Jeremiah 36

Ilonggo (Ang Biblia (1982))

← Chapter 35 Jump to: Chapter 37 →

1Sa ikap-at nga tuig ni Joaquim nga anak ni Josias, hari sang Juda, nag-abut ini nga polong kay Jeremias gikan sa Ginoo:

2“Kuha ka sing linukut sang tolon-an kag isulat sa sini ang tanan nga polong nga ginpamolong ko sa imo batok sa Israel kag sa Juda kag sa tanan nga pungsud, kutub sang adlaw nga nagpamolong ako sa imo, kutub sa mga adlaw ni Josias tubtub sini nga adlaw.

3Ayhan ang panimalay sang Juda magapamati sang bug-os nga malaut nga ginabuko ko nga himoon sa ila, agud nga magtalikod sila ang tagsa ka tawo sa iya malaut nga dalanon, agud nga mapatawad ko ang ila kalautan kag ang ila sala.”

4Niyan gintawag ni Jeremias si Baruc nga anak ni Nerias, kag ginsulat ni Baruc sa linukut sang tolon-an ang tanan nga polong sang Ginoo gikan sa baba ni Jeremias nga ginpamolong niya sa iya.

5Kag ginsogo ni Jeremias si Baruc, nga nagasiling, “Napunggan ako sa pagsulud sa balay sang Ginoo;

6busa sulud ka, kag basaha sa linukut nga ginsulat mo gikan sa akon baba ang mga polong sang Ginoo sa mga idulungug sang katawohan sa balay sang Ginoo sa adlaw sang puasa. Basahon mo man sila sa mga idulungug sang bug-os nga Juda nga nagagowa gikan sa ila kabanwaanan.

7Ayhan magapakilooy sila sa atubangan sang Ginoo, kag magatalikod ang tagsatagsa sa iya malaut nga dalanon, kay daku ang kaakig kag ang kasingkal nga ginmitlang sang Ginoo batok sini nga katawohan.”

8Kag si Baruc nga anak ni Nerias naghimo sono sa tanan nga ginsogo sa iya ni Jeremias nga manalagna nga nagabasa sa tolon-an sang mga polong sang Ginoo sa balay sang Ginoo.

9Sa ikalima nga tuig ni Joaquim nga anak ni Josias, hari sang Juda, sa ikasiam nga bulan, nagbantala sing puasa sa atubangan sang Ginoo ang bug-os nga katawohan sang Jerusalem kag bug-os nga katawohan nga nag-abut sa Jerusalem gikan sa kabanwaanan sang Juda.

10Niyan, sa mga idulungug sang bug-os nga katawohan ang mga polong ni Jeremias ginbasa ni Baruc sa tolon-an, sa balay sang Ginoo, sa hulut ni Gemarias nga ana k ni Safan nga escriba, sa naibabaw nga luwang, sa salamputan sang Bag-o nga Gawang sang balay sang Ginoo.

11Sang nabatian ni Micaya nga anak ni Gemarias, ang anak ni Safan, ang tanan nga polong sang Ginoo gikan sa tolon-an,

12nagpanaug sia pasulud sa balay sang hari, sa hulut sang escriba; kag ang tanan nga principe nagalingkod didto: si Elisama nga escriba, si Delaya nga anak ni Semaya, si Elnatan nga anak ni Acbor, si Gemarias nga anak ni Safan, si Sedequias nga anak ni Hananias, kag ang tanan nga principe.

13Niyan ginpahayag sa ila ni Micaya ang tanan nga polong nga iya nabatian, sang pagbasa ni Baruc sang tolon-an sa mga idulungug sang katawohan.

14Busa ginpadala sang tanan nga principe si Jehudi nga anak ni Netanias, ang anak ni Selemias nga anak ni Cusi, kay Baruc nga nagasiling, “Dalha sa imo kamut ang linukut nga ginbasa mo sa mga idulungug sang katawohan, kag magkari.” Gani si Baruc nga anak ni Nerias nagdala sa iya kamut sang linukut kag nagkadto sa ila.

15Kag ginsilingan nila sia, “Lingkod ka karon kag basaha ini sa amon mga idulungug.” Gani ginbasa ini ni Baruc sa ila mga idulungug.

