Jeremiah 24

Ilonggo (Ang Biblia (1982))

← Chapter 23 Jump to: Chapter 25 →

1Yari karon, ginpakita sa akon sang Ginoo ang duha ka alat sang mga higos nga nabutang sa atubangan sang templo sang Ginoo, sa tapus nga si Nabucodonosor nga hari sang Babilonia nagbihag kay Jeconias nga lalaki nga anak ni Joaquim, hari sang Juda, kag ang mga principe sang Juda, upud sang mga panday, kag sang mga manugsalsal, gikan sa Jerusalem kag gindala sila sa Babilonia.

2Ang isa ka alat may maayo gid nga mga higos, kaangay sang mga higos nga una maloto, kag ang isa pa ka alat nga may malain gid nga mga higos, nga indi makaon kay tama sila kalain.

3Niyan nagsiling sa akon ang Ginoo, “Ano bala ang nakita mo, Jeremias?” Nagsiling ako, “Mga higos, ang maayo nga mga higos maayo gid, kag ang malain gid, nga indi makaon kay tama sila kalain.”

4Niyan ang polong sang Ginoo nag-abut sa akon:

5“Amo ini ang ginasiling sang Ginoo, ang Dios sang Israel: Kaangay sini nga maayo nga mga higos, kabigon ko nga maayo ang mga bihag gikan sa Juda, nga ginpagowa ko gikan sini nga duug pakadto sa duta sang mga Caldeanhon.

6Kay ipahamtang ko ang akon mga mata sa ila tungud sa kaayohan, kag ibalik ko sila sa sini nga duta. Patindugon ko sila, kag indi sila paggub-on; itanum ko sila, kag indi sila paggabuton.

7Hatagan ko sila sing tagiposoon sa pagkilala nga ako amo ang Ginoo; kag sila mangin-akon katawohan kag ako mangin-ila Dios, kay sila magabalik sa akon sa bug-os nila nga tagiposoon.

8“Apang subong sang malain nga mga higos nga indi makaon kay tama sila kalain, amo ini ang ginasiling sang Ginoo, sa amo itugyan ko si Sedequias nga hari sang Juda, ang iya mga principe, ang salin sa Jerusalem nga nabilin sa sini nga duta, kag ang mga nagapuyo sa duta sang Egipto.

9Itugyan ko gid sila nga itumbotumbo pakadto-pakari sa tunga sang tanan nga ginharian sang duta nga sa kalaut, nga kahuluy-an, hulubaton, ululigyaton, kag pagpakamalaut sa tanan nga duug diin sobolon ko sila.

10Kag ipadala ko ang espada, ang tiggulutum, kag ang kamatay sa tunga nila, tubtub nga maubus sila gikan sa duta nga ginhatag ko sa ila kag sa ila mga ginikanan.”

← Chapter 23 Jump to: Chapter 25 →