Jeremiah 29

Ilonggo (Ang Biblia (1982))

← Chapter 28 Jump to: Chapter 30 →

1Amo ini ang mga polong sang sulat nga ginpadala ni Jeremias nga manalagna gikan sa Jerusalem pakadto sa salin sang mga tigulang sang kabihagan, kag sa mga sacerdote, sa mga manalagna, kag sa bug-os nga katawohan, nga ginbihag ni Nabucodonosor gikan sa Jerusalem pa Babilonia.

2Ini sa tapus nga naghalin sa Jerusalem si Hari Jeconias, kag ang hara nga iloy, ang mga eunuco, ang mga principe sang Juda kag Jerusalem, ang mga panday, kag ang mga manugsalsal.

3Ang sulat ginpadala sa kamut ni Elasa nga anak ni Safan kag ni Gemarias nga anak ni Hilcias, nga ginpadala ni Sedequias nga hari sang Juda sa Babilonia kay Nabucodonosor nga hari sang Babilonia. Ini nagasiling:

4“Amo ini ang ginasiling sang Ginoo sang mga kasoldadosan, ang Dios sang Israel, sa bug-os nga kabihagan nga ginpabihag ko gikan sa Jerusalem pa Babilonia:

5Patindug kamo sing mga balay kag magpuyo sa ila; tanum sing mga katamnan, kag kaon sang bunga nila.

6Palangasawa kamo kag mag-anak sing mga lalaki kag mga babayi; paasaw-i ang inyo mga anak nga lalaki, kag pabanhi ang inyo mga anak nga babayi, agud nga mag-anak sila sing mga lalaki kag mga babayi; magbuad kamo didto, kag indi magbuhin.

7Apang tinguhaa ang paghidait sang banwa diin ginpadala ko kamo nga bihag, kag magpangamuyo sa Ginoo tungud sa iya, kay sa iya paghidait may paghidait kamo.

8Kay amo ini ang ginasiling sang Ginoo sang mga kasoldadosan, ang Dios sang Israel: Dili kamo magpalimbong sa inyo mga manalagna nga yara sa tunga ninyo kag sa inyo mga manuglagpat, kag dili kamo magpamati sa inyo mga damgo nga gindamgo ninyo,

9kay nagatagna sila sing dimatuud sa inyo sa akon ngalan; wala ko sila pag-ipadala, nagasiling ang Ginoo.

10“Kay amo ini ang ginasiling sang Ginoo: Sa tapus nga matuman ang kapitoan ka tuig tungud sa Babilonia, duawon ko kamo, kag magahimo sa inyo sang akon maayo nga polong sa pagpabalik sa inyo sa sini nga duug.

11Kay nahibaloan ko ang mga hunahuna nga ginahunahuna ko ayon sa inyo, nagasiling ang Ginoo, mga hunahuna sang paghidait kag indi sang malaut, sa paghatag sa inyo sing paglaum sa inyo kaolihian.

12Niyan magatawag kamo sa akon kag magakadto kamo kag magapangamuyo sa akon, kag pamatian ko kamo.

13Pangitaon ninyo ako kag makita ako; kon pangitaon ninyo ako sa bug-os ninyo nga tagiposoon,

14makita ninyo ako, nagasiling ang Ginoo, kag pahaulian ko ang inyo kabihagan kag tiponon ko kamo gikan sa tanan nga pungsud kag gikan sa tanan nga duug diin ginsobol ko kamo, nagasiling ang Ginoo, kag pabalikon ko kamo sa duug diin ginpabihag ko kamo.

15“Bangud nga nagsiling kamo, ‘Ang Ginoo nagpatindug sa amon sing mga manalagna sa Babilonia,’—

16Amo ini ang ginasiling sang Ginoo nahanungud sa hari nga nagalingkod sa trono ni David, kag nahanungud sa bug-os nga katawohan nga nagapuyo sa sini nga banwa, ang inyo mga himata nga wala maggowa upud sa inyo sa kabihagan:

17‘Amo ini ang ginasiling sang Ginoo sang mga kasoldadosan, Yari karon, ipadala ko batok sa ila ang espada, ang tiggulutum, kag ang kamatay, kag himoon sila kaangay sang mga higos nga malain nga indi makaon kay tama kalain sila.