16Sang pagkabati nila sang tanan nga polong, nag-atubangay sila nga may kahadluk; kag nagsiling sila kay Baruc, “Dapat naton sugiran ang hari sini tanan nga polong.”

17Niyan nagpamangkot sila kay Baruc, “Sugiri kami karon, paano ang pagsulat mo sini tanan nga polong? Gikan bala ini sa iya baba?”

18Niyan si Baruc nagsabat sa ila, “Sia nagmitlang sa akon sa iya baba sini tanan nga polong, samtang ginsulat ko sila sing tinta sa tolon-an.”

19Niyan nagsiling ang mga principe kay Baruc, “Lakat kag panago, ikaw kag si Jeremias, kag dili pagpahibaloa ang bisan sin-o nga tawo kon diin kamo.”

20Gani nagsulud sila sa hari sa luwang, apang gintago nila ang linukut sa hulut ni Elisama nga escriba; kag ginsugid nila sa mga idulungug sang hari ang tanan nga polong.

21Gani ginpadala sang hari si Jehudi sa pagkuha sang linukut, kag ginkuha niya ini sa hulut ni Elisama nga escriba; kag ini ginbasa ni Jehudi sa mga idulungug sang hari kag sa mga idulungug sang tanan nga principe nga nagtindug sa luyo sang hari.

22Karon ang hari nagalingkod sa balay sa tigtulugnaw sa ikasiam nga bulan, kag may bagahan nga nagadabdab sa atubangan niya.

23Sang mabasa ni Jehudi ang tatlo ukon apat ka idas, ginagikas ini sang sundang sang hari kag idap-ung ini sa kalayo nga yara sa bagahan, tubtub nga ang bug-os nga linukut naupus sa kalayo nga yara sa bagahan.

24Apang wala sila mahadluk, ukon nagkusnit sang ila mga panapton, ang hari ukon bisan sin-o sang iya nga mga alagad nga nakabati sini tanan nga polong.

25Labut pa si Elnatan kag si Delaya kag si Gemarias nagpakilooy sa hari nga indi niya pagsonogon ang linukut, apang indi sia magpamati sa ila.

26Kag ginsogo sang hari si Jerameel nga anak sang hari kag si Seraya nga anak ni Azriel kag si Selemias nga anak ni Abdeel nga dakpon si Baruc nga escriba kag si Jeremias nga manalagna, apang gintago sila sang Ginoo.

27Niyan ang polong sang Ginoo nag-abut kay Jeremias sa tapus nga nasonog sang hari ang linukut kag ang mga polong nga ginsulat ni Baruc gikan sa baba ni Jeremias:

28“Kuha ka liwat sing isa pa ka linukut kag isulat sa sini ang tanan nga polong nga didto anay sa nahauna nga linukut, nga ginsonog ni Joaquim nga hari sang Juda.

29Kag nahanungud kay Joaquim nga hari sang Juda isiling mo, ‘Amo ini ang ginasiling sang Ginoo, Ginsonog mo ini nga linukut, nga nagasiling, “Ngaa bala ginsulat mo sa sini nga magaabut ang hari sang Babilonia kag magalaglag sini nga duta, kag magapawala didto sang tawo kag sapat?”

30Busa amo ini ang ginasiling sang Ginoo nahanungud kay Joaquim nga hari sang Juda, wala gid sia sing palingkoron sa trono ni David, kag ang iya bangkay ihaboy sa gowa sa initan kag sa kagab-ihon sa gapogapo nga hielo.

31Kag silotan ko sia kag ang iya kaliwat kag ang iya mga alagad tungud sang ila kalautan; dalhon ko sa ila, kag sa mga pumuluyo sang Jerusalem, kag sa mga tawo sang Juda, ang tanan nga malaut nga ginmitlang ko batok sa ila, apang wala sila magpamati.’”

32Niyan nagkuha si Jeremias sing isa pa ka linukut kag ginhatag ini kay Baruc nga escriba, ang anak ni Nerias, nga nagsulat sa sini gikan sa baba ni Jeremias sang tanan nga polong sang tolon-an nga ginsonog sa kalayo ni Joaquim nga hari sang Juda; kag gindugang pa luwas sa ila ang madamung kaangay nga polong.

← Chapter 35 Jump to: Chapter 37 →