Jeremiah 28

Ilonggo (Ang Biblia (1982))

← Chapter 27 Jump to: Chapter 29 →

1Sa amo nga tuig, sa pagsugud sang paghari ni Sedequias nga hari sang Juda, sa ikap-at nga tuig sa ikalima nga bulan, si Hananias nga anak ni Azur, ang manalagna nga taga-Gabaon, nagpamolong sa akon sa balay sang Ginoo, sa atubangan sang mga sacerdote kag sang bug-os nga katawohan, nga nagasiling,

2“Amo ini ang ginapamolong sang Ginoo sang mga kasoldadosan, ang Dios sang Israel: Ginbali ko ang gota sang hari sang Babilonia.

3Sa sulud sang bug-os nga duha ka tuig ibalik ko sa sini nga duug ang tanan nga gamit sang balay sang Ginoo, nga ginkuha sa sini nga duug ni Nabucodonosor nga hari sang Babilonia kag gindala sa Babilonia.

4Ibalik ko sa sini nga duug si Jeconias nga anak ni Joaquim, nga hari sang Juda, pati sang tanan nga ginbihag gikan sa Juda nga nagkadto sa Babilonia, nagasiling ang Ginoo, kay balion ko ang gota sang hari sang Babilonia.”

5Niyan si Jeremias nga manalagna nagsiling kay Hananias nga manalagna sa atubangan sang mga sacerdote kag sa atubangan sang bug-os nga katawohan nga nagtindug sa balay sang Ginoo;

6si Jeremias gid nga manalagna nagsiling, “Kabay pa! Himoon ang subong sang Ginoo; tumanon sang Ginoo ang imo mga polong nga gintagna mo, sa pagpabalik sang mga gamit sang balay sang Ginoo, kag sila tanan sang kabihagan gikan sa Babilonia pakadto sini nga duug.

7Wala sing sapayan pamatii karon ini nga polong nga ginapamolong ko sa imo mga idulungug kag sa mga idulungug sang bug-os nga katawohan.

8Ang mga manalagna nga nahauna sa akon kag nahauna sa imo gikan sa dumaan nagtagna batok sa madamu nga mga duta kag batok sa dalagku nga mga ginharian nahanungud sang inaway, sang malaut, kag sang kamatay.

9Ang manalagna nga nagatagna sang paghidait, kon ang polong sang manalagna mahanabu, niyan makilala ang manalagna nga ginpadala sia sing matuud gid sang Ginoo.”

10Niyan ginkuha ni Hananias nga manalagna ang gota sa liog ni Jeremias nga manalagna, kag ginbali ini.

11Kag nagpamolong si Hananias sa atubangan sang bug-os nga katawohan, nga nagasiling, “Amo ini ang ginasiling sang Ginoo: Sa sini gid nga bagay balion ko ang gota ni Nabucodonosor nga hari sang Babilonia sa sulud sang bug-os nga duha ka tuig gikan sa liog sang tanan nga pungsud.” Kag naglakat si Jeremias sa iya dalanon.

12Niyan sang nabali na si Hananias nga manalagna ang gota gikan sa liog ni Jeremias nga manalagna, nag-abut ang polong sang Ginoo kay Jeremias:

13“Lakat, sugiri si Hananias, ‘Amo ini ang ginasiling sang Ginoo: Ginbali mo ang mga gota nga kahoy, apang sa tal-us nila naghimo ka sing mga gota nga salsalon.

14Kay amo ini ang ginasiling sang Ginoo sang mga kasoldadosan, ang Dios sang Israel: Ginbutang ko ang gota nga salsalon sa liog sini tanan nga pungsud agud nga mag-alagad sila kay Nabucodonosor nga hari sang Babilonia, kag magaalagad sila sa iya, kag ginhatag ko man sa iya ang kasapatan sang latagon.’”

15Niyan nagsiling ang manalagna nga si Jeremias kay Hananias nga manalagna, “Pamatii karon, Hananias, ang Ginoo wala magpadala sa imo, kondi ginapasalig mo ini nga katawohan sa butig.

16Busa amo ini ang ginasiling sang Ginoo: ‘Yari karon, sobolon ko ikaw gikan sa kadaygan sang duta. Mapatay ka sa sini nga tuig, bangud nga nagpamolong ka sing pagbato sa Ginoo.’”

17Gani sa amo nga tuig napatay si Hananias sa ikapito nga bulan.

← Chapter 27 Jump to: Chapter 29 →