18Lagson ko sila sang espada, sang tiggulutum, kag sang kamatay, kag itugyan ko sila nga itumbotumbo pakadto-pakari sa tanan nga ginharian sang duta, nga manginkadudlaan, kabulungan, panagutsutan, kag kahuluy-an sa tunga sang tanan nga pungsud diin ginsobol ko sila,

19bangud nga wala sila magpamati sa akon mga polong, nagasiling ang Ginoo, nga sa ila ginpadala ko ang akon mga alagad nga mga manalagna nga nagabangon sing aga pa kag nagapadala sa ila, apang kamo indi magpamati, nagasiling ang Ginoo.’—

20Busa pamatii ninyo ang polong sang Ginoo, kamo tanan sang kabihagan nga ginpadala ko gikan sa Jerusalem pa Babilonia:

21‘Amo ini ang ginasiling sang Ginoo sang mga kasoldadosan, ang Dios sang Israel, nahanungud kay Acab nga anak ni Colaya kag nahanungud kay Sedequias nga anak ni Maasias, nga nagtagna sa inyo sing butig sa akon ngalan: Yari karon, itugyan ko sila sa kamut ni Nabucodonosor nga hari sang Babilonia, kag sia magapatay sa ila sa atubangan sang inyo mga mata.

22Bangud sa ila ang tanan nga bihag gikan sa Juda nga yadto sa Babilonia magagamit sing pakamalaut: “Himoon ka sang Ginoo kaangay kay Sedequias kag kaangay kay Acab, nga gin-asal sa kalayo sang hari sang Babilonia,”

23bangud nga naghimo sila sing kabuangan sa Israel, nagpanglahi sila sa mga asawa sang ila mga isigkatawo, kag nagpamolong sila sing dimatuud nga mga polong sa akon ngalan nga wala ko pag-isogo sa ila. Ako ang nakahibalo, kag saksi, nagasiling ang Ginoo.’”

24Kay Semaya nga Nehelamnon ipamolong mo:

25“Amo ini ang ginapamolong sang Ginoo sang mga kasoldadosan, ang Dios sang Israel: Bangud nga nagpadala ka sing mga sulat sa imo kaugalingon nga ngalan sa bug-os nga katawohan nga yara sa Jerusalem, kag kay Sofonias nga anak ni Maasias nga sacerdote, kag sa tanan nga sacerdote, nga nagasiling,

26‘Ang Ginoo naghimo sa imo nga sacerdote sa tal-us ni Joiada nga sacerdote, agud nga may mga manug-dumala sa balay sang Ginoo sa tagsa ka tawo nga buangbuang nga nagapakamanalagna sia, nga ibutang mo sia sa mga pandug kag sa mga grilyos.

27Busa karon ngaa bala nga wala mo pagsabdonga si Jeremias nga taga-Anatot nga nagapakamanalagna sa inyo?

28Sa bagay nga nagpadala sia sa amon sa Babilonia, nga nagasiling, “Ang kabihagan malawig; patindug kamo sing mga balay kag magpuyo sa ila, kag magtanum sing mga katamnan kag magkaon sang bunga nila.”’”

29Si Sofonias nga sacerdote nagbasa sini nga sulat sa mga idulungug ni Jeremias nga manalagna.

30Niyan nag-abut ang polong sang Ginoo kay Jeremias:

31“Padala sa tanan sa ila sa kabihagan, nga nagasiling, ‘Amo ini ang ginasiling sang Ginoo nahanungud kay Semaya nga Nehelamnon: Bangud nga si Semaya nagtagna sa inyo kag wala ko sia ipadala, kag ginpasalig niya kamo sa butig,

32busa amo ini ang ginasiling sang Ginoo: Yari karon, silotan ko si Semaya nga Nehelamnon kag ang iya mga kaliwatan; wala sia sing tawo nga magpuyo sa tunga sini nga katawohan kag indi sia makakita sang kaayohan nga himoon ko sa akon katawohan, nagasiling ang Ginoo, bangud nga nagpamolong sia sing pagbato sa Ginoo.’”

← Chapter 28 Jump to: Chapter 30 →