Jeremiah 35

Ilonggo (Ang Biblia (1982))

← Chapter 34 Jump to: Chapter 36 →

1Ang polong nga nag-abut kay Jeremias gikan sa Ginoo sa mga adlaw ni Joaquim nga anak ni Josias, hari sang Juda:

2“Kadto sa panimalay sang mga Recabnon, kag magpamolong sa ila, kag dalhon sila sa balay sang Ginoo, sa isa sang mga hulut kag paimnon sila sing alak.”

3Niyan ginkuha ko si Jaazanias nga anak ni Jeremias, anak ni Habasinias, kag ang iya mga utud, kag ang tanan niya nga anak, kag ang bug-os nga panimalay sang mga Recabnon.

4Ginpasulud ko sila sa balay sang Ginoo sa hulut sang mga anak nga lalaki ni Hanan nga anak ni Igdalias, ang tawo sang Dios nga yara sa luyo sang hulut sang mga principe, sa ibabaw sang hulut ni Maaseya nga anak ni Sallum, ang manugtatap sang atangan.

5Niyan ginbutang ko sa atubangan sang mga Recabnon ang mga yahong nga puno sang alak, kag mga tagayan; kag nagsiling ako sa ila, “Inum kamo sing alak.”

6Apang nagsiling sila, “Indi kami mag-inum sing alak, kay si Jonadab nga anak ni Recab, nga amon amay, nagsogo sa amon, ‘Dili kamo mag-inum sing alak, kamo ukon ang inyo mga anak sing dayon;

7dili kamo magpatindug sing balay; dili kamo magsab-ug sing binhi; dili kamo magtanum ukon mag-angkon sing ulubasan; kondi sa tanan ninyo nga adlaw magpuyo kamo sa mga layanglayang, agud nga magkabuhi kamo sing madamu nga adlaw sa duta diin nagapanlugayaw kamo.’

8Nagtuman kami sang tingug ni Jonadab nga anak ni Recab, nga amon amay, sa tanan nga gintulin niya sa amon, nga indi mag-inum sing alak sa tanan namon nga adlaw, kami, ang amon mga asawa, ang amon mga anak nga lalaki, ukon ang amon mga anak nga babayi,

9ukon magpatindug sing mga balay nga puy-an namon. Wala kami sing ulubasan ukon latagon ukon binhi;

10kondi nagpuyo kami sa mga layanglayang, kag nagtuman kag naghimo sono sa tanan nga ginsogo sa amon ni Jonadab nga amon amay.

11Apang sang si Nabucodonosor nga hari sang Babilonia nagtaklad batok sa duta, nagsiling kami, ‘Kari, kag magkadto kita sa Jerusalem sa kahadluk sa hangaway sang Caldeanhon kag sa hangaway sang mga Sirianhon.’ Gani nagapuyo kami sa Jerusalem.”

12Niyan nag-abut ang polong sang Ginoo kay Jeremias:

13“Amo ini ang ginasiling sang Ginoo sang mga kasoldadosan, ang Dios sang Israel: Kadto kag isiling sa mga tawo sang Juda kag sa mga pumuluyo sang Jerusalem, Indi bala kamo magbaton sing pagtudlo sa pagpamati sa akon mga polong? nagasiling ang Ginoo.

14Ang polong ni Jonadab nga anak ni Recab nga sia nagsogo sa iya mga anak, nga indi mag-inum sing alak, ginatuman; kag tubtub sini nga adlaw wala gid sila pag-inum, kay nagatuman sila sang sogo sang ila amay. Ako nagpamolong sa inyo nga nagabangon sing aga pa kag nagapamolong, apang wala kamo magpamati sa akon.

15Ginpadala ko sa inyo ang tanan ko nga alagad nga manalagna nga nagabangon sing aga pa kag nagapadala sa ila, nga nagasiling, ‘Magbalik kamo karon ang tagsa ka tawo gikan sa iya malaut nga dalanon, kag kaayoha ninyo ang inyo mga ginahimo, kag dili magsonod sa iban nga mga dios sa pag-alagad sa ila, kag magapuyo kamo sa duta nga ginhatag ko sa inyo kag sa inyo mga ginikanan.’ Apang wala kamo maglingig sang inyo idulungug ukon magpamati sa akon.

16Ang mga anak ni Jonadab nga anak ni Recab naghimo sang sogo sang ila amay nga ginsogo niya sa ila, apang ini nga katawohan wala magpamati sa akon.

17Busa amo ini ang ginasiling sang Ginoo, ang Dios sang mga kasoldadosan, ang Dios sang Israel: Yari karon, dalhon ko sa Juda kag sa tanan nga pumuluyo sang Jerusalem ang tanan nga malaut nga ginmitlang ko batok sa ila; bangud nga nagpamolong ako sa ila apang wala sila magpamati, nagpanawag ako sa ila apang wala sila magsabat.”

18Apang si Jeremias nagsiling sa panimalay sang mga Recabnon, “Amo ini ang ginasiling sang Ginoo sang mga kasoldadosan, ang Dios sang Israel: Bangud nga nagtuman kamo sang sogo ni Jonadab nga inyo amay, kag nagbantay sang tanan niya nga sogo, kag naghimo sono sa tanan nga ginsogo niya sa inyo,

19busa amo ini ang ginasiling sang Ginoo sang mga kasoldadosan, ang Dios sang Israel: Si Jonadab nga anak ni Recab indi gid makulangan sing tawo nga magatindug sa akon atubangan.”

← Chapter 34 Jump to: Chapter 36 →