Ezekiel 45 — Lao Bible 2012 (ພຣະຄຳພີສັກສິ)

1ເມື່ອທີ່ດິນໄດ້ຖືກແບ່ງໃຫ້ເປັນສ່ວນຂອງແຕ່ລະເຜົ່າແລ້ວ ຈົ່ງຖວາຍທີ່ດິນຕອນໜຶ່ງໃຫ້ເປັນສ່ວນຂອງພຣະເຈົ້າຢາເວ. ທີ່ດິນຕອນນີ້ໃຫ້ຍາວສິບສອງກິໂລແມັດເຄິ່ງ ແລະໃຫ້ກວ້າງສິບກິໂລແມັດ. ທີ່ດິນຕອນນີ້ທັງໝົດຈະສັກສິດ.

2ໃນບໍລິເວນນີ້ ໃຫ້ມີພື້ນທີ່ເປັນຮູບສີ່ຫລ່ຽມມົນທົນສຳລັບພຣະວິຫານ ແຕ່ລະຂ້າງໃຫ້ມີ ສອງຮ້ອຍຫ້າສິບແມັດ ອ້ອມຮອບດ້ວຍທີ່ເປົ່າຫວ່າງກວ້າງຊາວຫ້າແມັດ.

3ເຄິ່ງໜຶ່ງຂອງບໍລິເວນນີ້ໃຫ້ເປັນດິນຕອນໜຶ່ງຍາວສິບສອງກິໂລແມັດເຄິ່ງ ແລະກວ້າງຫ້າກິໂລແມັດ ໂດຍໃຫ້ແທກອອກໄວ້ເປັນບ່ອນປຸກສ້າງພຣະວິຫານ ຄືບ່ອນສັກສິດທີ່ສຸດ.

4ບ່ອນນີ້ຈະເປັນສ່ວນສັກສິດຂອງປະເທດ ແຍກໄວ້ສຳລັບພວກປະໂຣຫິດຜູ້ທີ່ຮັບໃຊ້ອົງພຣະຜູ້ເປັນເຈົ້າໃນພຣະວິຫານນີ້. ທີ່ບໍລິເວນນີ້ຈະມີເຮືອນຂອງພວກເຂົາ ແລະມີດິນຕອນທີ່ຖືກຈັດໄວ້ສຳລັບພຣະວິຫານ.

5ອີກສ່ວນໜຶ່ງຂອງບໍລິເວນນີ້ ຈົ່ງຈັດໄວ້ໃຫ້ເປັນກຳມະສິດຂອງພວກເລວີ ຜູ້ທີ່ເຮັດວຽກໃນພຣະວິຫານ. ໃນທີ່ນັ້ນຈະເປັນໝູ່ບ້ານຕ່າງໆໃຫ້ພວກເຂົາຢູ່.

6ຖັດຈາກບໍລິເວນອັນສັກສິດນີ້ ໃຫ້ມີທີ່ດິນຕອນໜຶ່ງອີກ ຍາວສິບສອງກິໂລແມັດເຄິ່ງ ແລະກວ້າງສອງກິໂລແມັດເຄິ່ງ. ດິນຕອນນີ້ໃຫ້ຈັດໄວ້ເປັນເມືອງໜຶ່ງ ທີ່ປະຊາຊົນອິດສະຣາເອນຢູ່ອາໄສ.

7ໃຫ້ຈັດດິນແດນສ່ວນໜຶ່ງໄວ້ໃຫ້ເຈົ້າຊາຍຜູ້ປົກຄອງຢູ່ເຊັ່ນກັນ. ແຕ່ຊາຍແດນທາງທິດຕາເວັນຕົກຂອງບ່ອນສັກສິດ ຈະເລີຍໄປທາງທິດຕາເວັນຕົກຈົນເຖິງທະເລເມດີແຕຣາເນ; ແລະຈາກຊາຍແດນທາງທິດຕາເວັນອອກ ຈະເລີຍໄປເຖິງຊາຍແດນທາງທິດຕາເວັນອອກຂອງປະເທດດ້ວຍ. ເພື່ອວ່າລວງຍາວຂອງດິນແດນຈະເທົ່າກັນກັບພື້ນທີ່ໜຶ່ງຂອງພື້ນທີ່ຕ່າງໆ ທີ່ໄດ້ຖືກມອບໝາຍໃຫ້ແຕ່ລະເຜົ່າໃນບັນດາເຜົ່າຂອງຊາດອິດສະຣາເອນ.

8ພື້ນທີ່ນີ້ຈະເປັນສ່ວນຂອງເຈົ້າຊາຍຜູ້ຈະປົກຄອງໄດ້ຮັບຢູ່ໃນດິນແດນອິດສະຣາເອນ ເພື່ອວ່າເພິ່ນຈະບໍ່ຂົ່ມເຫັງປະຊາຊົນອີກຕໍ່ໄປ, ແຕ່ຈະໃຫ້ດິນແດນສ່ວນທີ່ເຫຼືອຂອງປະເທດນັ້ນ ເປັນຂອງປະຊາຊົນອິດສະຣາເອນເຜົ່າຕ່າງໆ.

9ອົງພຣະຜູ້ເປັນເຈົ້າ ພຣະເຈົ້າກ່າວວ່າ, “ພວກຜູ້ປົກຄອງຊາດອິດສະຣາເອນເອີຍ ພວກເຈົ້າໄດ້ເຮັດບາບມາດົນນານແລ້ວ ຈົ່ງເຊົາເຮັດການຮຸນແຮງ ແລະການກົດຂີ່ຂອງພວກເຈົ້ານັ້ນສາ. ຈົ່ງເຮັດສິ່ງທີ່ຖືກຕ້ອງແລະຍຸດຕິທຳ. ຈົ່ງເຊົາຂັບໄລ່ປະຊາຊົນຂອງເຮົາ ໃຫ້ໜີຈາກດິນແດນທີ່ເປັນກຳມະສິດຂອງພວກເຂົາສາ. ອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້ແຫຼະ.

10ທຸກຄົນຈະຕ້ອງໃຊ້ອັດຕາຊັ່ງ ແລະແທກຢ່າງສັດຊື່:

11ເອຟາທີ່ໃຊ້ຕວງຂອງແຫ້ງໃຫ້ເທົ່າກັບບາດສຳລັບຕວງຂອງເປັນນໍ້າ. ໜ່ວຍທີ່ເປັນມາດຕະຖານຄື: ໂຮເມ. ຜົນຂອງໜ່ວຍວັດແທກມີດັ່ງນີ້: ໂຮເມ ເທົ່າກັບ 10 ເອຟາ ເທົ່າກັບ 10 ບາດ.

12ໜ່ວຍອັດຕາຊັ່ງຂອງພວກເຈົ້າໃຫ້ມີດັ່ງນີ້: 20 ເກຣາ ເທົ່າກັບ 1 ເຊເກນ 60 ເຊເກນ ເທົ່າກັບ 1 ມີນາ

13ຕໍ່ໄປນີ້ແມ່ນອັດຕາທີ່ພວກເຈົ້າຕ້ອງຖວາຍບູຊາ ມີດັ່ງນີ້: ເຂົ້າບາເລ: 1 ສ່ວນ 60 ຂອງຜົນລະປູກຂອງພວກເຈົ້າ ເຂົ້າເດືອຍ: 1 ສ່ວນ 60 ຂອງຜົນລະປູກຂອງພວກເຈົ້າ ນໍ້າມັນໝາກກອກເທດ: 1 ສ່ວນ 100 ຂອງຜົນຜະລິດຂອງພວກເຈົ້າ (ສ່ວນອັດຕາຊັ່ງຕວງນັ້ນໃຫ້ໃຊ້ ບາດ: 10 ບາດເທົ່າກັບ 1 ໂຮເມ ແລະ 1 ໂຮເມ ເທົ່າກັນກັບ 1 ໂກເຣ.) ແກະ 1 ໃນ 200 ໂຕ ຈາກຝູງທີ່ທົ່ງຫຍ້າຂອງຊາດອິດສະຣາເອນ. ພວກເຈົ້າຕ້ອງນຳພືດຜົນເປັນເມັດມາຖວາຍ, ນຳສັດທັງຫລາຍມາເຜົາຖວາຍທັງໂຕ ແລະນຳສັດທັງຫລາຍມາຖວາຍເພື່ອຄວາມສາມັກຄີທຳ ສຳລັບການບາບຂອງພວກເຈົ້າຈະໄດ້ຮັບການອະໄພ. ອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້ແຫຼະ.

16ປະຊາຊົນທຸກໆຄົນໃນດິນແດນຈະຕ້ອງນຳ ເຄື່ອງຖວາຍເຫຼົ່ານີ້ ໄປໃຫ້ເຈົ້າຊາຍຜູ້ປົກຄອງຊາດອິດສະຣາເອນ.

