Ezekiel 40 — Lao Bible 2012 (ພຣະຄຳພີສັກສິ)

1ໃນວັນທີສິບຂອງເດືອນຂຶ້ນປີໃໝ່ ຊຶ່ງເປັນປີທີຊາວຫ້າ ຫລັງຈາກທີ່ພວກເຮົາໄດ້ຕົກເປັນຊະເລີຍໃນຕ່າງຖິ່ນ ອັນກົງກັບປີທີຊາວສີ່ຫລັງຈາກທີ່ນະຄອນເຢຣູຊາເລັມຖືກຢຶດໄດ້. ໃນມື້ນັ້ນ ຣິດອຳນາດຂອງພຣະເຈົ້າຢາເວໄດ້ເຂົ້າຄວບຄຸມຂ້າພະເຈົ້າ ແລະພຣະອົງໄດ້ນຳຂ້າພະເຈົ້າໄປ.

2ໃນນິມິດນັ້ນ ພຣະເຈົ້າໄດ້ນຳຂ້າພະເຈົ້າໄປທີ່ດິນແດນອິດສະຣາເອນ ແລະວາງຂ້າພະເຈົ້າໄວ້ເທິງພູສູງແຫ່ງໜຶ່ງ. ຂ້າພະເຈົ້າໄດ້ເຫັນອາຄານຈຸ້ມໜຶ່ງ ຢູ່ເບື້ອງໜ້າຂ້າພະເຈົ້າ ຊຶ່ງເປັນດັ່ງເມືອງໜຶ່ງ.

3ພຣະອົງໄດ້ນຳຂ້າພະເຈົ້າເຂົ້າໄປໃກ້ໆ ແລະຂ້າພະເຈົ້າກໍໄດ້ເຫັນຊາຍຜູ້ໜຶ່ງເຫລືອງເຫລື້ອມດັ່ງທອງສຳຣິດ. ເພິ່ນຢືນຢູ່ທາງປະຕູເຂົ້າ ຖືເຊືອກແທກທີ່ເຮັດດ້ວຍຜ້າປ່ານແລະມີໄມ້ແທກ.

4ຊາຍຜູ້ນັ້ນໄດ້ກ່າວແກ່ຂ້າພະເຈົ້າວ່າ, “ມະນຸດເອີຍ ຈົ່ງເຝົ້າເບິ່ງເຖີດ. ຈົ່ງຕັ້ງໃຈຟັງແລະເອົາໃຈໃສ່ຕໍ່ທຸກໆສິ່ງທີ່ເຮົາສຳແດງໃຫ້ເຈົ້າເຫັນ; ດ້ວຍເຫດນີ້ແຫຼະ ເຈົ້າຈຶ່ງຖືກນຳມາທີ່ນີ້. ເຈົ້າຈະຕ້ອງໄປບອກປະຊາຊົນອິດສະຣາເອນໃຫ້ຮູ້ທຸກໆສິ່ງທີ່ເຈົ້າເຫັນນີ້.”

5ສິ່ງທີ່ຂ້າພະເຈົ້າໄດ້ເຫັນນັ້ນແມ່ນພຣະວິຫານ ແລະມີກຳແພງອ້ອມຮອບ. ຊາຍຜູ້ນັ້ນໄດ້ໃຊ້ໄມ້ແທກ ຊຶ່ງຍາວສາມແມັດ ແລະແທກກຳແພງ. ກຳແພງນັ້ນສູງສາມແມັດ ແລະໜາສາມແມັດ.

6ແລ້ວເພິ່ນກໍໄປທີ່ປະຕູທາງດ້ານທິດຕາເວັນອອກ. ເພິ່ນຍ່າງຂຶ້ນຂັ້ນໄດໄປ ແລະທີ່ເທິງຈອມນັ້ນເພິ່ນແທກທາງເຂົ້າ; ທາງເຂົ້ານັ້ນເລິກໄດ້ສາມແມັດ.

