Ezekiel 6

Lao Bible 2012 (ພຣະຄຳພີສັກສິ)

← Chapter 5 Jump to: Chapter 7 →

1ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າວ່າ,

2“ມະນຸດເອີຍ ຈົ່ງແນມໄປທີ່ພູເຂົາທັງຫລາຍຂອງຊາດອິດສະຣາເອນ ແລະບອກຖ້ອຍຄຳຂອງເຮົາແກ່ພູເຂົາເຫຼົ່ານັ້ນ.

3ຈົ່ງບອກພູເຂົາຕ່າງໆຂອງຊາດອິດສະຣາເອນໃຫ້ຟັງຖ້ອຍຄຳຂອງອົງພຣະຜູ້ເປັນເຈົ້າ ພຣະເຈົ້າ. ອົງພຣະຜູ້ເປັນເຈົ້າ ພຣະເຈົ້າບອກພູເຂົາແລະເນີນພູທັງຫລາຍ, ຫ້ວຍກັບຮ່ອມພູທັງຫລາຍວ່າ ເຮົາຈະໃຊ້ດາບທຳລາຍບ່ອນຕ່າງໆທີ່ປະຊາຊົນຂາບໄຫວ້ຮູບເຄົາຣົບ.

4ແທ່ນບູຊາທັງຫລາຍຈະຖືກຮື້ຖິ້ມ ແລະແທ່ນເຜົາເຄື່ອງຫອມກໍຈະຖືກທຳລາຍ. ປະຊາຊົນທັງໝົດໃນທີ່ນັ້ນຈະຖືກຂ້າຕໍ່ໜ້າຮູບເຄົາຣົບຂອງພວກເຂົາ.

5ເຮົາຈະເຮັດໃຫ້ຊາກສົບຂອງປະຊາຊົນອິດສະຣາເອນກະຈັດກະຈາຍໄປ; ເຮົາຈະເຮັດໃຫ້ກະດູກທັງໝົດຂອງພວກເຂົາກະຈັດກະຈາຍຢູ່ອ້ອມແທ່ນບູຊາ.

6ເມືອງທັງໝົດຂອງຊາດອິດສະຣາເອນຈະຖືກທຳລາຍ ເພື່ອວ່າແທ່ນບູຊາກັບຮູບເຄົາຣົບຕ່າງໆຂອງພວກເຂົາຈະຖືກທຳລາຍໝົດເປັນຊີ້ນໆ, ແທ່ນເຜົາເຄື່ອງຫອມຂອງພວກເຂົາຈະຖືກຕີໃຫ້ແຕກເປັນປ່ຽງໆ ແລະທຸກໆສິ່ງທີ່ພວກເຂົາໄດ້ເຮັດນັ້ນກໍຈະສູນຫາຍໄປ.

7ປະຊາຊົນຈະຖືກຂ້າໃນທຸກທີ່ທຸກບ່ອນ ແລະພວກທີ່ຍັງເຫລືອມີຊີວິດຢູ່ຈະຮັບຮູ້ວ່າເຮົາແມ່ນພຣະເຈົ້າຢາເວ.

8ເຮົາຈະປ່ອຍໃຫ້ບາງຄົນຫລົບໜີຈາກການຖືກສັງຫານໝູ່ ແລະຖືກກະຈັດກະຈາຍໄປໃນທ່າມກາງຊົນຊາດຕ່າງໆ

9ບ່ອນທີ່ພວກເຂົາຈະໃຊ້ຊີວິດຢູ່ເປັນຊະເລີຍໃນຕ່າງຖິ່ນ. ໃນທີ່ນັ້ນ ພວກເຂົາຈະລະນຶກເຖິງເຮົາ ແລະຮູ້ວ່າເຮົາລົງໂທດພວກເຂົາໃຫ້ໄດ້ຮັບການອັບອາຍຂາຍໜ້າ ກໍເພາະຈິດໃຈທີ່ຂາດຄວາມເຊື່ອຈຶ່ງພາໃຫ້ຫ່າງເຫີນຈາກເຮົາໄປ ແລະພວກເຂົາຮັກຮູບເຄົາຣົບຫລາຍກວ່າຮັກເຮົາ. ພວກເຂົາຈະກຽດຊັງຕົນເອງ ເພາະຄວາມຊົ່ວຊ້າ ແລະສິ່ງເສື່ອມເສຍທັງຫລາຍທີ່ພວກເຂົາໄດ້ເຮັດ.

