Ezekiel 18

Lao Bible 2012 (ພຣະຄຳພີສັກສິ)

← Chapter 17 Jump to: Chapter 19 →

1ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າ

2ວ່າ, “ສຸພາສິດທີ່ຄົນມັກເວົ້າກັນໃນດິນແດນແຫ່ງຊາດອິດສະຣາເອນນີ້ ມີຄວາມໝາຍວ່າຢ່າງໃດ? ‘ພໍ່ແມ່ກິນໝາກອະງຸ່ນສົ້ມ ແຕ່ລູກຊໍ້າພັດເຂັດແຂ້ວນຳ.”’

3ອົງພຣະຜູ້ເປັນເຈົ້າ ພຣະເຈົ້າກ່າວວ່າ, “ເຮົາມີຊີວິດຢູ່ຢ່າງແນ່ແທ້ສັນໃດ ເຈົ້າຈະບໍ່ໄດ້ເວົ້າຊໍ້າສຸພາສິດນີ້ໃນຊາດອິດສະຣາເອນອີກຕໍ່ໄປ.

4ຊີວິດແຕ່ລະບຸກຄົນຂຶ້ນຢູ່ກັບເຮົາ ຄືຊີວິດຜູ້ເປັນພໍ່ແມ່ ກໍເໝືອນກັນກັບຊີວິດຂອງຜູ້ເປັນລູກ. ບຸກຄົນໃດທີ່ເຮັດບາບ ບຸກຄົນນັ້ນແຫຼະທີ່ສົມຄວນຈະຕ້ອງຕາຍ.

5ຖ້າວ່າມີຄົນດີທີ່ສັດຊື່ ແລະຊອບທຳແທ້ໆຈັກຄົນໜຶ່ງ.

6ລາວບໍ່ໄດ້ຂາບໄຫວ້ບັນດາຮູບເຄົາຣົບຂອງຊາວອິດສະຣາເອນ ຫລືບໍ່ກິນເຄື່ອງທີ່ໄດ້ບູຊາໃນບ່ອນສັກສິດທີ່ໄດ້ຫວງຫ້າມ. ລາວບໍ່ໄດ້ລໍ້ລວງຫລີ້ນເມຍຂອງຄົນອື່ນ ຫລືສົມສູ່ກັບຍິງທີ່ກຳລັງເປັນປະຈຳເດືອນ.

7ລາວບໍ່ສໍ້ໂກງຫລືບໍ່ປຸ້ນເຈົ້າເອົາຂອງຜູ້ໃດ. ລາວຄືນຂອງທີ່ລູກໜີ້ເອົາມາຈຳນຳ; ລາວລ້ຽງຄົນທີ່ອຶດຫິວ ແລະໃຫ້ເຄື່ອງນຸ່ງຫົ່ມແກ່ຄົນທີ່ຂາດເຂີນ.

8ລາວໃຫ້ຄົນຢືມເງິນໂດຍບໍ່ຄິດດອກເບ້ຍ. ລາວບໍ່ຍອມປະພຶດຕົນຢ່າງບໍ່ເປັນທຳ, ແຕ່ກັບໃຫ້ຄວາມເປັນທຳແກ່ຜູ້ທີ່ເປັນຄວາມ.

9ຄົນເຊັ່ນນີ້ ເຊື່ອຟັງຂໍ້ຄຳສັ່ງຂອງເຮົາ ແລະຢຶດຖືບັນດາກົດບັນຍັດຂອງເຮົາຢ່າງເອົາໃຈໃສ່. ລາວເປັນຄົນຊອບທຳແລະຈະມີຊີວິດຢູ່.” ອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້ແຫຼະ.

