Ezekiel 31

Lao Bible 2012 (ພຣະຄຳພີສັກສິ)

← Chapter 30 Jump to: Chapter 32 →

1ໃນວັນທີໜຶ່ງຂອງເດືອນທີສາມ ອັນກົງກັບປີທີສິບເອັດ ແຫ່ງການເປັນຊະເລີຍໃນຕ່າງຖິ່ນຂອງພວກເຮົານັ້ນ ຖ້ອຍຄຳຊອງພຣະເຈົ້າຢາເວໄດ້ມາເຖິງຂ້າພະເຈົ້າກ່າວວ່າ,

2“ມະນຸດເອີຍ ຈົ່ງບອກກະສັດແຫ່ງເອຢິບແລະປະຊາຊົນທັງໝົດຂອງລາວວ່າ ເຈົ້ານັ້ນມີອຳນາດສໍ່າໃດກັນນໍ ເຮົາຈະປຽບເຈົ້າໃສ່ຫຍັງຈຶ່ງຈະເໝາະໄດ້?

3ເຈົ້ານັ້ນເປັນດັ່ງ ຕົ້ນແປກທີ່ເລບານອນ ມີງ່າໃບດົກງາມເປັນຕົ້ນໄມ້ສູງຈົນວ່າຈຸເມກ.

4ບ່ອນນັ້ນມີນໍ້າທີ່ເຮັດໃຫ້ມັນເຕີບໃຫຍ່ຂຶ້ນມາ ມີລຳນໍ້າຕ່າງໆທີ່ພື້ນດິນຄອຍລໍ່ລ້ຽງ. ມັນໃຫ້ຄວາມຊຸ່ມຊື່ນບ່ອນທີ່ຕົ້ນໄມ້ໃຫຍ່ຂຶ້ນມາ ແລະລໍ່ລ້ຽງຕົ້ນໄມ້ທຸກຕົ້ນໃນປ່າ.

5ມັນສູງກວ່າຕົ້ນໄມ້ອື່ນໆ ເພາະມີນໍ້າລໍ່ລ້ຽງຢ່າງດີ ຕົ້ນໄມ້ນັ້ນຕ່າງກໍມີງ່າທັງໃຫຍ່ແລະຍາວດ້ວຍ;

6ນົກທຸກຊະນິດຕ່າງກໍໄດ້ເຮັດເຮືອນຮັງ ໃສ່ເທິງງ່າທັງຫລາຍຂອງຕົ້ນໄມ້ນັ້ນ; ສັດປ່າທັງຫລາຍໄດ້ເກີດລູກໃນທີ່ກຳບັງຂອງມັນ ຊົນຊາດໃນໂລກພັກຜ່ອນຢູ່ໃຕ້ຮົ່ມຂອງມັນດ້ວຍ.

7ມັນແມ່ນຕົ້ນໄມ້ທີ່ສວຍສົດງົດງາມຫລາຍ ລຳຕົ້ນສູງດີແລະງ່າທັງຫລາຍກໍຍາວດ້ວຍ. ຮາກທັງຫລາຍຕ່າງກໍຢັ່ງລົງເລິກສູ່ພື້ນດິນ ບ່ອນທີ່ມີລຳທານໄຫລລິນບໍ່ຂາດ.

8ໃນສວນຂອງພຣະເຈົ້າບໍ່ມີຕົ້ນແປກໃດຈະປຽບທັນ ບໍ່ມີຕົ້ນແປກເທດໃດ ເຄີຍມີງ່າຍາວເຊັ່ນນີ້ ແລະບໍ່ມີກົກໂພໃດ ທີ່ມີກິ່ງກ້ານເຊັ່ນນີ້ເລີຍ ແມ່ນແຕ່ຕົ້ນໄມ້ໃນສວນຂອງພຣະເຈົ້າກໍບໍ່ງາມເທົ່າ.

9ເຮົາໄດ້ເຮັດໃຫ້ມັນງາມຂຶ້ນທັງມີງ່າແພ່ໄປ ຕົ້ນໄມ້ທຸກຕົ້ນໃນເອເດນສວນຂອງພຣະເຈົ້າກໍອິດສາມັນ.

10ເພາະສະນັ້ນ ອົງພຣະຜູ້ເປັນເຈົ້າ ພຣະເຈົ້າຈຶ່ງບອກເຈົ້າ ເຖິງສິ່ງທີ່ກຳລັງຈະເກີດຂຶ້ນກັບຕົ້ນໄມ້ທີ່ສູງຈົນຈຸເມກນັ້ນ. ມັນສູງຫລາຍເທົ່າໃດ ມັນກໍອວດອົ່ງທະນົງຕົວຫລາຍເທົ່ານັ້ນ;

11ສະນັ້ນ ເຮົາຈຶ່ງໄດ້ປະຖິ້ມມັນ ແລະປ່ອຍໃຫ້ຜູ້ປົກຄອງຊາວຕ່າງດ້າວເອົາມັນໄປ. ຜູ້ປົກຄອງຈະໃຫ້ຕົ້ນໄມ້ນັ້ນໄດ້ຮັບຕາມຄວາມຊົ່ວຊ້າທີ່ມັນໄດ້ເຮັດ.

