Ezekiel 1

Lao Bible 2012 (ພຣະຄຳພີສັກສິ)

Jump to: Chapter 2 →

1ເມື່ອວັນທີຫ້າຂອງເດືອນທີສີ່ ໃນປີທີສາມສິບ; ຂ້າພະເຈົ້າຄືປະໂຣຫິດເອເຊກຽນລູກຊາຍຂອງບູຊີ ໄດ້ຢູ່ກັບພວກຢິວທີ່ຖືກຈັບໄປເປັນຊະເລີຍທີ່ແຄມແມ່ນໍ້າເກບາກໃນບາບີໂລນ. ຟ້າສະຫວັນໄດ້ຖືກໄຂອອກ ແລະຂ້າພະເຈົ້າກໍໄດ້ເຫັນນິມິດຂອງພຣະເຈົ້າ.

2ແມ່ນປີທີຫ້າ ນັບແຕ່ກະສັດເຢໂຮຍອາກິນຖືກຈັບໄປເປັນຊະເລີຍໃນຕ່າງຖິ່ນ.

3ທີ່ແຄມແມ່ນໍ້າເກບາກໃນບາບີໂລນນັ້ນ ຂ້າພະເຈົ້າໄດ້ຍິນຖ້ອຍຄຳຂອງພຣະເຈົ້າຢາເວກ່າວແກ່ຂ້າພະເຈົ້າ ແລະຣິດເດດຂອງພຣະເຈົ້າຢາເວກໍໄດ້ຄວບຄຸມຂ້າພະເຈົ້າ.

4ແລ້ວຂ້າພະເຈົ້າກໍເງີຍໜ້າຂຶ້ນ ແລະເຫັນລົມພະຍຸກຳລັງພັດມາແຕ່ທາງທິດເໜືອ. ຟ້າແມບເຫລື້ອມສາດແສງອອກມາຈາກເມກກ້ອນໃຫຍ່ ແລະທ້ອງຟ້າກໍລຸກຂຶ້ນເປັນໄຟອ້ອມຮອບ. ບ່ອນທີ່ມີແສງຟ້າແມບເຫລື້ອມນັ້ນ ມີສິ່ງໜຶ່ງສ່ອງແສງເໝືອນທອງສຳຣິດ.

5ໃນໃຈກາງຂອງພະຍຸນັ້ນ ຂ້າພະເຈົ້າໄດ້ເຫັນຮູບຮ່າງຂອງສິ່ງທີ່ມີຊີວິດສີ່ຕົນ ເບິ່ງເໝືອນຮູບຮ່າງຂອງມະນຸດ

6ແຕ່ລະຕົນນັ້ນ ມີສີ່ໜ້າແລະສີ່ປີກ.

7ຂາພວກມັນຊື່ຕົງແລະຕີນພວກມັນເບິ່ງແລ້ວຄືເລັບງົວເຖິກ ມີມືສ່ອງແສງດັ່ງທອງສຳຣິດ.

8ນອກຈາກໜ້າສີ່ໜ້າແລະປີກສີ່ປີກແລ້ວ ແຕ່ລະຕົນນັ້ນຍັງມີສີ່ມືດັ່ງມືຂອງມະນຸດ ຄືມືແຕ່ລະເບື້ອງຢູ່ລຸ່ມປີກ.

9ປີກສອງປີກຂອງແຕ່ລະຕົນ ພືອອກໄປຈຸກັບປີກຂອງກັນແລະກັນເປັນຮູບສີ່ຫລ່ຽມ. ເມື່ອພວກມັນເຄື່ອນຍ້າຍ ພວກມັນກໍຈະໄປເປັນໝູ່ໂດຍບໍ່ຫັນຕົນຕົວ.

10ແຕ່ລະຕົນນັ້ນມີໜ້າສີ່ໜ້າບໍ່ຄືກັນເຊັ່ນ: ຢູ່ເບື້ອງໜ້າເປັນໜ້າຂອງມະນຸດ, ຢູ່ເບື້ອງຂວາເປັນໜ້າຂອງສິງ ຢູ່ເບື້ອງຊ້າຍເປັນໜ້າຂອງງົວເຖິກ ແລະຢູ່ເບື້ອງຫລັງເປັນໜ້າຂອງນົກອິນຊີ.

11ປີກສອງປີກ ຂອງແຕ່ລະຕົນພືອອກໄປຈຸກັບປາຍປີກຂອງຕົນອື່ນ ແລະສອງປີກອື່ນອີກກໍປົກຫຸ້ມຕົນຕົວໄວ້.

12ແຕ່ລະຕົນໄດ້ຫັນໜ້າໄປສູ່ທິດທັງສີ່. ສະນັ້ນ ພວກມັນຈຶ່ງໄປເປັນໝູ່ສູ່ບ່ອນທີ່ພວກມັນຢາກໄປໄດ້ ໂດຍບໍ່ຕ້ອງຫັນຕົນຕົວ.

13ໃນຫວ່າງກາງ ພວກມັນ ມີສິ່ງໜຶ່ງເບິ່ງຄ້າຍຄືໂຄມໄຟ ເຄື່ອນໄຫວຢູ່ຕະຫລອດເວລາ. ຄັນໄຟລຸກພຸ່ງຂຶ້ນເມື່ອໃດ ຟ້າກໍແມບເຫລື້ອມຂຶ້ນເມື່ອນັ້ນ.