10“ແລ້ວຖ້າວ່າຊາຍຜູ້ນີ້ມີລູກຊາຍຄົນໜຶ່ງ ທີ່ມັກປຸ້ນ ແລະຂ້າເຈົ້າເອົາຂອງ ຄືຜູ້ທີ່ເຮັດສິ່ງທັງໝົດເຫຼົ່ານີ້

11ທີ່ພໍ່ຂອງຕົນບໍ່ເຄີຍເຮັດມາກ່ອນ. ລາວກິນເຄື່ອງບູຊາໃນບ່ອນສັກສິດທີ່ໄດ້ຫວງຫ້າມ ແລະລໍ້ລວງຫລີ້ນເມຍຂອງຄົນອື່ນ.

12ລາວສໍ້ໂກງຄົນຍາກຈົນ, ລາວປຸ້ນເຈົ້າເອົາຂອງ ແລະບໍ່ຄືນຂອງທີ່ລູກໜີ້ເອົາມາຈຳນຳ. ລາວຂາບໄຫວ້ບັນດາຮູບເຄົາຣົບອັນໜ້າກຽດຊັງຢູ່ໃນບ່ອນສັກສິດຂອງຄົນຕ່າງຊາດ

13ແລະໃຫ້ຄົນຢືມເງິນໂດຍຄິດດອກເບ້ຍ. ລາວຈະມີຊີວິດຢູ່ບໍ? ບໍ່ແມ່ນດອກ ລາວຈະບໍ່ມີຊີວິດຢູ່. ລາວເຮັດແຕ່ສິ່ງທີ່ໜ້າກຽດຊັງ; ສະນັ້ນ ລາວຈະຕ້ອງຕາຍ. ລາວຈະຕ້ອງຮັບຜິດຊອບຕໍ່ການຕາຍເອົາເອງ.

14ບັດນີ້ ຖ້າວ່າຊາຍຜູ້ທີສອງນີ້ມີລູກຊາຍຢູ່ຄົນໜຶ່ງ. ລູກຊາຍຜູ້ນີ້ເຫັນບາບທັງໝົດທີ່ພໍ່ຂອງຕົນໄດ້ເຮັດ ແຕ່ລາວບໍ່ໄດ້ເຮັດຕາມແບບຢ່າງຂອງພໍ່.

15ລາວບໍ່ໄດ້ຂາບໄຫວ້ບັນດາຮູບເຄົາຣົບຂອງຊາວອິດສະຣາເອນ ຫລືກິນເຄື່ອງບູຊາໃນບ່ອນສັກສິດທີ່ໄດ້ຫວງຫ້າມ. ລາວບໍ່ໄດ້ລໍ້ລວງຫລີ້ນເມຍຂອງຄົນອື່ນ

16ຫລືຂົ່ມເຫັງ ຫລືປຸ້ນເຈົ້າເອົາຂອງຜູ້ໃດ. ລາວສົ່ງຄືນຂອງທີ່ລູກໜີ້ເອົາມາຈຳນຳ. ລາວລ້ຽງຄົນທີ່ອຶດຫິວ ແລະໃຫ້ເຄື່ອງນຸ່ງຫົ່ມແກ່ຄົນທີ່ຂັດສົນ.

17ລາວບໍ່ຍອມເຮັດຊົ່ວ ແລະໃຫ້ຄົນຢືມເງິນໂດຍບໍ່ຄິດດອກເບ້ຍ. ລາວຢຶດຖືບັນດາກົດບັນຍັດຂອງເຮົາ ແລະເຊື່ອຟັງຂໍ້ຄຳສັ່ງຂອງເຮົາ. ລາວຈະບໍ່ຕາຍເພາະບາບຂອງພໍ່ລາວ ແຕ່ລາວຈະມີຊີວິດຢູ່ຢ່າງແນ່ນອນ.

18ພໍ່ຂອງລາວຕ່າງຫາກທີ່ໄດ້ສໍ້ໂກງ ແລະໄດ້ປຸ້ນເຈົ້າເອົາຂອງ ແລະເຮັດຊົ່ວໃຫ້ແກ່ທຸກຄົນ. ສະນັ້ນ ລາວຈຶ່ງຕາຍເພາະບາບທີ່ຕົນໄດ້ເຮັດນັ້ນ.

19ແຕ່ຖ້າເຈົ້າຖາມວ່າ, ‘ເປັນຫຍັງລູກຊາຍຈຶ່ງບໍ່ໄດ້ຮັບໂທດກຳ ເພາະບາບຂອງຜູ້ເປັນພໍ່?’ ຄຳຕອບກໍຄືລູກຊາຍໄດ້ເຮັດສິ່ງທີ່ດີແລະຖືກຕ້ອງ. ລາວໄດ້ຮັກສາກົດບັນຍັດຂອງເຮົາ ແລະປະຕິບັດຕາມກົດບັນຍັດນັ້ນຢ່າງລະມັດລະວັງ; ສະນັ້ນ ລາວຈຶ່ງຈະມີຊີວິດຢູ່ຢ່າງແນ່ນອນ.

20ຜູ້ທີ່ເຮັດບາບຄືຜູ້ທີ່ຈະຕ້ອງຕາຍ. ລູກຊາຍບໍ່ຕ້ອງຮັບໂທດກຳເພາະພໍ່ຂອງຕົນໄດ້ເຮັດບາບ; ຫລືພໍ່ບໍ່ຕ້ອງຮັບໂທດກຳເພາະລູກຂອງຕົນໄດ້ເຮັດບາບ. ຄົນຊອບທຳຈະໄດ້ຮັບບຳເໜັດສຳລັບການດີທີ່ຕົນໄດ້ເຮັດ ແລະຄົນຊົ່ວກໍຈະໄດ້ຮັບໂທດກຳສຳລັບການຊົ່ວທີ່ຕົນໄດ້ເຮັດ.

21ຖ້າຄົນຊົ່ວຜູ້ໜຶ່ງເຊົາເຮັດບາບ ແລະຖ້າລາວຢຶດຖືບັນດາກົດບັນຍັດຂອງເຮົາ ຄືເຮັດໃນສິ່ງທີ່ດີ ແລະຖືກຕ້ອງ ລາວກໍຈະບໍ່ຕາຍ; ແຕ່ລາວຈະມີຊີວິດຢູ່ຢ່າງແນ່ນອນ.

22ບາບທັງໝົດຂອງລາວຈະໄດ້ຮັບການອະໄພ ແລະລາວຈະມີຊີວິດຢູ່ ເພາະລາວໄດ້ເຮັດໃນສິ່ງທີ່ຖືກຕ້ອງ.”

23ອົງພຣະຜູ້ເປັນເຈົ້າ ພຣະເຈົ້າຖາມວ່າ, “ເຈົ້າຄິດວ່າເຮົາດີໃຈບໍທີ່ເຫັນຄົນບາບຜູ້ໜຶ່ງຕາຍໄປ? ບໍ່ແມ່ນດອກ ເຮົາຈະດີໃຈຫລາຍກວ່າ ທີ່ເຫັນຄົນບາບຜູ້ໜຶ່ງກັບໃຈແລະມີຊີວິດຢູ່.

24ແຕ່ຖ້າຄົນຊອບທຳຜູ້ໜຶ່ງເຊົາເຮັດການດີ ແລະເລີ່ມເຮັດແຕ່ການຊົ່ວ ຄືເຮັດແຕ່ສິ່ງອັນໜ້າກຽດຊັງທີ່ຄົນຊົ່ວເຮັດ ລາວຈະມີຊີວິດຢູ່ບໍ? ບໍ່ແມ່ນດອກ ການດີທີ່ລາວໄດ້ເຮັດມານັ້ນ ຈະບໍ່ມີຜູ້ໃດລະນຶກເຖິງເລີຍ. ລາວຈະຕາຍ ເພາະຄວາມບໍ່ສັດຊື່ແລະການບາບທີ່ລາວໄດ້ເຮັດ.