7ເລີຍປະຕູໄປແມ່ນທາງຍ່າງ ຊຶ່ງມີຫ້ອງເຝົ້າຍາມສາມຫ້ອງຢູ່ແຕ່ລະດ້ານ. ແຕ່ລະຫ້ອງມີສາມແມັດທຸກຂ້າງ ແລະກຳແພງຂັ້ນລະຫວ່າງຫ້ອງນັ້ນໜາສອງແມັດເຄິ່ງ. ເລີຍຫ້ອງເຝົ້າຍາມໄປແມ່ນທາງຍ່າງຍາວສາມແມັດ ທີ່ນຳໄປສູ່ຫ້ອງໂຖງ ຊຶ່ງກົງກັບພຣະວິຫານ. ເພິ່ນແທກຫ້ອງນີ້ ແລະເຫັນວ່າເລິກສີ່ແມັດ. ສຸດຫ້ອງນີ້ແມ່ນທາງຍ່າງ ຊຶ່ງໃກ້ກັບພຣະວິຫານທີ່ສຸດ ແລະກຳແພງຕ່າງໆທີ່ຢູ່ໄກສຸດໜາໄດ້ໜຶ່ງແມັດ. (ຫ້ອງເຝົ້າຍາມເຫຼົ່ານີ້ແຕ່ລະຂ້າງທາງຍ່າງມີຂະໜາດເທົ່າກັນ ແລະກຳແພງລະຫວ່າງແຕ່ລະຫ້ອງກໍມີຄວາມໜາເທົ່າກັນ.)

11ຕໍ່ມາ ຊາຍຜູ້ນັ້ນໄດ້ແທກຄວາມກວ້າງຂອງທາງຍ່າງທາງປະຕູເຂົ້າ. ມັນແທກໄດ້ຫົກແມັດເຄິ່ງ ແລະລະຫວ່າງປະຕູທີ່ໄຂຢູ່ນັ້ນແທກໄດ້ຫ້າແມັດ.

12ຕໍ່ໜ້າຂອງແຕ່ລະຫ້ອງເຝົ້າຍາມມີກຳແພງຕໍ່າໆ ສູງຫ້າສິບເຊັນ ແລະໜາຫ້າສິບເຊັນຄືກັນ. (ຫ້ອງເຝົ້າຍາມນັ້ນມີສາມແມັດທຸກດ້ານ.)

13ແລ້ວເພິ່ນກໍແທກໄລຍະທາງຈາກຫລັງກຳແພງຫ້ອງໜຶ່ງ ເຖິງຫລັງກຳແພງຫ້ອງທາງຍ່າງຂ້າມ ແລະແທກໄດ້ສິບສອງແມັດເຄິ່ງ.

14ຄືຫ້ອງທີ່ໄກສຸດນຳອອກໄປສູ່ເດີ່ນ. ເພິ່ນແທກຫ້ອງນັ້ນ ແລະທາງກວ້າງແທກໄດ້ສິບແມັດ.

15ລວງຍາວທັງໝົດຂອງທາງຍ່າງ ຕັ້ງແຕ່ກຳແພງນອກຂອງປະຕູເຂົ້າຈົນໄປເຖິງສົ້ນສຸດຂອງຫ້ອງສຸດທ້າຍ ແທກໄດ້ຊາວຫ້າແມັດ.

16ທີ່ກຳແພງຂ້າງນອກຂອງທຸກໆຫ້ອງ ແລະກຳແພງຂ້າງໃນ ລະຫວ່າງແຕ່ລະຫ້ອງມີປ່ອງນ້ອຍ. ຕາມກຳແພງຂ້າງໃນທີ່ກົງກັບທາງຍ່າງນັ້ນ ໄດ້ຖືກແກະສະຫລັກເປັນຮູບຕົ້ນຕານ.