10ພວກເຂົາຈະຮູ້ວ່າເຮົາແມ່ນອົງພຣະຜູ້ເປັນເຈົ້າ ແລະການຕັກເຕືອນຂອງເຮົານັ້ນກໍບໍ່ໄດ້ເປັນການຂົ່ມຂູ່ລ້າໆ.”

11ອົງພຣະຜູ້ເປັນເຈົ້າ ພຣະເຈົ້າກ່າວວ່າ, “ຈົ່ງຕົບມືສາ ຈົ່ງທືບຕີນເຖີດ ຈົ່ງຮ້ອງຢ່າງໂສກເສົ້າເສຍໃຈເພາະຄວາມຊົ່ວທັງໝົດ ຄືສິ່ງອັນໜ້າກຽດຊັງຕ່າງໆທີ່ຊາວອິດສະຣາເອນໄດ້ເຮັດ. ພວກເຂົາຈະຕາຍໃນເສິກສົງຄາມ ຫລືໃນການອຶດຢາກ ຫລືຍ້ອນການເຈັບໄຂ້ໄດ້ປ່ວຍ.

12ພວກທີ່ຢູ່ຫ່າງໄກຈະເຈັບໄຂ້ ແລະຕາຍ; ພວກທີ່ຢູ່ອ້ອມແອ້ມຈະຖືກຂ້າໃນສົງຄາມ; ພວກທີ່ລອດມາໄດ້ກໍຈະອຶດຕາຍ. ພວກເຂົາຈະໄດ້ຊີມຣິດແຫ່ງຄວາມໂກດຮ້າຍຂອງເຮົາຢ່າງສຸດຂີດ.

13ຊາກສົບທັງຫລາຍຈະກະຈັດກະຈາຍ ປະປົນຢູ່ກັບຮູບເຄົາຣົບຕ່າງໆອ້ອມແທ່ນບູຊາ ມັນຈະຖືກກະຈັດກະຈາຍໄປທົ່ວເນີນພູສູງ, ຢູ່ເທິງຈອມພູທຸກໆໜ່ວຍ, ຢູ່ກ້ອງຕົ້ນໄມ້ໃບຂຽວ ແລະຕົ້ນໂອກທຸກຕົ້ນ ຄືຢູ່ໃນທຸກບ່ອນທີ່ພວກເຂົາໄດ້ເຜົາເຄື່ອງບູຊາຖວາຍແກ່ຮູບເຄົາຣົບຂອງພວກເຂົາ. ແລ້ວທຸກຄົນກໍຈະຮູ້ວ່າເຮົາແມ່ນພຣະເຈົ້າຢາເວ.

14ເຮົາຈະໃຊ້ຣິດອຳນາດຂອງເຮົາທຳລາຍປະເທດຂອງພວກເຂົາ. ເຮົາຈະເຮັດໃຫ້ເປັນດິນແດນເປົ່າຫວ່າງ, ແຕ່ຖິ່ນແຫ້ງແລ້ງກັນດານທາງພາກໃຕ້ ຈົນຮອດເມືອງຣິບລາທາງທິດເໜືອ ໂດຍຈະບໍ່ປະທີ່ໃດໃຫ້ຊາວອິດສະຣາເອນອາໄສຢູ່. ແລ້ວທຸກຄົນກໍຈະຮູ້ວ່າເຮົາແມ່ນພຣະເຈົ້າຢາເວ.”

← Chapter 5 Jump to: Chapter 7 →