Ezekiel 38

Lao Bible 2012 (ພຣະຄຳພີສັກສິ)

← Chapter 37 Jump to: Chapter 39 →

1ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າກ່າວວ່າ,

2“ມະນຸດເອີຍ ຈົ່ງປະນາມເຈົ້າໂກກ ນາຍຜູ້ປົກຄອງຊົນຊາດເມເຊັກແລະຕູບານ ຢູ່ໃນດິນແດນຂອງມາໂກກ.

3ຈົ່ງທຳນວາຍຕໍ່ສູ້ລາວ ແລະກ່າວວ່າ, ‘ອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້ວ່າ: ເຮົາເປັນສັດຕູຂອງເຈົ້າ.

4ເຮົາຈະປິ່ນເຈົ້າກັບຄືນແລະເອົາເບັດເກາະທີ່ຄາງກະໄຕ ແລະລາກເຈົ້າໃຫ້ໜີໄປພ້ອມກັບກອງທັບ. ກອງທັບຂອງເຈົ້າປະກອບດ້ວຍຝູງມ້າແລະທະຫານມ້າທີ່ສວມເຄື່ອງແບບ; ພວກເຂົາມີຈຳນວນຫລວງຫລາຍ ແລະທະຫານແຕ່ລະຄົນກໍຖືໂລ້ແລະດາບ.

5ຊາຍສະກັນຈາກເປີເຊຍ, ເອທີໂອເປຍ ແລະລີເບຍກໍມາກັບເຈົ້າ ແລະທຸກຄົນກໍຖືໂລ້ແລະໝວກເຫລັກທັງນັ້ນ.

6ນັກຮົບທຸກຄົນຈາກດິນແດນໂກເມແລະເບັດໂຕກາມາທາງທິດເໜືອ ກໍມາກັບເຈົ້າຕະຫລອດທັງຊົນຊາດອື່ນໆດ້ວຍ.

7ຈົ່ງຕຽມຕົວ ແລະຕຽມກອງທັບໃຫ້ພ້ອມເຮັດຕາມຄຳສັ່ງຂອງເຈົ້າ.

8ຫລັງຈາກນັ້ນມາຫລາຍປີ ເຮົາຈະສັ່ງໃຫ້ເຈົ້າຮຸກຮານປະເທດໜຶ່ງ ຊຶ່ງປະຊາຊົນໄດ້ຖືກນຳຄືນມາແຕ່ປະເທດຕ່າງໆ ແລະໃຊ້ຊີວິດຢູ່ໂດຍບໍ່ຢ້ານກົວສົງຄາມ. ເຈົ້າຈະຮຸກຮານພູຕ່າງໆຂອງອິດສະຣາເອນ ທີ່ໄດ້ຖືກປະຖິ້ມໃຫ້ຮົກຮ້າງຫວ່າງເປົ່າມານານແລ້ວ; ແຕ່ບັດນີ້ ເປັນບ່ອນທີ່ປະຊາຊົນທຸກຄົນອາໄສຢູ່ຢ່າງປອດໄພ.

9ເຈົ້າກັບກອງທັບຂອງເຈົ້າຕະຫລອດທັງບັນດາຊົນຊາດທີ່ໄດ້ມາກັບເຈົ້ານັ້ນ ຈະໂຈມຕີດັ່ງພະຍຸຮ້າຍ ແລະຄວບຄຸມດິນແດນດັ່ງກ້ອນເມກ.”’

10ອົງພຣະຜູ້ເປັນເຈົ້າ ພຣະເຈົ້າກ່າວວ່າ, “ເມື່ອເວລານັ້ນມາເຖິງ ເຈົ້າຈະເລີ່ມຄິດແຜນການອັນຊົ່ວຮ້າຍ.

11ເຈົ້າຈະຕັດສິນໃຈຮຸກຮານປະເທດທີ່ຂາດບ່ອນເພິ່ງ ຊຶ່ງປະຊາຊົນຢູ່ຢ່າງສັນຕິສຸກແລະປອດໄພໃນເມືອງ ທີ່ບໍ່ມີກຳແພງອ້ອມແລະຂາດການປ້ອງກັນ.

12ເຈົ້າຈະປຸ້ນຈີ້ປະຊາຊົນທີ່ອາໄສຢູ່ໃນເມືອງຕ່າງໆ ຊຶ່ງຄັ້ງໜຶ່ງ ເຄີຍຮົກຮ້າງເພພັງ. ພວກເຂົາໄດ້ມາຈາກຊົນຊາດຕ່າງໆເພື່ອເຕົ້າໂຮມກັນ; ບັດນີ້ ປະຊາຊົນເຫຼົ່ານັ້ນໄດ້ມີຝູງສັດແລະຊັບສົມບັດ ແລະທັງຕັ້ງຢູ່ທີ່ສີ່ແຍກຂອງໂລກດ້ວຍ.

13ປະຊາຊົນເຊບາ ແລະຊາວເດດານ ຕະຫລອດທັງພວກພໍ່ຄ້າຈາກເມືອງຕ່າງໆຂອງສະເປນ ຈະຖາມເຈົ້າວ່າ, ‘ເຈົ້າໄດ້ທ້ອນໂຮມທະຫານໄວ້ເພື່ອປຸ້ນຈີ້ບໍ? ເຈົ້າຕັ້ງໃຈຈະເອົາເງິນແລະຄຳ, ຝູງງົວກັບຊັບສິນ ແລະຍົກທັບໜີໄປພ້ອມກັບສິ່ງທີ່ເຈົ້າປຸ້ນຈີ້ໄດ້ນັ້ນບໍ?”’

14ສະນັ້ນ ມະນຸດເອີຍ ຈົ່ງທຳນວາຍແລະບອກເຈົ້າໂກກ ວ່າດັ່ງນີ້: “ອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້: ໃນຂະນະທີ່ປະຊາຊົນອິດສະຣາເອນຂອງເຮົາຢູ່ຢ່າງປອດໄພ ເຈົ້າຈະຍົກອອກມາ

15ຈາກທີ່ຂອງເຈົ້າທາງທິດເໜືອສຸດ ໂດຍນຳກອງທັບອັນໃຫຍ່ໂຕ ທັງມີອຳນາດຈາກຫລາຍປະເທດ ຊຶ່ງລ້ວນແຕ່ເປັນທະຫານມ້າທັງນັ້ນ.

16ເຈົ້າຈະໂຈມຕີປະຊາຊົນອິດສະຣາເອນຂອງເຮົາ ເໝືອນດັ່ງກ້ອນເມກໄຫລຂ້າມດິນແດນໄປ. ເມື່ອເວລານັ້ນມາເຖິງ ເຮົາຈະໃຊ້ເຈົ້າໃຫ້ຮຸກຮານດິນແດນຂອງເຮົາ ເພື່ອສະແດງໃຫ້ຊົນຊາດທັງຫລາຍຮູ້ວ່າເຮົາເປັນຜູ້ໃດ ທັງໝົດນັ້ນແມ່ນເພື່ອສະແດງຄວາມບໍຣິສຸດຂອງເຮົາ ໂດຍສິ່ງທີ່ເຮົາເຮັດຜ່ານທາງເຈົ້າ.

17ອົງພຣະຜູ້ເປັນເຈົ້າ ພຣະເຈົ້າກ່າວວ່າ ເຈົ້າແມ່ນຜູ້ທີ່ເຮົາໄດ້ກ່າວເຖິງແຕ່ດົນນານມາແລ້ວ ເມື່ອເຮົາໄດ້ປະກາດຜ່ານທາງບັນດາຜູ້ຮັບໃຊ້ຂອງເຮົາ ຄືຜູ້ທຳນວາຍຂອງອິດສະຣາເອນ ວ່າໃນມື້ທີ່ຈະມາເຖິງນັ້ນ ເຮົາຈະນຳຜູ້ໃດຜູ້ໜຶ່ງມາໂຈມຕີຊາດອິດສະຣາເອນ.”

18ອົງພຣະຜູ້ເປັນເຈົ້າ ພຣະເຈົ້າກ່າວວ່າ, “ໃນມື້ທີ່ໂກກຮຸກຮານອິດສະຣາເອນນັ້ນ ເຮົາຈະໂກດເຄືອງໃຈຫລາຍ.

19ເຮົາຂໍປະກາດດ້ວຍຄວາມໂກດຮ້າຍອັນຮຸນແຮງວ່າ ໃນມື້ນັ້ນຈະເກີດແຜ່ນດິນໄຫວຢ່າງໜັກໃນດິນແດນອິດສະຣາເອນ.

20ປາແລະນົກທຸກໂຕຕະຫລອດທັງສັດໃຫຍ່ນ້ອຍ ແລະມະນຸດທຸກຄົນທີ່ຢູ່ເທິງແຜ່ນດິນໂລກນີ້ຈະຢ້ານເຮົາຈົນຕົວສັ່ນເຊັນ. ພູເຂົາທັງຫລາຍຈະເຈື່ອນລົງ, ໜ້າຜາຈະແຕກເປັນເສດເລັກເສດນ້ອຍ ແລະກຳແພງທຸກໆແຫ່ງຈະພັງທະລາຍລົງ.

21ເຮົາຈະເຮັດໃຫ້ໂກກສະທ້ານຢ້ານກົວດ້ວຍໄພພິບັດນາໆປະການ. ອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້ແຫຼະ. ທະຫານຂອງລາວຈະໃຊ້ດາບຫັນມາຕໍ່ສູ້ຊຶ່ງກັນແລະກັນ.

22ເຮົາຈະລົງໂທດລາວດ້ວຍການເຈັບໄຂ້ໄດ້ປ່ວຍ ແລະຈະໃຫ້ເລືອດນອງແຜ່ນດິນ. ພະຍຸຝົນແລະໝາກເຫັບພ້ອມທັງໄຟກັບມາດ ຈະຕົກລົງຖືກລາວ ແລະກອງທັບຕະຫລອດຊົນຊາດທັງຫລາຍທີ່ຢູ່ຝ່າຍລາວດ້ວຍ.

23ດັ່ງນັ້ນ ເຮົາຈະສຳແດງໃຫ້ຊົນຊາດທັງໝົດເຫັນວ່າ ເຮົາຍິ່ງໃຫຍ່ ແລະບໍຣິສຸດ. ແລ້ວພວກເຂົາກໍຈະຮູ້ວ່າເຮົາແມ່ນພຣະເຈົ້າຢາເວ.”

← Chapter 37 Jump to: Chapter 39 →