Jeremiah 25

Ilonggo (Ang Biblia (1982))

← Chapter 24 Jump to: Chapter 26 →

1Ang polong nga nag-abut kay Jeremias nahanungud sa tanan nga katawohan sang Juda, sa ikap-at nga tuig ni Joaquim nga anak ni Josias, hari sang Juda (nga amo ang nahauna nga tuig ni Nabucodonosor nga hari sang Babilonia),

2nga ginpamolong ni Jeremias nga manalagna sa tanan nga katawohan sang Juda kag sa tanan nga pumuluyo sang Jerusalem:

3“Kutub sa ikapulo kag tatlo nga tuig ni Josias nga anak ni Amon, hari sa Juda, tubtub sini nga adlaw, sa sini nga duha ka pulo kag tatlo ka tuig, nag-abut sa akon ang polong sang Ginoo, kag nagpamolong ako sa inyo nga nagabangon sing aga pa kag nagapamolong, apang wala kamo magpamati.

4Ang Ginoo nagpadala sa inyo sang tanan niya nga alagad nga manalagna nga nagabangon sing aga pa kag nagapadala sa ila, apang wala kamo magpamati ukon maglingig sang inyo idulungug sa pagpamati,

5nga nagsiling, ‘Magbiya kamo karon, ang tagsatagsa, sa iya malaut nga dalanon kag sa kalaut sang inyo mga binuhatan, kag magpuyo sa duta nga ginhatag sang Ginoo sa inyo kag sa inyo mga ginikanan kutub sa dumaan tubtub sa gihapon;

6dili magsonod sa iban nga mga dios sa pag-alagad sa ila kag sa pagsimba sa ila, kag dili ako pagpaakiga sa binuhatan sang inyo mga kamut. Niyan indi ako magsamad sa inyo.’

7Apang wala kamo magpamati sa akon, nagasiling ang Ginoo, agud nga mapaakig ninyo ako sa binuhatan sang inyo mga kamut sa inyo kaugalingon nga kasamaran.

8“Busa amo ini ang ginasiling sang Ginoo sang mga kasoldadosan: Bangud nga wala kamo magpamati sa akon mga polong,

9yari karon, ipadala ko kag kuhaon ko ang tanan nga panimalay sang aminhan, nagasiling ang Ginoo, kag padalhan ko si Nabucodonosor nga hari sa Babilonia, nga akon alagad, kag dalhon sila batok sini nga duta kag batok sa iya mga pumuluyo, kag batok sini tanan nga pungsud sa palibut; laglagon ko sila sing bug-os, kag himoon sila nga kabulungan, panagutsutan, kag dayon nga mga kamingaw.

10Labut pa, kuhaon ko sa ila ang tingug sang kasadya kag ang tingug sang kalipay, ang tingug sang nobyo kag ang tingug sang nobya, ang kagahud sang mga galingan kag ang kapawa sang suga.

11Ini nga bug-os nga duta manginmamingaw kag kabulungan, kag magaalagad ini nga mga pungsud sa hari sang Babilonia sing kapitoan ka tuig.

12Niyan kon matuman ang kapitoan ka tuig, silotan ko ang hari sang Babilonia kag ina nga pungsud, nagasiling ang Ginoo, tungud sa ila kalautan, kag ang duta sang mga Caldeanhon, kag himoon ko ini nga mamingaw sa gihapon.

13Dalhon ko sa sina nga duta ang tanan ko nga polong nga ginmitlang ko batok sa iya, ang tanan nga nasulat sa sini nga tolon-an, nga gintagna ni Jeremias batok sa tanan nga pungsud.

14Kay madamu nga mga pungsud kag dalagku nga mga hari nga magaulipon sa ila; kag tumbasan ko sila sono sa ila mga binuhatan kag sono sa buhat sang ila mga kamut.”

15Kay amo ini ang ginasiling sang Ginoo, ang Dios sang Israel, sa akon: “Kuhaa sa akon kamut ini nga tagayan sang alak sang kasingkal, kag paimna sini ang tanan nga pungsud nga padalhan ko sa imo.

16Magainum sila kag magdulingduling sila kag magbuangbuang bangud sang espada nga ipadala ko sa ila.”

