Ezekiel 36

Lao Bible 2012 (ພຣະຄຳພີສັກສິ)

← Chapter 35 Jump to: Chapter 37 →

1ອົງພຣະຜູ້ເປັນເຈົ້າໄດ້ສັ່ງວ່າ, “ມະນຸດເອີຍ ເຈົ້າຈົ່ງກ່າວແກ່ພູທັງຫລາຍຂອງຊາດອິດສະຣາເອນ ແລະບອກໃຫ້ເຊື່ອຟັງຖ້ອຍຄຳຂອງພຣະເຈົ້າຢາເວ

2ອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້ວ່າ: ເຫຼົ່າສັດຕູໄດ້ສົມນໍ້າໜ້າຊາດອິດສະຣາເອນໂດຍເວົ້າວ່າ, ‘ບັດນີ້ ທີ່ສູງອັນເກົ່າແກ່ຕ່າງໆນັ້ນເປັນຂອງພວກເຮົາສາແລ້ວ.’

3ແລ້ວເຈົ້າຈົ່ງປະກາດ ແລະບອກໃນສິ່ງທີ່ອົງພຣະຜູ້ເປັນເຈົ້າ ພຣະເຈົ້າກຳລັງກ່າວ. ເມື່ອຊົນຊາດໃກ້ຄຽງທັງຫລາຍໄດ້ຢຶດ ແລະປຸ້ນຈີ້ພູຕ່າງໆຂອງຊາດອິດສະຣາເອນນັ້ນ ທຸກຄົນໄດ້ຫົວເຍາະເຍີ້ຍຊາດອິດສະຣາເອນ.

4ດັ່ງນັ້ນ ພູຕ່າງໆຂອງຊາດອິດສະຣາເອນ ຈົ່ງຟັງຖ້ອຍຄຳທີ່ອົງພຣະຜູ້ເປັນເຈົ້າ ພຣະເຈົ້າກ່າວເຖີດ ອົງພຣະຜູ້ເປັນເຈົ້າ ພຣະເຈົ້າກ່າວວ່າ: ພູເຂົາຕ່າງໆ ແລະເນີນພູຕ່າງໆ, ຫ້ວຍນໍ້າແລະຮ່ອມພູທັງຫຼາຍ ບ່ອນທີ່ຖືກປະປ່ອຍໃຫ້ຮົກຮ້າງເປົ່າປ່ຽວ ແລະເມືອງຮົກຮ້າງຫວ່າງເປົ່າທີ່ຖືກປຸ້ນ ແລະຖືກຫຍໍ້ຫຍັນຈາກທຸກຊົນຊາດທີ່ຢູ່ອ້ອມແອ້ມ.

5ອົງພຣະຜູ້ເປັນເຈົ້າ ພຣະເຈົ້າໄດ້ກ່າວອອກໄປ ດ້ວຍຄວາມໂກດຮ້າຍອັນຮ້ອນແຮງຕໍ່ສູ້ຊົນຊາດທີ່ຢູ່ອ້ອມແອ້ມ ແລະສະເພາະຢ່າງຍິ່ງແລ້ວຕໍ່ສູ້ເອໂດມ. ດ້ວຍຄວາມຍິນດີ ແລະການຫຍໍ້ຫຍັນ ພວກເຂົາໄດ້ຢຶດຄອງດິນແດນແລະໄດ້ຄອບຄອງທົ່ງຫຍ້າໃນດິນແດນນັ້ນ.

6ສະນັ້ນ ເຈົ້າຈົ່ງທຳນວາຍແກ່ດິນແດນອິດສະຣາເອນ; ຈົ່ງບອກພູເຂົາຕ່າງໆ, ເນີນພູຕ່າງໆ, ຫ້ວຍນໍ້າ ແລະຮ່ອມພູທັງຫຼາຍ ສິ່ງທີ່ອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້: ດ້ວຍຄວາມໂກດຮ້າຍອັນຫວງແຫນ ຍ້ອນວິທີທີ່ຊົນຊາດທັງຫລາຍໄດ້ດູໝິ່ນປະໝາດ ແລະເຮັດໃຫ້ພວກເຂົາອັບອາຍຂາຍໜ້າ.

