Jeremiah 21

Ilonggo (Ang Biblia (1982))

← Chapter 20 Jump to: Chapter 22 →

1Ang polong gikan sa Ginoo nga nag-abut kay Jeremias, sang si Hari Sedequias nagpadala sa iya kay Pasur nga anak ni Malquias kag kay Sofonias nga anak ni Maasias, ang sacerdote, nga nagasiling,

2“Pamangkot sa Ginoo tungud sa aton, kay si Nabucodonosor nga hari sang Babilonia nagapakig-away sa aton; ayhan ang Ginoo magahisayo sa aton sono sa tanan niya nga katingalahan nga mga binuhatan, sa bagay nga si Nabucodonosor magataklad gikan sa aton.”

3Niyan si Jeremias nagsiling sa ila: “Amo ini ang isiling ninyo kay Sedequias,

4‘Amo ini ang ginasiling sang Ginoo, ang Dios sang Israel: Yari karon, pabalikon ko ang mga hinganiban sang inaway nga yara sa inyo mga kamut nga sa sini nagaaway kamo batok sa hari sang Babilonia kag batok sa mga Caldeanhon nga nagakibon sa inyo sa gowa sang mga kuta; kag tiponon ko sila sa tunga sini nga banwa.

5Ako akon magapakig-away sa inyo sa kamut nga inuntay kag sa butkon nga makusug, sa kaakig, kag sa kasingkal, kag sa daku nga kaalipungut.

6Kag samaron ko ang mga pumuluyo sini nga banwa, tingub ang tawo kag sapat; mapatay sila sa daku nga kamatay.

7Sa olihi, nagasiling ang Ginoo, itugyan ko si Sedequias nga hari sang Juda, kag ang iya mga alagad, kag ang katawohan nga mabilin sini nga banwa gikan sa kamatay, gikan sa espada, kag gikan sa tiggulutum, sa kamut ni Nabucodonosor nga hari sang Babilonia kag sa kamut sang ila mga kaaway, sa kamut sang mga nagatinguha sang ila kabuhi. Pilason niya sila sa sulab sang espada; indi sia magpasaylo sa ila, ukon maawa, ukon malooy.’

8“Kag isiling mo sa sini katawohan: ‘Amo ini ang ginasiling sang Ginoo: Yari karon, ginabutang ko sa atubangan ninyo ang dalan sang kabuhi kag ang dalan sang kamatayon.

9Ang nagapabilin sa sini nga banwa mapatay sa espada, sa tiggulutum, kag sa kamatay; apang ang nagagowa kag nagasaylo sa mga Caldeanhon nga nagakibon sa inyo sia magakabuhi kag ang iya kabuhi mangin-inagaw sa iya.

10Kay ginapahamtang ko ang akon nawung sa sini nga banwa nga sa malaut kag indi nga sa maayo, nagasiling ang Ginoo: itugyan ini sa kamut sang hari sang Babilonia, kag sonogon niya ini sa kalayo.’

11“Kag isiling sa panimalay sang hari sang Juda, ‘Pamati kamo sang polong sang Ginoo,

12O panimalay ni David! Amo ini ang ginasiling sang Ginoo: “‘Hikuta ang katarungan sa kaagahon, kag luwasa sia nga ginkawatan gikan sa kamut sang manugpigus, basi nga ang akon kasingkal maggowa kaangay sang kalayo, kag magdabdab nga wala sing makapalong, bangud sang kalaut sang inyo mga hinimoan.’”

13“Yari karon, batok ako sa imo, O pumuluyo sang nalupyakan, O igang sang kapatagan, nagasiling ang Ginoo; kamo nga nagasiling, ‘Sin-o bala ang magadulhog batok sa amon, ukon sin-o bala ang magasulud sa amon mga puluy-an?’

14Ako magasilot sa inyo sono sa bunga sang inyo mga hinimoan, nagasiling ang Ginoo; padabdabon ko ang kalayo sa iya talon, kag lamonon sini ang tanan nga yara sa palibut niya.”

← Chapter 20 Jump to: Chapter 22 →