17ຊາຍຄົນນັ້ນໄດ້ນຳຂ້າພະເຈົ້າຜ່ານປະຕູໄປສູ່ເດີ່ນ. ໃນທີ່ນັ້ນ ມີສາມສິບຫ້ອງທີ່ໄດ້ສ້າງຕິດກັບກຳແພງດ້ານນອກ ແລະເບື້ອງໜ້າຂອງຫ້ອງເຫຼົ່ານີ້ມີພື້ນທີ່ປູດ້ວຍຫີນ

18ຊຶ່ງຍາວອອກໄປອ້ອມເດີ່ນ. ເດີ່ນທາງດ້ານນອກນີ້ຢູ່ຕາມບ່ອນທີ່ມີລະດັບຕໍ່າກວ່າເດີ່ນຂ້າງໃນ.

19ຢູ່ທີ່ນັ້ນ ມີປະຕູໃນບ່ອນທີ່ມີລະດັບສູງ ຊຶ່ງນຳໄປສູ່ເດີ່ນທາງດ້ານໃນ. ຊາຍຜູ້ນັ້ນໄດ້ແທກໄລຍະທາງລະຫວ່າງປະຕູທັງສອງ ຈຶ່ງແທກໄດ້ຫ້າສິບແມັດ.

20ແລ້ວຊາຍຜູ້ນັ້ນກໍໄດ້ແທກປະຕູທາງດ້ານເໜືອ ຊຶ່ງນຳເຂົ້າໄປສູ່ເດີ່ນທາງດ້ານນອກ.

21ຫ້ອງເຝົ້າຍາມສາມຫ້ອງທີ່ຢູ່ແຕ່ລະຟາກຂອງທາງຍ່າງນັ້ນ ກຳແພງທີ່ຂັ້ນລະຫວ່າງຫ້ອງກັບຫ້ອງໂຖງ ທັງໝົດແທກໄດ້ຂະໜາດດຽວກັນກັບທາງໄປສູ່ປະຕູດ້ານຕາເວັນອອກ. ຄວາມຍາວທັງໝົດຂອງປະຕູແທກໄດ້ຊາວຫ້າແມັດ ແລະທາງກວ້າງທັງໝົດແທກໄດ້ສິບສອງແມັດເຄິ່ງ.

22ຫ້ອງໂຖງ, ປ່ອງຢ້ຽມ ແລະຮູບແກະສະຫລັກຂອງຕົ້ນຕານ ລ້ວນແຕ່ຄືກັນກັບທາງປະຕູດ້ານທິດຕາເວັນອອກ. ໃນທີ່ນີ້ມີຂັ້ນໄດເຈັດຂັ້ນທີ່ນຳໄປສູ່ປະຕູ ແລະສົ້ນສຸດຂອງຫ້ອງໂຖງນັ້ນກົງກັນກັບເດີ່ນ.

23ຈາກປະຕູທາງດ້ານເໜືອນີ້ ຂ້າມເດີ່ນໄປແມ່ນປະຕູອື່ນໆອີກທີ່ນຳໄປສູ່ເດີ່ນຂ້າງໃນ ຄືກັບທາງທິດຕາເວັນອອກທຸກຢ່າງ. ຊາຍຄົນນັ້ນໄດ້ແທກໄລຍະທາງ ລະຫວ່າງສອງປະຕູນັ້ນຈຶ່ງມີຢູ່ຫ້າສິບແມັດ.

24ຕໍ່ມາ ຊາຍຄົນນັ້ນໄດ້ນຳຂ້າພະເຈົ້າໄປທາງດ້ານໃຕ້ ແລະໃນທີ່ນັ້ນຂ້າພະເຈົ້າໄດ້ເຫັນປະຕູອື່ນອີກ. ເພິ່ນໄດ້ແທກປະຕູນັ້ນ ແລະມີຂະໜາດດຽວກັນກັບປະຕູອື່ນໆ.

25ໃນຫ້ອງຕ່າງໆຕາມທາງໄປສູ່ປະຕູມີປ່ອງຢ້ຽມດັ່ງບ່ອນອື່ນໆ. ລວງຍາວທັງໝົດຂອງປະຕູນີ້ມີຊາວຫ້າແມັດ ແລະລວງກວ້າງມີສິບສອງແມັດເຄິ່ງ.

26ມີຂັ້ນໄດເຈັດຂັ້ນທີ່ນຳຂຶ້ນໄປສູ່ທີ່ນັ້ນ ແລະສົ້ນສຸດຂອງຫ້ອງໂຖງກໍນຳອອກໄປສູ່ເດີ່ນ. ທີ່ນັ້ນມີຮູບຕົ້ນຕານ ທີ່ໄດ້ຖືກແກະສະຫລັກໄວ້ຕາມກຳແພງທາງດ້ານໃນ ຊຶ່ງກົງກັນກັບທາງຍ່າງ.

27ໃນທີ່ນີ້ກໍຄືກັນ ມີປະຕູທີ່ນຳອອກໄປສູ່ເດີ່ນທາງດ້ານໃນ. ຊາຍຄົນນັ້ນໄດ້ແທກໄລຍະທາງໄປເຖິງປະຕູທີສອງນີ້ມີຢູ່ຫ້າສິບແມັດ.

28ຊາຍຄົນນັ້ນໄດ້ນຳຂ້າພະເຈົ້າຜ່ານໄປທາງປະຕູດ້ານໃຕ້ສູ່ເດີ່ນດ້ານໃນ. ເພິ່ນໄດ້ແທກປະຕູ ແລະມີຂະໜາດດຽວກັນກັບປະຕູຕ່າງໆ ໃນກຳແພງທາງດ້ານນອກ.

29ຫ້ອງເຝົ້າຍາມ, ຫ້ອງໂຖງ ແລະກຳແພງທາງດ້ານໃນກໍມີຂະໜາດດຽວກັນກັບທີ່ທາງປະຕູດ້ານອື່ນ. ຕາມຫ້ອງຕ່າງໆຂອງປະຕູນີ້ມີປ່ອງຢ້ຽມຄືກັນ. ລວງຍາວທັງໝົດມີຊາວຫ້າແມັດ ແລະລວງກວ້າງມີສິບສອງແມັດເຄິ່ງ.

31ສ່ວນຫ້ອງໂຖງນັ້ນແມ່ນຢູ່ກົງກັນກັບເດີ່ນອື່ນໆ ແລະຮູບຕົ້ນຕານກໍໄດ້ຖືກແກະສະຫລັກໄວ້ຕາມຝາລຽບຕາມທາງຍ່າງ. ມີຂັ້ນໄດແປດຂັ້ນທີ່ນຳຂຶ້ນໄປສູ່ປະຕູນີ້.

32ຊາຍຄົນນັ້ນໄດ້ນຳຂ້າພະເຈົ້າຜ່ານໄປທີ່ປະຕູທາງທິດຕາເວັນອອກ ສູ່ເດີ່ນດ້ານໃນ. ເພິ່ນໄດ້ແທກປະຕູ ແລະມີຂະໜາດດຽວກັນກັບປະຕູອື່ນໆ.

33ຫ້ອງເຝົ້າຍາມ, ຫ້ອງໂຖງ ແລະກຳແພງທາງດ້ານໃນ ມີຂະໜາດດຽວກັນກັບທີ່ທາງປະຕູດ້ານອື່ນ. ມີປ່ອງຢ້ຽມອ້ອມຮອບ ແລະໃນຫ້ອງໂຖງກໍຄືກັນ. ລວງຍາວທັງໝົດມີຊາວຫ້າແມັດ ແລະລວງກວ້າງທັງໝົດມີສິບສອງແມັດເຄິ່ງ.

34ຫ້ອງໂຖງຢູ່ກົງກັນກັບເດີ່ນທາງດ້ານນອກ. ຮູບຕົ້ນຕານໄດ້ຖືກແກະສະຫລັກໄວ້ຕາມຝາລຽບຕາມທາງຍ່າງ. ມີຂັ້ນໄດແປດຂັ້ນທີ່ນຳຂຶ້ນໄປສູ່ປະຕູນີ້.