7ເພາະສະນັ້ນ ອົງພຣະຜູ້ເປັນເຈົ້າ ພຣະເຈົ້າສັນຍາຢ່າງໜັກແໜ້ນວ່າ ຊົນຊາດທີ່ອ້ອມແອ້ມນັ້ນຈະໄດ້ຮັບຄວາມອັບອາຍຂາຍໜ້າ.

8ແຕ່ຕາມເທິງພູທັງຫລາຍຂອງຊາດອິດສະຣາເອນ ຕົ້ນໄມ້ທັງຫລາຍຈະມີໃບອີກ ແລະຈະເກີດໝາກໃຫ້ພວກເຈົ້າ ປະຊາຊົນອິດສະຣາເອນຂອງເຮົາເອີຍ. ພວກເຈົ້າຈະໄດ້ກັບຄືນມາສູ່ເຮືອນໃນບໍ່ຊ້ານີ້.

9ເຮົາຢູ່ຝ່າຍເຈົ້າແລະເຮົາຈະເຮັດໃຫ້ແນ່ໃຈວ່າ ດິນແດນຂອງພວກເຈົ້າຈະມີການຄາດໄຖ ແລະການປູກຝັງອີກ.

10ເຮົາຈະເຮັດໃຫ້ປະຊາຊົນຂອງເຈົ້າເພີ່ມຂຶ້ນ. ເຈົ້າຈະອາໄສຢູ່ໃນເມືອງຕ່າງໆ ແລະສ້າງທຸກສິ່ງທີ່ໄດ້ຖືກປະໃຫ້ຮົກຮ້າງເພພັງນັ້ນຂຶ້ນໃໝ່.

11ເຮົາຈະໃຫ້ປະຊາຊົນ ແລະຝູງສັດເພີ່ມຂຶ້ນຈຳນວນຫລວງຫລາຍ. ພວກເຈົ້າຈະມີຄົນຫລາຍກວ່າແຕ່ກ່ອນ ແລະພວກເຈົ້າກໍຈະມີລູກຫລາຍຄົນ. ເຮົາຈະໃຫ້ພວກເຈົ້າອາໄສຢູ່ທີ່ນັ້ນ ດັ່ງທີ່ພວກເຈົ້າເຄີຍໄດ້ຢູ່ມາກ່ອນ ແລະເຮົາຈະເຮັດໃຫ້ພວກເຈົ້າຈະເລີນຮຸ່ງເຮືອງຂຶ້ນຫລາຍກວ່າເກົ່າອີກ. ແລ້ວພວກເຈົ້າກໍຈະຮູ້ວ່າເຮົາແມ່ນພຣະເຈົ້າຢາເວ.

12ປະຊາຊົນອິດສະຣາເອນຂອງເຮົາເອີຍ ເຮົາຈະນຳພວກເຈົ້າກັບມາສູ່ດິນແດນອີກ. ດິນແດນນີ້ຈະເປັນຂອງພວກເຈົ້າເອງ ແລະຈະບໍ່ປ່ອຍໃຫ້ລູກຂອງພວກເຈົ້າອຶດຕາຍອີກຈັກເທື່ອ.

13ອົງພຣະຜູ້ເປັນເຈົ້າ ພຣະເຈົ້າກ່າວວ່າ: ມັນເປັນຄວາມຈິງທີ່ປະຊາຊົນເອີ້ນດິນແດນນັ້ນເປັນມະນຸດກິນຄົນ ແລະພວກເຂົາເວົ້າວ່າ, ມັນປຸ້ນກິນຊາດທີ່ເປັນຂອງລູກພວກຕົນ.

14ແຕ່ຕໍ່ນີ້ໄປ ດິນແດນຈະບໍ່ກິນພົນລະເມືອງຂອງຕົນອີກຕໍ່ໄປ ຄືຜູ້ທີ່ປຸ້ນເອົາບັນດາເດັກນ້ອຍໄປຈາກຊາດຂອງຕົນ. ອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້ແຫຼະ.

15ດິນແດນຈະບໍ່ຟັງສຽງຊົນຊາດທັງຫລາຍທີ່ຫຍໍ້ຫຍັນ ຫລືເຫັນປະຊາຊົນທັງປວງຫົວເຍາະເຍີ້ຍໃສ່ຕົນອີກຕໍ່ໄປ. ດິນແດນຈະບໍ່ສັງຫານພວກເດັກນ້ອຍຂອງຕົນອີກຕໍ່ໄປ.” ອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້ແຫຼະ.

16ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າກ່າວວ່າ,

17“ມະນຸດເອີຍ ເມື່ອຊາວອິດສະຣາເອນໄດ້ອາໄສຢູ່ໃນດິນແດນຂອງພວກເຂົາແລ້ວ ຄວາມປະພຶດ ແລະການກະທຳຂອງພວກເຂົາກໍຍັງເປັນມົນທິນຢູ່. ສຳລັບເຮົາແລ້ວ ຄວາມປະພຶດຂອງພວກເຂົາຍັງເປັນມົນທິນ ເໝືອນຜູ້ຍິງເປັນປະຈຳເດືອນ.

18ພວກເຂົາໄດ້ເຮັດໃຫ້ດິນແດນເປັນມົນທິນ ໂດຍການຄາດຕະກຳຕ່າງໆ ຊຶ່ງພວກເຂົາໄດ້ກໍ່ຂຶ້ນ ແລະໂດຍການຂາບໄຫວ້ຮູບເຄົາຣົບອັນໜ້າກຽດຊັງ. ສະນັ້ນ ເຮົາຈຶ່ງປ່ອຍໃຫ້ພວກເຂົາໄດ້ຊີມຣິດແຫ່ງຄວາມໂກດຮ້າຍຂອງເຮົາ.

19ເຮົາໄດ້ກ່າວໂທດພວກເຂົາ ເຖິງການດຳເນີນຊີວິດ ແລະຄວາມປະພຶດຂອງພວກເຂົາ ແລະເຮົາໄດ້ເຮັດໃຫ້ພວກເຂົາກະຈັດກະຈາຍໄປ ໃນທ່າມກາງຊາວຕ່າງຊາດທັງຫລາຍ.

20ເມື່ອພວກເຂົາໄດ້ໄປຢູ່ທີ່ໃດ ພວກເຂົາກໍໄດ້ນຳຄວາມອັບອາຍຂາຍໜ້າມາສູ່ນາມອັນບໍຣິສຸດຂອງເຮົາທີ່ນັ້ນ ຍ້ອນຄົນໄດ້ເວົ້າວ່າ, ‘ປະຊາຊົນຂອງພຣະເຈົ້າຢາເວເຫຼົ່ານີ້ຕ້ອງປົບໜີແຕ່ດິນແດນ ທີ່ພຣະເຈົ້າຂອງພວກເຂົາເອງໄດ້ມອບໃຫ້.’

21ການເວົ້າເຊັ່ນນີ້ໄດ້ເຮັດໃຫ້ເຮົາເປັນຫ່ວງນຳນາມອັນບໍຣິສຸດຂອງເຮົາ ເນື່ອງຈາກວ່າຊາວອິດສະຣາເອນໄດ້ນຳຄວາມອັບອາຍຂາຍໜ້າມາສູ່ນາມຂອງເຮົາ ໃນທຸກບ່ອນທີ່ພວກເຂົາໄດ້ໄປ.

22ເພາະສະນັ້ນ ເຈົ້າຈົ່ງມອບຖ້ອຍຄຳໃຫ້ຊາວອິດສະຣາເອນວ່າອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້ວ່າ, ‘ຊາວອິດສະຣາເອນເອີຍ ສິ່ງທີ່ເຮົາກຳລັງຈະເຮັດນີ້ບໍ່ແມ່ນເຫັນແກ່ພວກເຈົ້າ; ແຕ່ເພື່ອເຫັນແກ່ນາມອັນບໍຣິສຸດຂອງເຮົາ ຊຶ່ງພວກເຈົ້າໄດ້ດູຖູກໃນທຸກປະເທດທີ່ພວກເຈົ້າໄດ້ໄປນັ້ນ.

23ເມື່ອເຮົາສຳແດງໃຫ້ຊົນຊາດທັງຫລາຍ ເຫັນຄວາມສັກສິດຂອງນາມອັນຍິ່ງໃຫຍ່ຂອງເຮົາແລ້ວ ຄືນາມທີ່ພວກເຈົ້າໄດ້ດູຖູກໃນທ່າມກາງພວກເຂົາ; ພວກເຂົາກໍຈະຮູ້ວ່າເຮົາແມ່ນພຣະເຈົ້າຢາເວ. ອົງພຣະຜູ້ເປັນເຈົ້າ ພຣະເຈົ້າໄດ້ກ່າວດັ່ງນີ້ແຫຼະ. ເຮົາຈະໃຊ້ພວກເຈົ້າເພື່ອສະແດງຕໍ່ໜ້າຊົນຊາດທັງຫລາຍຮູ້ວ່າເຮົາບໍຣິສຸດ.