14ພວກມັນກະໂດດໄປມາເອງດ້ວຍຄວາມໄວສຸດຂີດ ເໝືອນດັ່ງຟ້າຜ່າ.

15ໃນຂະນະທີ່ຂ້າພະເຈົ້າຫລຽວເບິ່ງສິ່ງທີ່ມີຊີວິດທັງສີ່ນັ້ນ ຂ້າພະເຈົ້າກໍເຫັນກົງລໍ້ສີ່ອັນ ຈຸພື້ນດິນຢູ່ຂ້າງແຕ່ລະຕົນຂອງພວກມັນ.

16ລໍ້ທັງສີ່ນັ້ນຄືກັນໝົດ ແຕ່ລະອັນສ່ອງແສງເໝືອນດັ່ງເພັດພອຍ ແລະແຕ່ລະລໍ້ກໍມີລໍ້ອີກອັນໜຶ່ງຕັດຜ່ານທາງກາງ

17ເພື່ອວ່າລໍ້ເຫຼົ່ານັ້ນຈະເຄື່ອນຍ້າຍໄປມາໄດ້ໃນທິດທັງສີ່.

18ຂອບວົງລໍ້ມີຕາເຕັມໄປໝົດ.

19ສິ່ງທີ່ມີຊີວິດນັ້ນຍ້າຍໄປເມື່ອໃດ ລໍ້ກໍຍ້າຍໄປນຳເມື່ອນັ້ນ ແລະຖ້າສິ່ງທີ່ມີຊີວິດນັ້ນເຫາະຂຶ້ນຈາກແຜ່ນດິນໄປຍາມໃດ ລໍ້ກໍເຫາະຂຶ້ນນຳຍາມນັ້ນ.

20ເມື່ອສິ່ງທີ່ມີຊີວິດນັ້ນໄປບ່ອນໃດທີ່ມັນຕ້ອງການ ລໍ້ກໍໄປນຳບ່ອນນັ້ນໂລດ ເພາະມັນເປັນຜູ້ຄວບຄຸມລໍ້.

21ສະນັ້ນ ທຸກເທື່ອທີ່ສິ່ງທີ່ມີຊີວິດນັ້ນເຄື່ອນຍ້າຍໄປຫລືຢຸດຢູ່ ຫລືເຫາະຂຶ້ນໃນອາກາດ ລໍ້ນັ້ນກໍເຄື່ອນຍ້າຍໄປນຳທັນທີ.

22ຢູ່ເທິງຫົວສິ່ງທີ່ມີຊີວິດນັ້ນມີສິ່ງໜຶ່ງ ເບິ່ງເໝືອນວົງໂຄ້ງທີ່ເຮັດດ້ວຍແກ້ວຜະລຶກສີສົດໃສ.

23ຢູ່ລຸ່ມວົງໂຄ້ງນັ້ນມີສິ່ງທີ່ມີຊີວິດຢືນຢູ່ ແຕ່ລະຕົນພືປີກສອງປີກອອກໄປຈຸກັບປາຍປີກຂອງຕົນອື່ນ ແລະອີກສອງປີກອື່ນໄດ້ປົກຫຸ້ມຕົວມັນເອງໄວ້.

24ເມື່ອສິ່ງທີ່ມີຊີວິດເຫຼົ່ານັ້ນບິນໄປ ຂ້າພະເຈົ້າກໍໄດ້ຍິນສຽງປີກດັງເໝືອນສຽງຄື້ນຂອງທະເລ, ເໝືອນສຽງຂອງກອງທັບໃຫຍ່ ເໝືອນສຽງຂອງພຣະເຈົ້າອົງຊົງຣິດອຳນາດຍິ່ງໃຫຍ່. ເມື່ອເຊົາບິນ ພວກມັນກໍຫຸບປີກເຂົ້າໄວ້

25ແຕ່ຍັງມີສຽງໜຶ່ງດັງອອກມາຈາກວົງໂຄ້ງຢູ່ເໜືອຫົວຂອງພວກມັນ.

26ຢູ່ເທິງວົງໂຄ້ງນັ້ນມີສິ່ງໜຶ່ງ ເບິ່ງເໝືອນບັນລັງທີ່ເຮັດດ້ວຍແກ້ວມໍຣະກົດ ແລະມີຮູບຮ່າງໜຶ່ງເບິ່ງເໝືອນມະນຸດທີ່ກຳລັງນັ່ງເທິງບັນລັງນັ້ນ.

27ຂ້າພະເຈົ້າໄດ້ເຫັນຮູບຮ່າງນັ້ນເຫລື້ອມຍິບຍັບເໝືອນທອງສຳຣິດຢູ່ໃນໄຟ. ມັນສ່ອງແສງເຫລືອງເຫລື້ອມທົ່ວໄປ

28ຊຶ່ງຢູ່ໃນນັ້ນມີສີສັນຕ່າງໆຂອງຮຸ້ງກິນນໍ້າ. ອັນນີ້ ແມ່ນສະຫງ່າຣາສີທີ່ສຳແດງໃຫ້ຮູ້ວ່າ ພຣະເຈົ້າຢາເວສະຖິດຢູ່ໃນທີ່ນັ້ນ. ເມື່ອຂ້າພະເຈົ້າໄດ້ເຫັນດັ່ງນີ້ແລ້ວຈຶ່ງໝູບໜ້າລົງກັບພື້ນດິນ ແລ້ວຂ້າພະເຈົ້າກໍໄດ້ຍິນສຽງໜຶ່ງກ່າວຈາ.

Jump to: Chapter 2 →