12ຊາວຕ່າງດ້າວຜູ້ທີ່ໂຫດຫ້ຽມຈະປໍ້າມັນລົງ ແລະປະມັນໄວ້. ງ່າແລະກິ່ງກ້ານຕ່າງໆຂອງມັນຈະຕົກລົງໃສ່ພູທຸກໜ່ວຍ ແລະຮ່ອມພູທຸກບ່ອນໃນປະເທດ. ບັນດາຊົນຊາດທັງໝົດທີ່ອາໄສຮົ່ມຂອງມັນນັ້ນຈະໜີໄປໝົດ.

13ຝູງນົກຈະມາງອຍຢູ່ເທິງຕົ້ນໄມ້ທີ່ຕາຍນັ້ນ ແລະຝູງສັດປ່າກໍຈະຢຽບງ່າຂອງມັນໄປ.

14ເພາະສະນັ້ນ ແຕ່ນີ້ໄປຈະບໍ່ມີຕົ້ນໄມ້ໃດໆ ບໍ່ວ່າຈະມີນໍ້າລໍ່ລ້ຽງດີປານໃດກໍຕາມ ມີຍອດຢຽດສູງຈົນຈຸເມກ ຫລືຈະໃຫຍ່ ແລະສູງຂຶ້ນເຊັ່ນນີ້ອີກ. ພວກມັນທັງໝົດຈະຕາຍເພາະເຄາະກຳຢ່າງມະນຸດທຳມະດາ ຄືໄດ້ຮັບເຄາະກຳເພື່ອຈະລົງໄປຮ່ວມກັບພວກທີ່ຢູ່ແດນມໍຣະນາ.

15ອົງພຣະຜູ້ເປັນເຈົ້າ ພຣະເຈົ້າກ່າວວ່າ, ໃນມື້ທີ່ຕົ້ນໄມ້ນັ້ນໄດ້ລົງໄປສູ່ແດນມໍຣະນາ ເຮົາຈະເຮັດໃຫ້ລຳນໍ້າຕ່າງໆໃຕ້ພື້ນດິນ ປົກຄຸມມັນເພື່ອເປັນການໄວ້ທຸກໃຫ້. ເຮົາຈະໃຫ້ແມ່ນໍ້າທັງຫລາຍຢຸດໄຫລ ແລະລຳນໍ້າຫລາຍສາຍກໍຈະບໍ່ຫລັ່ງໄຫລອອກ. ເພາະຕົ້ນໄມ້ນັ້ນໄດ້ຕາຍສາແລ້ວ; ສະນັ້ນ ເຮົາຈຶ່ງຈະນຳເອົາຄວາມມືດມາທີ່ເທິງພູເຂົາຂອງເລບານອນ ແລະເຮັດໃຫ້ຕົ້ນໄມ້ທັງໝົດໃນປ່າຫ່ຽວແຫ້ງໄປ.

16ເມື່ອເຮົາສົ່ງມັນລົງໄປສູ່ແດນມໍຣະນານັ້ນ ສຽງແຫ່ງການລົ້ມລົງຂອງມັນຈະເຮັດໃຫ້ຫລາຍຊາດສັ່ນສະເທືອນ. ຕົ້ນໄມ້ທຸກຕົ້ນໃນສວນເອເດນແລະຕົ້ນໄມ້ທີ່ຖືກເລືອກຢ່າງດີທີ່ສຸດ ຄືຕົ້ນໄມ້ທີ່ມີນໍ້າລໍ່ລ້ຽງຢ່າງດີຂອງເລບານອນ ກໍຈະພໍໃຈໃນການລົ້ມລົງຂອງມັນ.

17ພວກມັນຈະລົງໄປສູ່ແດນມໍຣະນາຮ່ວມກັບພວກທີ່ໄດ້ລົ້ມລົງ. ແລ້ວທຸກຄົນທີ່ອາໄສຢູ່ໃຕ້ຮົ່ມກໍຈະຖືກກະຈັດກະຈາຍໄປ ໃນທ່າມກາງຊົນຊາດຕ່າງໆ.

18ຕົ້ນໄມ້ນັ້ນແມ່ນກະສັດແຫ່ງເອຢິບແລະປະຊາຊົນທັງໝົດຂອງລາວ. ບໍ່ມີຕົ້ນໄມ້ກົກໃດໃນສວນເອເດນຈະສູງ ແລະປະທັບໃຈເທົ່າກັບມັນ. ແຕ່ບັດນີ້ ມັນຈະລົງໄປສູ່ແດນມໍຣະນາດັ່ງຕົ້ນໄມ້ຕ່າງໆໃນສວນເອເດນຮ່ວມກັບພວກທີ່ບໍ່ນັບຖືພຣະເຈົ້າ ແລະພວກທີ່ໄດ້ຖືກຂ້າໃນສະໜາມຮົບ.” ອົງພຣະຜູ້ເປັນເຈົ້າ ພຣະເຈົ້າກ່າວດັ່ງນັ້ນແຫຼະ.

← Chapter 30 Jump to: Chapter 32 →