24ເຮົາຈະນຳພວກເຈົ້າອອກມາຈາກທຸກໆຊົນຊາດ ແລະທຸກໆປະເທດ ເພື່ອນຳພາພວກເຈົ້າມາສູ່ດິນແດນຂອງພວກເຈົ້າເອງ.

25ເຮົາຈະເອົານໍ້າສະອາດຫົດສົງພວກເຈົ້າໃຫ້ພົ້ນມົນທິນທັງໝົດ ອັນເນື່ອງມາຈາກການຂາບໄຫວ້ຮູບເຄົາຣົບ.

26ເຮົາຈະໃຫ້ພວກເຈົ້າມີຄວາມຄິດ ແລະຈິດໃຈໃໝ່. ເຮົາຈະເອົາຈິດໃຈດື້ດ້ານທີ່ແຂງດັ່ງຫີນໜີໄປ ແລະຈະເອົາຈິດໃຈເປັນເນື້ອໜັງທີ່ເຊື່ອຟັງໃຫ້ພວກເຈົ້າ.

27ເຮົາຈະເອົາຈິດວິນຍານຂອງເຮົາໃສ່ໃຫ້ພວກເຈົ້າ ເພື່ອພວກເຈົ້າຈະປະຕິບັດຕາມກົດບັນຍັດຕ່າງໆ ພ້ອມທັງຂໍ້ຄຳສັ່ງທັງໝົດຂອງເຮົາ ທີ່ໄດ້ມອບໃຫ້ແກ່ພວກເຈົ້ານັ້ນ.

28ແລ້ວພວກເຈົ້າກໍຈະອາໄສຢູ່ໃນດິນແດນ ທີ່ເຮົາໄດ້ມອບໃຫ້ແກ່ປູ່ຍ່າຕາຍາຍຂອງພວກເຈົ້າ. ພວກເຈົ້າຈະເປັນປະຊາຊົນຂອງເຮົາ ແລະເຮົາກໍຈະເປັນພຣະເຈົ້າຂອງພວກເຈົ້າ.

29ເຮົາຈະຊ່ວຍພວກເຈົ້າໃຫ້ພົ້ນຈາກມົນທິນທັງໝົດຂອງພວກເຈົ້າ. ເຮົາຈະສັ່ງໃຫ້ມີເຂົ້າຢ່າງອຸດົມສົມບູນ ເພື່ອວ່າພວກເຈົ້າຈະບໍ່ໄດ້ອຶດຢາກອີກຈັກເທື່ອ.

30ເຮົາຈະເຮັດໃຫ້ຕົ້ນໄມ້ ແລະທົ່ງນາຂອງພວກເຈົ້າເກີດຜົນຫລາຍ ເພື່ອວ່າການອຶດຢາກຈະບໍ່ເກີດຂຶ້ນອີກຕໍ່ໄປ ອັນເປັນການອັບອາຍຂາຍໜ້າໃຫ້ແກ່ພວກເຈົ້າໃນທ່າມກາງຊົນຊາດທັງຫລາຍ.

31ພວກເຈົ້າຈະຈົດຈຳຄວາມປະພຶດຊົ່ວ ແລະການເຮັດຜິດຕ່າງໆ ທີ່ພວກເຈົ້າໄດ້ກະທຳ ແລະພວກເຈົ້າຈະເບື່ອໜ່າຍຕົນເອງ ເພາະການບາບແລະການອະທຳທີ່ພວກເຈົ້າໄດ້ເຮັດນັ້ນ.

32ຊາດອິດສະຣາເອນເອີຍ ເຮົາຢາກໃຫ້ພວກເຈົ້າຮູ້ວ່າເຮົາບໍ່ໄດ້ເຮັດສິ່ງທັງໝົດນີ້ ເພາະເຫັນແກ່ພວກເຈົ້າ. ເຮົາຢາກໃຫ້ພວກເຈົ້າໄດ້ຮັບຄວາມອັບອາຍຂາຍໜ້າ ຍ້ອນສິ່ງທີ່ພວກເຈົ້າກຳລັງເຮັດຢູ່.’ ອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້ແຫຼະ.

