pamatan-on nga lalaki kag ang ulay;

23sa imo dugmokon ko ang manugpahalab kag ang iya panong; sa imo dugmokon ko ang mangunguma kag ang iya nagutahan nga mga baka; sa imo dugmokon ko ang mga pangolo-puud kag ang mga tinugyanan.

24“Balusan ko ang Babilonia kag ang tanan nga pumuluyo sang Caldea sang tanan nga kalautan nga ginhimo nila sa Sion sa inyo itololok, nagasiling ang Ginoo.

25“Yari karon ako batok sa imo, O bukid nga manuglaglag, nagasiling ang Ginoo, nga nagalaglag sang bug-os nga duta; untayon ko ang akon kamut sa imo, kag paligiron ikaw gikan sa mga igang, kag himoon ko ikaw nga bukid nga sonog.

26Indi sila magkuha sa imo sing bato nga sa pamag-ang ukon bato nga sa mga sadsaran, kondi manginmamingaw ka sing dayon, nagasiling ang Ginoo.

27“Patindug kamo sing hayahay sa duta, magpatonog sang budyong sa tunga sang mga pungsud; amana ang mga pungsud batok sa iya, tawga sing tingub batok sa iya ang mga ginharian, sang Ararat, sang Mini, kag sang Askenaz; tangdo sing mariscal batok sa iya, pataklara ang mga kabayo subong sang mga magaras nga ulud.

28Amana batok sa iya ang mga pungsud, ang mga hari sang mga Mediahanon, ang iya mga pangolo-puud kag ang tanan niya nga tinugyanan, kag ang bug-os nga duta sang ila ginsakpan.

29Ang duta nagakurug kag yara sa kasakit, kay ang mga katuyoan sang Ginoo batok sa Babilonia nagapadayon, sa paghimo sang duta sang Babilonia nga mamingaw, nga walay pumuluyo.

30Ang gamhanan nga mga tawo sang Babilonia nagdumili sa pag-away, nagapabilin sila sa ila mga pamakud; ang ila gahum napaslawan, nanginsubong sila sang mga babayi; ang iya mga puluy-an gintutdan sing kalayo, ang iya mga pintal nabali.

31Ang isa ka manugdalagan magadalagan sa pagsugata sang isa, kag ang isa ka manugbalita sa pagsugata sang isa, sa pagpakita sa hari sang Babilonia nga ang iya banwa naagaw sa tagsa ka bahin;

32ang mga alagyan naagaw, ang katabon-akan ginsonog sa kalayo, kag ang mga tawo sang inaway nakulbaan.

33Kay amo ini ang ginasiling sang Ginoo sang mga kasoldadosan, ang Dios sang Israel: Ang babaying anak sang Babilonia kaangay sang linasan sa tion nga ginatasak ini; apang sa diotay pa nga tion kag ang tion sang ani magaabut sa iya.”

34“Si Nabucodonosor nga hari sang Babilonia naglamon sa akon, ginligsa niya ako; ginhimo niya ako nga suludlan nga walay sulud, ginlamon niya ako kaangay sang dragon; ginpuno niya ang iya tiyan sang akon manamit nga mga pagkaon, ginpilak niya ako sa gowa.

35Ang paglugus nga nahimo sa akon kag sa akon mga himata manginsa Babilonia,” magasiling ang pumuluyo sang Sion. “Ang akon dugo manginsa mga pumuluyo sa Caldea,” magasiling ang Jerusalem.

36Busa amo ini ang ginasiling sang Ginoo: “Yari karon, apinan ko ang imo kasaba kag magatimalus tungud sa imo. Pahubsan ko ang iya dagat kag pahubsan ko ang iya tuburan;

37kag ang Babilonia mangintinumpok sang kalaglagan, puluy-an sang mga chacal, kabulungan kag panagutsutan, nga walay pumuluyo.

38“Magangurub sila sing tingub kaangay sang bataon nga mga leon; magangurab sila subong sang magamay sang mga leon.

39Kon mag-init sila hiwaton ko ang ila piesta kag hogbon ko sila, agud nga magkalipay sila kag magtolog sing dayon nga pagtolog kag indi magmata, nagasiling ang Ginoo.

40Padulhogon ko sila sa ihawan kaangay sa mga cordero, kaangay sa mga carnero nga lalaki upud sa mga kanding nga lalaki.

41“Daw ano nga nakuha ang Sesac, ang pagdayaw sang bug-os nga duta naagaw! Daw ano nga ang Babilonia nanginmamingaw sa tunga sang mga pungsud!

42Ang dagat nagsaka sa Babilonia; ginatabonan sia sang kadam-an sang kabaluran niya.

43Ang iya kabanwaanan nanginmamingaw, duta nga mamala kag desierto, duta diin walay tawo nga nagapuyo, ukon anak sang tawo nga nagpaagi.

