Ezekiel 25

Lao Bible 2012 (ພຣະຄຳພີສັກສິ)

← Chapter 24 Jump to: Chapter 26 →

1ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າກ່າວວ່າ,

2“ມະນຸດເອີຍ ຈົ່ງກ່າວປະນາມຊາວອຳໂມນ.

3ຈົ່ງບອກພວກເຂົາວ່າ, ‘ຈົ່ງຟັງຖ້ອຍຄຳຂອງອົງພຣະຜູ້ເປັນເຈົ້າ ພຣະເຈົ້າກ່າວເທີ້ນ. ອົງພຣະຜູ້ເປັນເຈົ້າ ພຣະເຈົ້າກ່າວວ່າ ພວກເຈົ້າໄດ້ມີຄວາມປິຕິຍິນດີທີ່ເຫັນວິຫານຂອງເຮົາເປັນມົນທິນທີ່ເຫັນດິນແດນຂອງຊາດອິດສະຣາເອນຖືກລ້າງຜານ ແລະທີ່ເຫັນປະຊາຊົນຢູດາຖືກຈັບໄປເປັນຊະເລີຍໃນຕ່າງຖິ່ນ.

4ຍ້ອນພວກເຈົ້າໄດ້ມີຄວາມປິຕິຍິນດີ ເຮົາຈຶ່ງຈະປ່ອຍໃຫ້ເຜົ່າຕ່າງໆ ທາງທິດຕາເວັນອອກຂອງຖິ່ນແຫ້ງແລ້ງກັນດານ ຕີຊະນະພວກເຈົ້າ. ພວກເຂົາຈະຕັ້ງຄ້າຍໃສ່ໃນດິນແດນຂອງພວກເຈົ້າ ແລະຕັ້ງຫຼັກແຫຼ່ງຢູ່ທີ່ນັ້ນ. ພວກເຂົາຈະກິນໝາກໄມ້ ແລະດື່ມນໍ້ານົມທີ່ຄວນເປັນຂອງພວກເຈົ້າ.

5ເຮົາຈະປ່ຽນເມືອງຣັບບາໃຫ້ກາຍເປັນບ່ອນຮັກສາຝູງອູດ ແລະທົ່ວດິນແດນອຳໂມນໃຫ້ກາຍເປັນບ່ອນຮັກສາຝູງແກະ ກໍເພື່ອພວກເຈົ້າຈະໄດ້ຮູ້ວ່າເຮົາແມ່ນພຣະເຈົ້າຢາເວ.

6ຕໍ່ໄປນີ້ແມ່ນສິ່ງທີ່ອົງພຣະຜູ້ເປັນເຈົ້າ ພຣະເຈົ້າກ່າວ: ພວກເຈົ້າໄດ້ຕົບມືແລະເຕັ້ນຢ່າງປິຕິຍິນດີ. ພວກເຈົ້າໄດ້ດູຖູກດິນແດນຂອງຊາດອິດສະຣາເອນ.

7ເພາະພວກເຈົ້າໄດ້ເຮັດເຊັ່ນນັ້ນ ເຮົາຈະມອບພວກເຈົ້າໃຫ້ແກ່ຊົນຊາດອື່ນ ທີ່ຈະມາລັກແລະປຸ້ນພວກເຈົ້າ. ເຮົາຈະທຳລາຍພວກເຈົ້າໃຫ້ຈົນກ້ຽງ ເພື່ອພວກເຈົ້າຈະບໍ່ໄດ້ເປັນຊົນຊາດໜຶ່ງອີກຕໍ່ໄປ ຫລືມີດິນແດນເປັນຂອງຕົນເອງ. ແລ້ວພວກເຈົ້າກໍຈະໄດ້ຮູ້ວ່າເຮົາແມ່ນພຣະເຈົ້າຢາເວ.”’

8ອົງພຣະຜູ້ເປັນເຈົ້າ ພຣະເຈົ້າໄດ້ກ່າວວ່າ, “ເພາະດິນແດນໂມອາບ ໄດ້ກ່າວວ່າ, ຢູດາຍເປັນດັ່ງຊົນຊາດອື່ນໆທັງໝົດ

9ເຮົາຈະປະໃຫ້ເມືອງທັງຫລາຍທີ່ປ້ອງກັນຊາຍແດນຂອງໂມອາບ ຖືກໂຈມຕີລວມທັງເມືອງທີ່ສວຍງາມດ້ວຍ ເຊັ່ນ: ເບັດເຢຊີໂມດ, ບາອານເມໂອນ ແລະກີຣິອາດທາອິມ.