25ແຕ່ເຈົ້າເວົ້າວ່າ, ‘ສິ່ງທີ່ພຣະເຈົ້າຢາເວເຮັດນັ້ນ ແມ່ນບໍ່ຖືກຕ້ອງ.’ ຊາວອິດສະຣາເອນເອີຍ ຈົ່ງຟັງເຮົາເທີ້ນ ພວກເຈົ້າຄິດວ່າວິທີການທີ່ເຮົາເຮັດບໍ່ຖືກຕ້ອງບໍ? ວິທີການຂອງພວກເຈົ້ານັ້ນແຫຼະບໍ່ຖືກຕ້ອງ.

26ເມື່ອຄົນຊອບທຳຜູ້ໜຶ່ງເຊົາເຮັດດີ ແລະເລີ່ມເຮັດຊົ່ວແລ້ວຕາຍໄປ ລາວຕາຍເພາະຄວາມຊົ່ວທີ່ລາວໄດ້ເຮັດນັ້ນ.

27ເມື່ອຄົນຊົ່ວຜູ້ໜຶ່ງເຊົາເຮັດບາບແລະເຮັດສິ່ງທີ່ດີແລະຖືກຕ້ອງ ລາວກໍຊ່ວຍຊີວິດຂອງຕົນໃຫ້ພົ້ນ.

28ລາວສຳນຶກໄດ້ເຖິງສິ່ງທີ່ຕົນກຳລັງເຮັດ ແລະລາວກໍເຊົາເຮັດບາບ; ສະນັ້ນ ລາວຈຶ່ງຈະບໍ່ຕາຍແຕ່ຈະມີຊີວິດຢູ່ຢ່າງແນ່ນອນ.

29ແຕ່ພວກເຈົ້າ ຊາວອິດສະຣາເອນພັດເວົ້າວ່າ, ‘ສິ່ງທີ່ອົງພຣະຜູ້ເປັນເຈົ້າເຮັດນັ້ນບໍ່ຖືກຕ້ອງ.’ ພວກເຈົ້າຄິດວ່າວິທີທາງຂອງເຮົາບໍ່ຖືກຕ້ອງບໍ? ວິທີທາງຂອງພວກເຈົ້ານັ້ນແຫຼະບໍ່ຖືກຕ້ອງ.

30ແຕ່ບັດນີ້ ອົງພຣະຜູ້ເປັນເຈົ້າ ພຣະເຈົ້າ ກຳລັງບອກຊາວອິດສະຣາເອນວ່າ, ເຮົາຈະຕັດສິນພວກເຈົ້າແຕ່ລະຄົນຕາມການກະທຳຂອງພວກເຈົ້າ. ຈົ່ງຫັນໜີຈາກການຊົ່ວຊ້າທັງໝົດທີ່ພວກເຈົ້າກຳລັງເຮັດນັ້ນສາ ແລະຢ່າປ່ອຍໃຫ້ການບາບທີ່ພວກເຈົ້າເຮັດຢູ່ນັ້ນທຳລາຍພວກເຈົ້າ.

31ຈົ່ງເລີກເຮັດການຊົ່ວທັງໝົດທີ່ພວກເຈົ້າກຳລັງດຳເນີນຢູ່ນັ້ນສາ ແລະຈົ່ງຕັ້ງຄວາມຄິດໃໝ່ແລະເອົາຈິດໃຈໃໝ່. ເປັນຫຍັງຊາວອິດສະຣາເອນ ພວກເຈົ້າຈຶ່ງຢາກຕາຍ?

32ເຮົາບໍ່ຕ້ອງການໃຫ້ຜູ້ໃດຜູ້ໜຶ່ງຕາຍ. ອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້: ຈົ່ງປະຖິ້ມການບາບທັງຫລາຍຂອງພວກເຈົ້າສາ ແລະມີຊີວິດຢູ່ເຖີດ.”

← Chapter 17 Jump to: Chapter 19 →