Jeremiah 52

Ilonggo (Ang Biblia (1982))

← Chapter 51 Jump to:

1Si Sedequias duha ka pulo kag isa ka tuig sang nagsugud sia sa paghari; kag naghari sia sing napulo kag isa ka tuig sa Jerusalem. Ang ngalan sang iya iloy si Hamutal nga anak ni Jeremias sang Libna.

2Kag ginhimo niya ang malaut sa itololok sang Ginoo, sono sa tanan nga nahimo ni Joaquim.

3Kay tungud sa kaakig sang Ginoo ini sa Jerusalem kag sa Juda tubtub nga ginsikway niya sila sa iya atubangan. Kag si Sedequias nagribuk sa hari sang Babilonia.

4Kag sa ikasiam nga tuig sang iya paghari, sa ikapulo nga bulan, sa ikapulo nga adlaw sang bulan, si Nabucodonosor nga hari sang Babilonia nag-abut sia kag ang bug-os niya nga hangaway batok sa Jerusalem, kag nagpahamtang sing dologan batok sini kag nagpatindug sila sing mga trinsira batok sini sa palibut.

5Gani ang banwa ginkibon tubtub sa ikapulo kag isa nga tuig ni Hari Sedequias.

6Sa ikasiam nga adlaw sang ikap-at nga bulan ang tiggulutum matama sa banwa, sa bagay nga wala sing kalan-on nga sa katawohan sang duta.

7Niyan nahimo ang bulho sa banwa; kag ang tanan nga tawo sang inaway nagpalagyo kag naggowa sa banwa sa kagab-ihon sa alagyan sang gawang sa ulut sang duha ka kuta, nga yara sa luyo sang katamnan sang hari, samtang ang mga Caldeanhon yara palibut sa banwa. Kag nagpakadto sila nayon sa Araba.

8Apang ang hangaway sang mga Caldeanhon naglagas sa hari, kag nalambut si Sedequias sa kapatagan sang Jerico; kag nag-alaplaag gikan sa iya ang bug-os niya nga hangaway.

9Niyan gindakup nila ang hari, kag gindala sia sa hari sang Babilonia sa Ribla sa duta sang Hamat, kag ginhukman niya sia.

10Ginpatay sang hari sang Babilonia ang mga anak ni Sedequias sa atubangan sang iya mga mata, kag ginpatay man niya sa Ribla ang tanan nga mga principe sang Juda.

11Ginlukat niya ang mga mata ni Sedequias, kag ang hari sang Babilonia naggapus sa iya sa mga grilyos, kag gindala sia sa Babilonia, kag ginsulud sa bilanggoan tubtub sa adlaw sang iya kamatayon.

12Sa ikalima nga bulan, sa ikapulo nga adlaw sang bulan—nga amo ang ikapulo kag siam nga tuig ni Hari Nabucodonosor, hari sang Babilonia—nag-abut sa Jerusalem si Nabuzaradan nga pangolo sang bantay nga nagtindug sa atubangan sang hari sang Babilonia.

13Kag ginsonog niya ang balay sang Ginoo, kag ang balay sang hari kag ang tanan nga kabalayan sang Jerusalem; ang tagsa ka balay nga daku ginsonog niya sa kalayo.

14Kag ang bug-os nga hangaway sang mga Caldeanhon, nga nag-upud sa pangolo sang bantay, nagguba sang tanan nga mga kuta sa Jerusalem palibut.

15Niyan gindala nga bihag ni Nabuzaradan nga pangolo sang bantay ang labi gid ka imol sang katawohan kag ang salin sang katawohan nga nabilin sa banwa kag ang mga nagsimpon nga nagsimpon sa hari sang Babilonia, kag ang salin sang kadam-an.

16Apang si Nabuzaradan nga pangolo sang mga bantay nagbilin sang labi gid ka imol sang duta nga mga manugtatap sang uvas kag mga mangunguma.

17Kag ang mga haligi nga saway nga yadto sa balay sang Ginoo, kag ang mga tulungtungan kag ang dagat nga saway nga yara sa balay sang Ginoo, gintipiktipik sang mga Caldeanhon, kag gindala ang saway nila sa Babilonia.