17Niyan ginkuha ko ang tagayan sa kamut sang Ginoo, kag ginpainum ang tanan nga pungsud nga ginpadalhan sa akon sang Ginoo:

18Ang Jerusalem kag ang kabanwaanan sang Juda, ang iya mga hari kag ang iya mga principe, sa paghimo sa ila nga mamingaw nga kabulungan, nga panagutsutan, kag pagpakamalaut, subong sang sa sini nga adlaw;

19si Faraon nga hari sang Egipto, ang iya mga alagad, ang iya mga principe, ang bug-os niya nga katawohan,

20kag ang bug-os nga katawohan nga salakut; ang tanan nga hari sang duta sang Uz kag ang tanan nga hari sang duta sang mga Filistinhon (ang Ascalon, ang Gasa, ang Ekron, kag ang nabilin sang Asdod);

21ang Edom, ang Moab, kag ang mga anak ni Amon;

22ang tanan nga hari sang Tiro, ang tanan nga hari sang Sidon, kag ang mga hari sang pulo nga yara sa tabok sang dagat;

23ang Dedan, ang Tema, ang Buz, kag ang tanan nga naggulub sang mga higad sang ila buhok;

24ang tanan nga hari sang Arabia kag ang tanan nga hari sang katawohan nga nagasalakut nga nagapuyo sa kamingawan;

25ang tanan nga hari sang Zimri, ang tanan nga hari sang Elam, kag ang tanan nga hari sang Media;

26ang tanan nga hari sang aminhan, malayo kag malapit, ang isa upud sa isa, kag ang tanan nga ginharian sang kalibutan nga yara sa kadaygan sang duta. Kag ang hari sang Sesac magainum sa olihi nila.

27“Niyan isiling mo sa ila, ‘Amo ini ang ginasiling sang Ginoo sang mga kasoldadosan, ang Dios sang Israel: Inum kamo, mahobog kag magbuga, mapukan kag dili na magbangon, bangud sang espada nga ipadala ko sa tunga ninyo.’

28“Kag kon magdumili sila sa pagbaton sang tagayan sa imo kamut sa pag-inum, niyan isiling mo sa ila, ‘Amo ini ang ginasiling sang Ginoo sang mga kasoldadosan: Mag-inum gid kamo!

29Kay yari karon, sa banwa nga ginahingadlan sa akon ngalan ako nagasugud sa paghimo sang malaut, kag dili gid kamo bala pagsilotan? Indi kamo mahilway sa silot, kay magatawag ako sang espada tungud sa tanan nga pumuluyo sang duta, nagasiling ang Ginoo sang mga kasoldadosan.’

30“Busa, itagna mo sa ila ini tanan nga polong, kag isiling sa ila: ‘Ang Ginoo magangurub gikan sa hitaas, kag magamitlang sang tingug gikan sa iya balaan nga puluy-an; magangurub sia sing mabaskug batok sa iya halalban, sia magasinggit, subong sang mga nagalapak sang uvas, batok sa tanan nga mga pumuluyo sang duta.

31Magalambut ang kagahud tubtub sa ukbung sang duta, kay ang Ginoo may kasaba batok sa mga pungsud; sia magasulud sa hukmanan upud sa tanan nga unud, kag ang mga malauton itugyan niya sila sa espada, nagasiling ang Ginoo.’

32“Amo ini ang ginasiling sang Ginoo sang mga kasoldadosan, Yari karon, ang malaut magalapnag sa pungsud pa pungsud, kag ang daku nga unus magagikan sa mga ukbung sang duta!

33“Kag ang pinatay sang Ginoo sa sadto nga adlaw manginkutub sa isa ka ukbung sang duta tubtub gid sa isa ka ukbung sang duta. Indi sila paghayaan, ukon tiponon, ukon ilubung; mangin-ipot sila sa kadaygan sang duta.

34“Haya, kamo nga mga manugpahalab, kag singgit, kag tubog sa mga abo, kamo nga mga kadalagkuan sang panong, kay ang mga adlaw sang pag-ihaw sa inyo kag ang mga pagpaaplaag sa inyo nagaabut sing bug-os, kag maholog kamo kaangay sang matahum nga suludlan.

35Ang mga manugpahalab wala sing palagyohan, ukon ang pangolo sang panong may likawan.

36Tingug sang singgit sang mga manugpahalab, kag ang paghaya sang pangolo sang panong! Kay ang Ginoo nagasamad sang ila halalban,

37kag ang malinong nga mga torril ginpahipus, bangud sang mapintas nga kaakig sang Ginoo.

38Ginbayaan niya ang iya panagoan, subong sang leon, kay ang ila duta nanginkabulungan bangud sang kapintas sang nagapigus nga espada, kag bangud sang iya mapintas nga kaakig.”

← Chapter 24 Jump to: Chapter 26 →