35ແລ້ວຊາຍຄົນນັ້ນກໍນຳຂ້າພະເຈົ້າໄປທີ່ປະຕູດ້ານເໜືອ. ເພິ່ນໄດ້ແທກປະຕູນັ້ນ ແລະມີຂະໜາດດຽວກັນກັບປະຕູດ້ານອື່ນໆ.

36ເຊັ່ນດຽວກັນ ດ້ານນີ້ມີຫ້ອງເຝົ້າຍາມຄືກັນ ຊຶ່ງຖືກຕົບແຕ່ງທີ່ຝາທາງດ້ານໃນ, ມີຫ້ອງໂຖງ ແລະມີປ່ອງຢ້ຽມອ້ອມ ຄືລວງຍາວທັງໝົດມີຊາວຫ້າແມັດ ແລະລວງກວ້າງມີສິບສອງແມັດເຄິ່ງ.

37ຫ້ອງໂຖງ ຢູ່ກົງກັນກັບເດີ່ນທາງດ້ານນອກ. ຮູບຕົ້ນຕານໄດ້ຖືກແກະສະຫລັກໄວ້ຕາມຝາລຽບຕາມທາງຍ່າງ. ມີຂັ້ນໄດແປດຂັ້ນທີ່ນຳຂຶ້ນໄປສູ່ປະຕູນີ້.

38ທີ່ເດີ່ນດ້ານນອກນັ້ນ ແມ່ນຫ້ອງທີ່ຕໍ່ໄປສູ່ປະຕູດ້ານໃນທາງດ້ານເໜືອ. ປະຕູນີ້ໄຂໄປສູ່ຫ້ອງໂຖງຊຶ່ງຢູ່ກົງກັນກັບເດີ່ນ ແລະໃນທີ່ນັ້ນ ພວກເຂົາໄດ້ລ້າງຊາກສັດທີ່ຈະເຜົາເປັນເຄື່ອງບູຊາ.

39ໃນຫ້ອງໂຖງນີ້ມີໂຕະສີ່ໜ່ວຍ ຄືຂ້າງລະສອງໜ່ວຍ. ແມ່ນເທິງໂຕະເຫຼົ່ານີ້ ທີ່ພວກເຂົາໄດ້ຂ້າສັດຕ່າງໆເພື່ອເປັນເຄື່ອງເຜົາຖວາຍບູຊາ ບໍ່ວ່າເຜົາສັດທັງໂຕຖວາຍບູຊາ ຫລືຖວາຍບູຊາເພື່ອລຶບລ້າງບາບ ຫລືຖວາຍບູຊາເພື່ອຊົດໃຊ້ແທນຄືນ.

40ດ້ານນອກຫ້ອງນີ້ມີໂຕະສີ່ໜ່ວຍຄ້າຍຄືກັນ ຄືສອງໜ່ວຍຕັ້ງຢູ່ທາງຟາກໜຶ່ງຂອງປະຕູເຂົ້າດ້ານເໜືອ ແລະສອງໜ່ວຍຕັ້ງຢູ່ອີກຟາກໜຶ່ງ.

41ທັງໝົດລວມກັນມີໂຕະແປດໜ່ວຍທີ່ໃຊ້ຂ້າສັດເພື່ອຖວາຍບູຊາ ຄືສີ່ໜ່ວຍຢູ່ໃນຫ້ອງ ແລະອີກສີ່ໜ່ວຍຢູ່ທີ່ເດີ່ນ.

42ໂຕະສີ່ໜ່ວຍທາງດ້ານນອກຕໍ່ອອກໄປ ຊຶ່ງໃຊ້ຈັດແຈງເຜົາສັດທັງໂຕເພື່ອຖວາຍບູຊານັ້ນ ແມ່ນໃຊ້ຫີນທີ່ສະກັດແລ້ວເຮັດ. ໂຕະເຫຼົ່ານັ້ນສູງຫ້າສິບເຊັນ ພື້ນຂອງໂຕະເປັນຮູບສີ່ຫລ່ຽມມົນທົນ ຍາວຂ້າງລະເຈັດສິບຫ້າເຊັນ. ເຄື່ອງມືທັງໝົດທີ່ໃຊ້ໃນການຂ້າສັດຖວາຍບູຊາ ປະໄວ້ທີ່ເທິງໂຕະເຫຼົ່ານີ້.