18Ang mga alabohan man kag ang mga pala, kag ang mga inugpalong, kag ang mga palanggana, kag ang mga cuchara, kag ang tanan nga mga gamit nga saway nga ginaalagad, ginkuha nila;

19ang mga tagayan, kag ang mga bagahan, kag ang mga batiya, kag ang mga kolon, kag ang mga candelero, kag ang mga cuchara, kag ang mga yahong. Ang sa bulawan, sa bulawan, kag ang sa pilak, sa pilak gindala sang pangolo sang bantay.

20Ang duha ka haligi, ang dagat nga isa, ang napulo kag duha ka baka nga saway nga yara sa idalum sang mga tulungtungan, nga ginhimo ni Hari Salomon sa balay sang Ginoo, ang saway sang tanan nga mga gamit indi matimbang.

21Nahanungud sa mga haligi, ang kataason sang isa ka haligi napulo kag walo ka maniko, ang isa ka lubid nga napulo kag duha ka maniko, makalikus sini, kag ang iya kadamul apat sa tudlo, kag guyko ini.

22Ang oloolo nga saway yara sa ibabaw sini; ang kataason sang isa ka oloolo lima ka maniko; sa ibabaw sang oloob sa palibut may pinuna kag mga granada, ang tanan saway. Kag sa ikaduha ka haligi man may mga kaangay sini, kag mga granada.

23May kasiaman kag anum ka mga granada sa mga kilid; ang tanan nga mga granada isa ka gatus sa pinuna palibut.

24Kag ang pangolo sang bantay nagkuha kay Seraya nga puno nga sacerdote, kag kay Sofonias nga ikaduha nga sacerdote, kag sang tatlo ka bantay sang atangan;

25kag sa banwa nagkuha sia sing manugdumala sa pagpangolo sang mga tawo sa inaway, kag pito ka tawo sa ila nga nagtan-aw sa nawung sang hari, nga nakita sa banwa; kag sang escriba nga pangolo sang kasoldadosan nga nagtipon sang mga katawohan sang duta; kag kan-uman ka lalaki sang katawohan sang duta, nga nakita sa tunga sang banwa.

26Kag ginkuha sila ni Nabuzaradan nga pangolo sang bantay, kag gindala sila sa hari sang Babilonia sa Ribla.

27Kag ginlabo sila sang hari sang Babilonia, kag ginpatay sila sa Ribla sa duta sang Hamat. Gani ang Juda gindala nga bihag gikan sa iya duta.

28Ini amo ang katawohan nga ginbihag ni Nabucodonosor: sa ikapito nga tuig, tatlo ka libo kag duha ka pulo kag tatlo ka mga Judio;

29sa ikapulo kag walo nga tuig ni Nabucodonosor nagbihag sia sing walo ka gatus kag katloan kag duha ka tawo gikan sa Jerusalem;

30sa ikaduha ka pulo kag tatlo nga tuig ni Nabucodonosor, si Nabuzaradan nga pangolo sang bantay nagbihag sa mga Judio sing pito ka gatus kag kap-atan kag lima ka tawo; ang tanan nga tawo apat ka libo kag anum ka gatus.

31Kag sa ikakatloan kag pito nga tuig sang pagbihag kay Joaquin nga hari sang Juda, sa ikapulo kag duha nga bulan, sa ikaduha ka pulo kag lima nga adlaw sang bulan, si Evil-merodac nga hari sang Babilonia, sa nahauna nga tuig sang iya paghari, nagbayaw sang olo ni Joaquin nga hari sang Juda kag ginpagowa niya sia sa bilanggoan;

32kag nagpamolong sia sing maayo sa iya, kag nagpahamtang sang iya trono sa ibabaw sang trono sang mga hari nga yara sa Babilonia.

33Gani gin-ilisan ang iya mga panapton sa bilanggoan. Kag si Joaquin nagkaon sing tinapay sa tanan nga adlaw sang iya kabuhi sa atubangan niya;

34sa iya inugkabuhi, ginhatagan sia sang hari sang Babilonia sing dalayon nga inugkabuhi, sing bahin sa tagsa ka adlaw tubtub sa adlaw sang iya kamatayon sa tanan nga mga adlaw sang iya kabuhi.

← Chapter 51 Jump to: