Ezekiel 30

Lao Bible 2012 (ພຣະຄຳພີສັກສິ)

← Chapter 29 Jump to: Chapter 31 →

1ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າກ່າວວ່າ,

2“ມະນຸດເອີຍ ຈົ່ງທຳນວາຍ ແລະປະກາດສິ່ງທີ່ອົງພຣະຜູ້ເປັນເຈົ້າ ພຣະເຈົ້າກ່າວວ່າ ເຈົ້າຈົ່ງໂຮຮ້ອງຂຶ້ນດ້ວຍຖ້ອຍຄຳເຫຼົ່ານີ້ສາ ວ່າມື້ຢ້ານກົວອັນໃຫຍ່ຫລວງກຳລັງມາຮອດ

3ມາໃກ້ແລ້ວຄືມື້ທີ່ພຣະເຈົ້າຢາເວຈະກະທຳການ ມື້ໜຶ່ງທີ່ມີເມກໝອກໜາ ແລະນາໆຊາດເດືອດຮ້ອນ.

4ເສິກສົງຄາມຈະເກີດຂຶ້ນໃນປະເທດເອຢິບ ແລະເອທີໂອເປຍກໍຈະເກີດລຳບາກໃຫຍ່. ມີຫລາຍຄົນຈະຖືກຂ້າຢູ່ໃນປະເທດເອຢິບ ຖືກປຸ້ນຈີ້ ແລະປະໃຫ້ຮົກຮ້າງຫວ່າງເປົ່າ.

5ສົງຄາມນັ້ນຈະຂ້າທະຫານຮັບຈ້າງຈາກເອທີໂອເປຍ, ລີເບຍ, ລີເດຍ, ອາຣາເບຍ, ກຸບ ແລະແມ່ນແຕ່ທະຫານທີ່ມາຈາກປະຊາຊົນຂອງເຮົາເອງດ້ວຍ.”

6ພຣະເຈົ້າຢາເວຊົງກ່າວວ່າ, “ຈາກເມືອງມິກໂດນທາງທິດເໜືອ ເຖິງເມືອງອາຊວານທາງທິດໃຕ້ ທະຫານໜ່ວຍປ້ອງກັນທັງໝົດຂອງປະເທດເອຢິບຈະຖືກຂ້າໃນສະໜາມຮົບ. ກອງທັບອັນອວດອົ່ງທະນົງຕົວຂອງປະເທດເອຢິບຈະຖືກທຳລາຍກ້ຽງ. ອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້ແຫຼະ.

7ດິນແດນຈະຖືກປະປ່ອຍໃຫ້ຮົກຮ້າງຫວ່າງເປົ່າທີ່ສຸດໃນໂລກ ແລະເມືອງຕ່າງໆກໍຈະຖືກປະປ່ອຍໃຫ້ຮົກຮ້າງເພພັງລົງ.

8ເມື່ອເຮົາໄດ້ຈູດໄຟເຜົາປະເທດເອຢິບ ແລະໜ່ວຍປ້ອງກັນຂອງປະເທດຖືກທຳລາຍໝົດສິ້ນແລ້ວ ພວກເຂົາກໍຈະຮູ້ວ່າເຮົາແມ່ນພຣະເຈົ້າຢາເວ.

9ເມື່ອວັນນັ້ນມາເຖິງ ແລະເມື່ອປະເທດເອຢິບຖືກທຳລາຍແລ້ວ ເຮົາຈະສົ່ງຄະນະຜູ້ນຳຂ່າວລົງເຮືອໄປປຸກປັ່ນປະຊາຊົນເອທີໂອເປຍ ໃຫ້ມີຄວາມປອດໄພອັນຈອມປອມ ແລະພວກເຂົາກໍຈະສະທ້ານຢ້ານກົວໃຫຍ່. ວັນນັ້ນໃກ້ເຂົ້າມາສາແລ້ວ.”

10ອົງພຣະຜູ້ເປັນເຈົ້າ ພຣະເຈົ້າກ່າວວ່າ, “ເຮົາຈະໃຊ້ກະສັດເນບູກາດເນັດຊາແຫ່ງບາບີໂລນ ມາເຮັດໃຫ້ຊັບສົມບັດຂອງເອຢິບສູນສິ້ນໄປ.

11ລາວຕະຫລອດທັງກອງທັບອັນໂຫດຫ້ຽມຂອງລາວ ຈະທຳລາຍລ້າງຜານດິນແດນ. ພວກເຂົາຈະໃຊ້ດາບບຸກໂຈມຕີປະເທດເອຢິບ ແລະດິນແດນກໍຈະເຕັມໄປດ້ວຍຊາກສົບ.

12ເຮົາຈະເຮັດໃຫ້ແມ່ນໍ້ານິນແຫ້ງ ແລະຈະມອບເອຢິບໃຫ້ຢູ່ໃຕ້ອຳນາດຂອງຄົນຊົ່ວຮ້າຍ. ຊາວຕ່າງດ້າວຈະທຳລາຍລ້າງຜານທັງໝົດປະເທດ. ເຮົາຄືພຣະເຈົ້າຢາເວໄດ້ກ່າວດັ່ງນີ້ແຫຼະ.”

13ອົງພຣະຜູ້ເປັນເຈົ້າ ພຣະເຈົ້າກ່າວວ່າ, “ເຮົາຈະທຳລາຍບັນດາຮູບເຄົາຣົບ ແລະພຣະປອມທັງຫລາຍທີ່ເມືອງມຳຟິດ ບໍ່ມີຜູ້ໃດຈະຂຶ້ນປົກຄອງເອຢິບ ແລະເຮົາຈະເຮັດໃຫ້ປະຊາຊົນທັງໝົດສະທ້ານຢ້ານກົວ.

14ເຮົາຈະເຮັດໃຫ້ເອຢິບທາງພາກໃຕ້ຮົກຮ້າງຫວ່າງເປົ່າ ທັງຈະຈູດໄຟເຜົາເມືອງໂຊອານທາງທິດເໜືອດ້ວຍ. ເຮົາຈະລົງໂທດເມືອງເອກຂອງເທເບ.

15ເຮົາຈະປ່ອຍໃຫ້ເປລູສີອຳ ເມືອງທີ່ມີປ້ອມປ້ອງກັນອັນໃຫຍ່ໂຕຂອງປະເທດເອຢິບ ໄດ້ຊີມຣິດແຫ່ງຄວາມໂກດຮ້າຍອັນໃຫຍ່ຂອງເຮົາ. ເຮົາຈະທຳລາຍຊັບສົມບັດຂອງເມືອງເທເບ.

16ເຮົາຈະຈູດໄຟເຜົາເອຢິບແລະເມືອງເປລູສີອຳກໍຈະແຄ້ນໃຈ ກຳແພງເມືອງເທເບຈະພັງທະລາຍ ແລະນໍ້າກໍຈະໄຫລຖ້ວມເມືອງ.

17ຊາວໜຸ່ມໃນເມືອງເຮລີໂອໂປລີກັບເມືອງບູບາຊະຕີ ຈະຕາຍໃນສົງຄາມ ແລະປະຊາຊົນອື່ນໆກໍຈະຖືກຈັບໄປເປັນຊະເລີຍ.

18ຄວາມມືດຈະເຂົ້າປົກຄຸມເມືອງຕາປັນເຮັດ ເມື່ອເຮົາທັບມ້າງອຳນາດຂອງປະເທດເອຢິບ ແລະເຮັດໃຫ້ກຳລັງທີ່ເອຢິບໄດ້ອວດອ້າງຢ່າງໜັກໜານັ້ນສິ້ນສູນໄປ. ເມກໝອກຈະປົກຄຸມປະເທດເອຢິບ ແລະປະຊາຊົນຕາມເມືອງທັງຫລາຍກໍຈະຖືກຈັບໄປເປັນຊະເລີຍ.

19ເມື່ອເຮົາລົງໂທດເອຢິບດັ່ງນີ້ແລ້ວ ພວກເຂົາກໍຈະຮູ້ວ່າເຮົາແມ່ນພຣະເຈົ້າຢາເວ.”

20ໃນວັນທີເຈັດຂອງເດືອນທີໜຶ່ງ ອັນກົງກັບປີທີສິບເອັດ ແຫ່ງການເປັນຊະເລີຍໃນຕ່າງຖິ່ນຂອງພວກເຮົານັ້ນ ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າກ່າວວ່າ,

21“ມະນຸດເອີຍ ເຮົາໄດ້ເຮັດໃຫ້ແຂນກະສັດແຫ່ງເອຢິບຫັກ. ບໍ່ມີຜູ້ໃດເອົາຜ້າພັນແຂນໃຫ້ຫລືເຮັດຫ່ວງຫ້ອຍຄໍໃຫ້ ເພື່ອວ່າແຂນນັ້ນຈະດີແລະແຂງແຮງແລະຈັບດາບໄດ້ອີກ.

22ບັດນີ້ ຕໍ່ໄປແມ່ນສິ່ງທີ່ອົງພຣະຜູ້ເປັນເຈົ້າ ພຣະເຈົ້າກ່າວ: ເຮົາເປັນສັດຕູຂອງກະສັດແຫ່ງເອຢິບ. ເຮົາກຳລັງຈະຫັກແຂນທັງສອງຂອງລາວ ຄືແຂນທີ່ຍັງດີແລະແຂນທີ່ໄດ້ຫັກແລ້ວນັ້ນດ້ວຍ ແລະດາບກໍຈະຕົກລົງຈາກມືລາວ.

23ເຮົາຈະເຮັດໃຫ້ຊາວເອຢິບກະຈັດກະຈາຍໄປໃນທ່າມກາງບັນດາປະຊາຊາດ ແລະກະຈາຍພວກເຂົາໄປຕາມປະເທດຕ່າງໆ.

24ແລ້ວເຮົາຈະເຮັດໃຫ້ແຂນກະສັດແຫ່ງບາບີໂລນແຂງແຮງ ແລະເອົາດາບຂອງເຮົາໃຫ້ລາວຖື. ແຕ່ເຮົາຈະເຮັດໃຫ້ແຂນກະສັດແຫ່ງເອຢິບຫັກ ແລະລາວຈະຄວນຄາງດ້ວຍຄວາມເຈັບປວດຢ່າງໜັກ ແລະຕາຍຕໍ່ໜ້າສັດຕູຂອງລາວ.

25ເຮົາຈະເຮັດໃຫ້ລາວອ່ອນແຮງ ແລະໃຫ້ກະສັດແຫ່ງບາບີໂລນເຂັ້ມແຂງ. ເມື່ອເຮົາມອບດາບຂອງເຮົາໃຫ້ລາວແລະລາວຊີ້ດາບນັ້ນໄປສູ່ປະເທດເອຢິບ ພວກເຂົາກໍຈະຮູ້ວ່າເຮົາແມ່ນພຣະເຈົ້າຢາເວ.

26ເຮົາຈະເຮັດໃຫ້ຊາວເອຢິບກະຈັດກະຈາຍໄປໃນທ່າມກາງບັນດາປະຊາຊາດ ແລະກະຈາຍພວກເຂົາໄປຕາມປະເທດຕ່າງໆ. ແລ້ວພວກເຂົາກໍຈະຮູ້ວ່າເຮົາແມ່ນພຣະເຈົ້າຢາເວ.”

← Chapter 29 Jump to: Chapter 31 →