44Kag magahikot ako sing paghukom kay Bel sa Babilonia, kag pagowaon ko sa iya baba ang iya ginhalunhon. Indi na magduguk sa iya ang mga pungsud; ang kuta sang Babilonia mapukan.

45“Katawohan ko, gowa kamo gikan sa tunga niya! Panginluwas ang tagsa ka tawo gikan sa mapintas nga kaakig sang Ginoo!

46Dili pagpapunawa ang inyo tagiposoon, ukon magkahadluk kamo sa mga balita nga mabatian sa duta, kay ang mga balita magaabut sa isa ka tuig kag sa tapus sina sa madason nga tuig magaabut ang mga balita, kag ang paglugus sa duta, kag ang manuggahum batok sa manuggahum.

47“Busa, yari karon, ang mga adlaw nagaabut nga magahikot ako sing paghukom sa mga larawan nga tinigban sa Babilonia; ang bug-os niya nga duta malibogan, kag ang tanan niyang pinatay mapukan sa tunga niya.

48Niyan ang mga langit kag ang duta, kag ang tanan nga yara sa ila, magaamba sa kalipay sa Babilonia; kay ang mga manuglaglag magaabut sa iya gikan sa aminhan, nagasiling ang Ginoo.

49Subong nga ang Babilonia nagpukan sang mga pinatay sa Israel, sa amo sa Babilonia mapukan ang mga pinatay sa bug-os nga duta.

50“Kamo nga nakaluwas sa espada, lakat kamo, dili magdolog! Dumduma ang Ginoo gikan sa malayo, kag hupti ang Jerusalem sa inyo painoino:

51‘Ginalibogan kita, bangud nga nakabati kita sing kahuluy-an; ang kalibog nagtabon sang aton mga nawung, kay ang mga dumuloong nagsulud sa mga santuario sang balay sang Ginoo.’

52“Busa, yari karon, nagaabut ang mga adlaw, nagasiling ang Ginoo, nga magahikot ako sing paghukom sa iya mga larawan nga tinigban, kag sa bug-os niya nga duta ang mga pilason magaugayong.

53Bisan ang Babilonia magasaka sa langit, kag bisan magpamakud sia sang kataasan sang iya kusug, apang magaabut sa iya ang mga manuglaglag gikan sa akon, nagasiling ang Ginoo.

54“Ang tingug sang singgit gikan sa Babilonia! Ang kagahud sa dakung kalaglagan gikan sa duta sang mga Caldeanhon!

55Kay ang Ginoo nagawagwag sang Babilonia, kag nagalaglag sang iya dakung tingug. Ang ila kabaluran nagahuganas kaangay sang madamung tubig, ang kagahud sang ila tingug ginamitlang;

56kay ang manuglaglag nag-abut sa iya, sa Babilonia; ang iya gamhanan nga mga tawo nadakpan, ang mga pana nila ginbalibali; kay ang Ginoo amo ang Dios sang mga pagtumbas, sia magabalus sa pagkamatuud.

57Kag hobgon ko ang iya mga principe kag ang iya mga mangin-alamon, ang iya mga pangolo-puud, ang iya mga tinugyanan, kag ang iya gamhanan nga mga tawo; magatolog sila sa dayon nga pagtolog kag indi na magmata, nagasiling ang Hari, nga ang iya ngalan amo ang Ginoo sang mga kasoldadosan.

58Amo ini ang ginasiling sang Ginoo sang mga kasoldadosan: “Ang masangkad nga mga kuta sang Babilonia gub-on sing bug-os kag ang iya mataas nga mga gawang sonogon sa kalayo. Ang mga katawohan magapangabudlay tungud sa kadayawan, kag ang mga pungsud lapyoon tungud lamang sa kalayo.”

59Ang polong nga ginsogo ni Jeremias nga manalagna kay Seraya nga anak ni Nerias, ang anak ni Masya, sang nag-upud sia kay Sedequias nga hari sang Juda pa Babilonia, sa ikap-at nga tuig sang iya paghari. Karon si Seraya puno nga tululinan sang mga higdaan.

60Si Jeremias nagsulat sa isa ka tolon-an sang tanan nga malaut nga magaabut sa Babilonia, ini tanan nga polong nga nasulat nahanungud sa Babilonia.

61Kag si Jeremias nagsiling kay Seraya: “Kon mag-abut ka sa Babilonia, tan-awa nga basahon mo ini tanan nga polong,

62kag magsiling, ‘O Ginoo, nagpamolong ka nahanungud sini nga duug, nga utdon ini, agud nga wala na sing magpuyo sa iya, bisan tawo ukon sapat, kondi manginmamingaw ini sing dayon.’

63Kon matapus mo ini nga tolon-an sa pagbasa, higtan mo ini sing bato, kag itagbong sa tunga sang Eufrates,

64kag magsiling ka, ‘Amo ini ang paglugdang sang Babilonia, kag indi na maglutaw, bangud sang malaut nga dalhon ko sa iya kag lapyoon sila.’” Tubtub diri ang mga polong ni Jeremias.