33ອົງພຣະຜູ້ເປັນເຈົ້າ ພຣະເຈົ້າກ່າວວ່າ, ‘ເມື່ອເຮົາຊຳລະພວກເຈົ້າໃຫ້ສະອາດຈາກທຸກການບາບຂອງພວກເຈົ້າແລ້ວ ເຮົາກໍຈະໃຫ້ພວກເຈົ້າອາໄສຢູ່ຕາມເມືອງຕ່າງໆຂອງພວກເຈົ້າອີກ ແລະອະນຸຍາດໃຫ້ພວກເຈົ້າສ້າງສິ່ງທີ່ຮົກຮ້າງເພພັງນັ້ນຂຶ້ນໃໝ່.

34ສ່ວນທົ່ງນາຂອງພວກເຈົ້າທີ່ທຸກຄົນເຄີຍຍ່າງຜ່ານໄປມາ ແລະເຫັນມັນຮົກເຕັມໄປດ້ວຍຫຍ້າ ແລະເປັນປ່ານັ້ນ ເຮົາຈະໃຫ້ພວກເຈົ້າປູກຝັງໃສ່ທີ່ນັ້ນອີກ.

35ທຸກໆຄົນຈະເວົ້າເຖິງດິນແດນນີ້ ຊຶ່ງຄັ້ງໜຶ່ງ ເຄີຍເປັນຖິ່ນແຫ້ງແລ້ງກັນດານ; ແຕ່ບັດນີ້ ກາຍເປັນດັ່ງສວນເອເດນ; ສ່ວນເມືອງຕ່າງໆທີ່ໄດ້ຖືກພັງທະລາຍ, ຖືກປຸ້ນຈີ້ ແລະຖືກປ່ອຍປະໃຫ້ຮົກຮ້າງເພພັງນັ້ນ ບັດນີ້ ກໍມີຄົນຢູ່ອາໄສແລະມີປ້ອມລ້ອມດ້ວຍກຳແພງ.

36ແລ້ວຊົນຊາດໃກ້ຄຽງທັງຫລາຍທີ່ລອດຊີວິດມາໄດ້ ກໍຈະໄດ້ຮູ້ວ່າເຮົາແມ່ນພຣະເຈົ້າຢາເວຜູ້ທີ່ສ້າງເມືອງຮົກຮ້າງເພພັງນັ້ນຂຶ້ນໃໝ່ ແລະປູກພືດໃສ່ທົ່ງນາອັນຮົກຮ້າງເຫຼົ່ານີ້. ເຮົາຄືພຣະເຈົ້າຢາເວໄດ້ສັນຍາວ່າເຮົາຈະເຮັດສິ່ງນີ້ ແລະເຮົາຈະເຮັດແທ້.’

37ອົງພຣະຜູ້ເປັນເຈົ້າ ພຣະເຈົ້າກ່າວວ່າ, ‘ອີກຄັ້ງໜຶ່ງ ເຮົາຈະໃຫ້ຊາວອິດສະຣາເອນ ຂໍຄວາມຊ່ວຍເຫລືອຈາກເຮົາ; ແລະເຮົາຈະໃຫ້ພວກເຂົາເພີ່ມຂຶ້ນເປັນຈຳນວນພົນອັນຫລວງຫລາຍ ດັ່ງຝູງແກະ.

38ເມືອງຕ່າງໆທີ່ຮົກຮ້າງເພພັງໃນປັດຈຸບັນນີ້ ກໍຈະມີຄົນຢູ່ເຕັມດັ່ງນະຄອນເຢຣູຊາເລັມ ຊຶ່ງຄັ້ງໜຶ່ງ ມີແກະຢ່າງຫລວງຫລາຍ ເພື່ອໃຊ້ຖວາຍເປັນເຄື່ອງບູຊາໃນຍາມເທດສະການ. ແລ້ວພວກເຂົາກໍຈະຮູ້ວ່າເຮົາແມ່ນພຣະເຈົ້າຢາເວ.”’

← Chapter 35 Jump to: Chapter 37 →