17ມັນແມ່ນໜ້າທີ່ຂອງລາວທີ່ຈະຈັດຫາສັດມາເຜົາຖວາຍບູຊາ ເອົາພືດຜົນເປັນເມັດ ແລະເຫຼົ້າອະງຸ່ນມາຖວາຍສຳລັບຊົນຊາດອິດສະຣາເອນທັງໝົດ ຍາມເທດສະການເດືອນຂຶ້ນໃໝ່, ໃນວັນຊະບາໂຕ ແລະໃນເທດສະການອື່ນໆ. ລາວຕ້ອງຈັດຫາເຄື່ອງບູຊາເພື່ອຖວາຍລຶບລ້າງບາບ, ເຄື່ອງຖວາຍພືດຜົນເປັນເມັດ, ເຄື່ອງຖວາຍບູຊາເຜົາທັງໝົດ ແລະເຄື່ອງຖວາຍເພື່ອຄວາມສາມັກຄີທຳ ມາຖວາຍເພື່ອເປັນການຍົກບາບແກ່ປະຊາຊົນອິດສະຣາເອນ.”

18ອົງພຣະຜູ້ເປັນເຈົ້າ ພຣະເຈົ້າກ່າວວ່າ, “ໃນວັນທີໜຶ່ງຂອງເດືອນທີໜຶ່ງ ເຈົ້າຈະຕ້ອງຖວາຍບູຊາງົວເຖິກໂຕໜຶ່ງ ທີ່ມີສຸຂະພາບດີແລະບໍ່ມີຕຳໜິ ເພື່ອຊຳລະພຣະວິຫານໃຫ້ໝົດມົນທິນ.

19ປະໂຣຫິດຈະເອົາເລືອດສັດບາງສ່ວນທີ່ເປັນເຄື່ອງຖວາຍບູຊາລຶບລ້າງບາບ ໄປທາໃສ່ຂອບປະຕູຂອງພຣະວິຫານ, ໃສ່ເທິງແຈທັງສີ່ຂອງແທ່ນບູຊາ ແລະໃສ່ເທິງເສົາຂອງປະຕູທີ່ເຂົ້າໄປສູ່ເດີ່ນດ້ານໃນ.

20ໃນວັນທີເຈັດຂອງເດືອນ ໃຫ້ເຈົ້າເຮັດຢ່າງດຽວກັນໃນນາມຂອງຜູ້ທີ່ເຮັດບາບ ໂດຍບໍ່ໄດ້ຕັ້ງໃຈ ຫລືໂດຍການຮູ້ເທົ່າບໍ່ເຖິງການ. ໂດຍວິທີນີ້ເຈົ້າກໍຈະຮັກສາພຣະວິຫານໃຫ້ສັກສິດ.

21ໃນວັນທີສິບສີ່ຂອງເດືອນທີໜຶ່ງ ເຈົ້າຈະຕ້ອງເລີ່ມການສະຫລອງປັດສະຄາ. ໃຫ້ທຸກຄົນກິນເຂົ້າຈີ່ບໍ່ມີເຊື້ອແປ້ງເປັນເວລາເຈັດວັນ.

22ໃນວັນທີໜຶ່ງຂອງເທດສະການນັ້ນ ເຈົ້າຊາຍຜູ້ປົກຄອງຈະຕ້ອງຖວາຍງົວເຖິກໂຕໜຶ່ງ ເປັນເຄື່ອງບູຊາເພື່ອລຶບລ້າງບາບຂອງຕົນ ແລະຂອງປະຊາຊົນທຸກໆຄົນ.

23ແຕ່ລະວັນໃນເຈັດວັນຂອງເທດສະການນັ້ນ ລາວຈະຕ້ອງຖວາຍບູຊາງົວເຖິກເຈັດໂຕ ກັບແກະເຖິກເຈັດໂຕ ທີ່ມີສຸຂະພາບດີແລະບໍ່ມີຕຳໜິ ໂດຍໃຫ້ເຜົາທັງໝົດຖວາຍແກ່ພຣະເຈົ້າຢາເວ, ແຕ່ລະວັນລາວຈະຕ້ອງຖວາຍແບ້ເຖິກໂຕໜຶ່ງ ເປັນເຄື່ອງບູຊາລຶບລ້າງບາບ.

24ສຳລັບງົວເຖິກແລະແກະເຖິກແຕ່ລະໂຕທີ່ນຳມາຖວາຍນັ້ນ ໃຫ້ຖວາຍພືດຜົນເປັນເມັດສິບເຈັດລິດເຄິ່ງ ກັບນໍ້າມັນໝາກກອກເທດສາມລິດພ້ອມ.

25ສຳລັບເທດສະການປຸກຕູບຢູ່ ຊຶ່ງເລີ່ມຕັ້ງແຕ່ວັນທີສິບຫ້າຂອງເດືອນທີເຈັດ; ເຈົ້າຊາຍກໍຈະຖວາຍແຕ່ລະວັນໃນເຈັດວັນນັ້ນຢ່າງດຽວກັນ ຄືເຄື່ອງຖວາຍບູຊາລຶບລ້າງບາບ ແລະເຄື່ອງຖວາຍບູຊາພືດຜົນເປັນເມັດກັບນໍ້າມັນໝາກກອກເທດ.”