43ວົງຮອບຂອງຂອບໂຕະນັ້ນໄດ້ເຮັດເປັນຊັ້ນກວ້າງເຈັດເຊັນເຄິ່ງ. ຊີ້ນສັດທີ່ຈະຖວາຍບູຊານັ້ນ ພວກເຂົາໄດ້ວາງໄວ້ທີ່ເທິງໂຕະ.

44ແລ້ວເພິ່ນກໍນຳຂ້າພະເຈົ້າເຂົ້າໄປໃນເດີ່ນດ້ານໃນ. ໃນເດີ່ນດ້ານໃນນີ້ມີສອງຫ້ອງທີ່ໄຂໄວ້ ຫ້ອງໜຶ່ງຢູ່ກົງກັບດ້ານໃຕ້ຢູ່ໃກ້ໆກັບປະຕູທາງທິດເໜືອ ແລະມີຫ້ອງອື່ນອີກ ຊຶ່ງຢູ່ກົງກັບດ້ານເໜືອໃກ້ໆກັບປະຕູທາງດ້ານໃຕ້.

45ຊາຍຄົນນັ້ນໄດ້ບອກຂ້າພະເຈົ້າວ່າ, “ຫ້ອງທີ່ຢູ່ກົງກັບທາງທິດໃຕ້ນັ້ນ ແມ່ນໄວ້ໃຫ້ບັນດາປະໂຣຫິດທີ່ໄດ້ຮັບໃຊ້ໃນພຣະວິຫານ

46ແລະຫ້ອງທີ່ຢູ່ກົງກັບທິດເໜືອແມ່ນໄວ້ໃຫ້ພວກປະໂຣຫິດ ທີ່ໄດ້ຮັບໃຊ້ທີ່ແທ່ນບູຊາ. ພວກປະໂຣຫິດລ້ວນແຕ່ໄດ້ສືບເຊື້ອສາຍມາຈາກຊາດົກ; ມີແຕ່ພວກເຂົາເທົ່ານັ້ນ ຄືສະມາຊິກຂອງເຜົ່າເລວີ ທີ່ໄດ້ຮັບອະນຸຍາດໃຫ້ເຂົ້າໄປໃກ້ພຣະເຈົ້າຢາເວເພື່ອຮັບໃຊ້ພຣະອົງ.”

47ຊາຍຄົນນັ້ນໄດ້ແທກເດີ່ນທາງດ້ານໃນ ຊຶ່ງເປັນຮູບສີ່ຫລ່ຽມມົນທົນ ແຕ່ລະຂ້າງມີຫ້າສິບແມັດ. ສ່ວນພຣະວິຫານນັ້ນຢູ່ທາງດ້ານຕາເວັນຕົກ ແລະຢູ່ຕໍ່ໜ້າຂອງພຣະວິຫານມີແທ່ນບູຊາແທ່ນໜຶ່ງ.

48ແລ້ວເພິ່ນກໍນຳຂ້າພະເຈົ້າເຂົ້າໄປສູ່ຫ້ອງ ຊຶ່ງເປັນທາງເຂົ້າຂອງພຣະວິຫານ. ເພິ່ນແທກທາງເຂົ້າພຣະວິຫານໄດ້ດັ່ງນີ້: ເລິກສອງແມັດເຄິ່ງແລະກວ້າງເຈັດແມັດ ມີຝາໜາແມັດເຄິ່ງທັງສອງດ້ານ.

49ມີຂັ້ນໄດນຳຂຶ້ນໄປສູ່ຫ້ອງປະຕູເຂົ້າ ຊຶ່ງກວ້າງສິບແມັດ ແລະເລິກຫົກແມັດ. ທີ່ທາງເຂົ້າມີເສົາສອງຕົ້ນຊຶ່ງຕັ້ງຢູ່ຂ້າງລະເສົາ.