10ເຮົາຈະປ່ອຍໃຫ້ເຜົ່າທາງທິດຕາເວັນອອກຂອງຖິ່ນແຫ້ງແລ້ງກັນດານ ຕີຊະນະໂມອາບ, ພ້ອມດ້ວຍອຳໂມນ, ເພື່ອວ່າໂມອາບ ຈະບໍ່ເປັນປະເທດໜຶ່ງອີກຕໍ່ໄປ.

11ເຮົາຈະລົງໂທດໂມອາບ ແລະພວກເຂົາກໍຈະໄດ້ຮູ້ວ່າເຮົາແມ່ນພຣະເຈົ້າຢາເວ.”

12ອົງພຣະຜູ້ເປັນເຈົ້າ ພຣະເຈົ້າໄດ້ກ່າວວ່າ, “ປະຊາຊົນເອໂດມໄດ້ທຳການແກ້ແຄ້ນຢູດາຍຢ່າງໂຫດຫ້ຽມ ແລະການແກ້ແຄ້ນນີ້ໄດ້ນຳຄວາມຜິດມາໃຫ້ເອໂດມ ເປັນເວລາອັນຢຶດເຍື້ອຍາວນານ.

13ບັດນີ້ ອົງພຣະຜູ້ເປັນເຈົ້າ ພຣະເຈົ້າປະກາດວ່າ ເຮົາຈະລົງໂທດເອໂດມ ແລະຂ້າທຸກຄົນແລະສັດທຸກໂຕຢູ່ໃນທີ່ນັ້ນ. ຕັ້ງແຕ່ເມືອງເຕມານ ຫາເມືອງເດດານ ເຮົາຈະເຮັດໃຫ້ເປັນບ່ອນຮົກຮ້າງຫວ່າງເປົ່າ ແລະປະຊາຊົນກໍຈະຖືກຂ້າໃນສະໜາມຮົບ.

14ຊາດອິດສະຣາເອນປະຊາຊົນຂອງເຮົາ ຈະແກ້ແຄ້ນດິນແດນເອໂດມໃຫ້ເຮົາ; ແລະພວກເຂົາຈະເຮັດໃຫ້ເອໂດມໄດ້ຊີມຣິດແຫ່ງຄວາມໂກດຮ້າຍອັນຫ້ຽມໂຫດຂອງເຮົາ. ເອໂດມຈະຮູ້ວ່າການຕົກເປັນເປົ້າແຫ່ງການແກ້ແຄ້ນຂອງເຮົານັ້ນ ໝາຍຄວາມວ່າຢ່າງໃດ.” ອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້ແຫຼະ.

15ອົງພຣະຜູ້ເປັນເຈົ້າ ພຣະເຈົ້າກ່າວວ່າ, “ຊາວຟີລິດສະຕິນໄດ້ແກ້ແຄ້ນຢ່າງໂຫດຫ້ຽມເຫຼົ່າສັດຕູແຕ່ກ່ອນກີ້ຂອງຕົນ ແລະໄດ້ທຳລາຍພວກເຂົາດ້ວຍຄວາມກຽດຊັງ.

16ເພາະສະນັ້ນ ອົງພຣະຜູ້ເປັນເຈົ້າ ພຣະເຈົ້າຈຶ່ງກຳລັງປະກາດວ່າເຮົາຈະໂຈມຕີຊາວຟີລິດສະຕິນ ແລະກວາດລ້າງພວກເກເຣັດໃຫ້ໝົດໄປ. ເຮົາຈະທຳລາຍທຸກຄົນທີ່ເຫຼືອຢູ່ໃນທົ່ງພຽງຟີລິດສະຕິນ.

17ເຮົາຈະລົງໂທດພວກເຂົາຢ່າງໜັກ ແລະຈະແກ້ແຄ້ນພວກເຂົາຢ່າງເຕັມທີ່. ແລ້ວພວກເຂົາກໍຈະໄດ້ຮູ້ວ່າເຮົາແມ່ນພຣະເຈົ້າຢາເວ.”

← Chapter 24 Jump to: Chapter 26 →