Ezekiel 28

Lao Bible 2012 (ພຣະຄຳພີສັກສິ)

← Chapter 27 Jump to: Chapter 29 →

1ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າກ່າວວ່າ,

2“ມະນຸດເອີຍ ຈົ່ງບອກຜູ້ປົກຄອງນະຄອນຕີເຣ ສິ່ງທີ່ອົງພຣະຜູ້ເປັນເຈົ້າ ພຣະເຈົ້າກ່າວຕໍ່ລາວວ່າ, ‘ເພາະເຈົ້າອວດຕົວຂຶ້ນ ເຈົ້າຈຶ່ງອ້າງຕົນເອງວ່າເປັນພະ. ເຈົ້າກ່າວວ່າເຈົ້າເປັນດັ່ງພະຕົນໜຶ່ງທີ່ນັ່ງເທິງບັນລັງ ຊຶ່ງມີທະເລທັງຫລາຍອ້ອມລ້ອມເຈົ້າໄວ້. ເຈົ້າທຳຕົນເປັນພະບໍ່ໄດ້ດອກ ເພາະເຈົ້າເປັນມະນຸດແຕ່ບໍ່ແມ່ນພະ.

3ເຈົ້າຄິດວ່າເຈົ້າສະຫລາດກວ່າດາເນນ ຈົນບໍ່ມີຄວາມລັບໃດໆປິດບັງເຈົ້າໄວ້ໄດ້.

4ສະຕິປັນຍາກັບຄວາມຊຳນິຊຳນານຂອງເຈົ້ານັ້ນໄດ້ເຮັດໃຫ້ເຈົ້າຮັ່ງມີ ດ້ວຍຊັບສົມບັດທີ່ເປັນຄຳແລະເງິນ.

5ເຈົ້າໄດ້ເຮັດທຸລະກິດຢ່າງຫລັກແຫລມແລະສືບຕໍ່ໄດ້ກຳໄລ. ເຈົ້າຊ່າງອວດອົ່ງທະນົງຕົວກັບຊັບສົມບັດຂອງເຈົ້າແທ້ໆນໍ.

6ບັດນີ້ຕໍ່ໄປນີ້ ແມ່ນສິ່ງທີ່ອົງພຣະຜູ້ເປັນເຈົ້າ ພຣະເຈົ້າກ່າວ: ຍ້ອນເຈົ້າຄິດວ່າເຈົ້າສະຫລາດເໝືອນພະຕົນໜຶ່ງ

7ເຮົາຈະນຳເຫຼົ່າສັດຕູຜູ້ຫ້ຽມໂຫດມາໂຈມຕີເຈົ້າ. ພວກເຂົາຈະທຳລາຍສິ່ງອັນສວຍງາມທັງໝົດທີ່ເຈົ້າໄດ້ມາ ໂດຍຄວາມຊຳນິຊຳນານແລະສະຕິປັນຍາຂອງເຈົ້ານັ້ນ.

8ພວກເຂົາຈະສັງຫານເຈົ້າແລະໂຍນເຈົ້າລົງໄປສູ່ຂຸມທີ່ພື້ນທະເລ.

9ເມື່ອພວກເຂົາມາສັງຫານເຈົ້ານັ້ນ ເຈົ້າຍັງຈະອ້າງເຈົ້າເອງວ່າ, ເຈົ້າເປັນພຣະຕົນໜຶ່ງຢູ່ບໍ? ເມື່ອປະເຊີນໜ້າກັບຜູ້ມາສັງຫານເຈົ້ານັ້ນ ເຈົ້າຈະເປັນມະນຸດແລະບໍ່ແມ່ນພຣະຫຍັງເລີຍ.

10ເຈົ້າຈະຕາຍດັ່ງໝາໂຕໜຶ່ງໃນເງື້ອມມືຂອງຄົນຕ່າງດ້າວ ຜູ້ທີ່ບໍ່ນັບຖືພຣະເຈົ້າ. ເຮົາໄດ້ບອກໄວ້ແລ້ວ.”’ ອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້ແຫຼະ.

11ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າກ່າວວ່າ,

12“ມະນຸດເອີຍ ຈົ່ງຄໍ່າຄວນເຖິງຊາຕາກຳທີ່ກຳລັງລໍຄອຍກະສັດແຫ່ງຕີເຣຢູ່. ຈົ່ງບອກສິ່ງທີ່ອົງພຣະຜູ້ເປັນເຈົ້າ ພຣະເຈົ້າກຳລັງກ່າວຕໍ່ລາວວ່າ, ‘ຄັ້ງໜຶ່ງ ເຈົ້າເຄີຍເປັນແບບຢ່າງເຖິງຄວາມຄົບຖ້ວນບໍຣິບູນ. ເຈົ້າເປັນຄົນສະຫລາດຫລັກແຫລມ ແລະຮູບຮ່າງກໍສະຫງ່າງາມແທ້ໆ

13ເຈົ້າເຄີຍໄດ້ຢູ່ໃນເອເດນສວນຂອງພຣະເຈົ້າ ທັງປະດັບກາຍດ້ວຍເພັດພອຍນາໆຊະນິດເຊັ່ນ: ທັບທີມແລະເພັດນິນຈິນດາ; ພອຍເຫລືອງ, ນິນ, ມະນີໂຊດ ແລະໂມລາ; ນິນສີຄາມ, ມໍຣະກົດ ແລະໂກເມນ. ເຈົ້າມີເຄື່ອງເອ້ເປັນຄຳຢ່າງຫລວງຫລາຍ. ສິ່ງເຫຼົ່ານີ້ໄດ້ເຮັດໄວ້ສຳລັບເຈົ້າ ຕັ້ງແຕ່ມື້ທີ່ ເຈົ້າໄດ້ຖືກສ້າງຂຶ້ນມາ.

14ເຮົາໄດ້ຕັ້ງເທວະດາຕົນໜຶ່ງທີ່ໜ້າຢ້ານກົວຍິ່ງໄວ້ໃນທີ່ນັ້ນ ເພື່ອໃຫ້ເຝົ້າປົກປ້ອງຄຸ້ມຄອງເຈົ້າ. ເຈົ້າໄດ້ອາໄສຢູ່ເທິງພູສັກສິດຂອງເຮົາ ແລະຍ່າງໄປມາທ່າມກາງເພັດພອຍຕ່າງໆທີ່ເຫລືອງເຫລື້ອມແວວວາວ.

15ການປະພຶດຂອງເຈົ້າຄົບຖ້ວນບໍຣິບູນທຸກຢ່າງ ແຕ່ມື້ທີ່ເຈົ້າໄດ້ຖືກສ້າງຂຶ້ນມາ ຈົນກວ່າການຊົ່ວຊ້າໄດ້ປາກົດໃນຕົວເຈົ້າ.

16ເຈົ້າໄດ້ຫຍຸ້ງຢູ່ນຳແຕ່ການຊື້ຂາຍ ແລະມັນໄດ້ນຳເຈົ້າໄປສູ່ການຮຸນແຮງແລະການກະທຳບາບ. ສະນັ້ນ ເຮົາຈຶ່ງບັງຄັບເຈົ້າໃຫ້ໜີໄປຈາກພູເຂົາຂອງພຣະເຈົ້າ ແລະປົດເຈົ້າລົງສູ່ຖັນແຖວທຳມະດາຂອງມະນຸດທີ່ຕາຍເປັນ ແລະຂັບໄລ່ເຈົ້າໃຫ້ໜີຈາກເພັດພອຍຕ່າງໆອັນເຫລືອງເຫລື້ອມແວວວາວນັ້ນ.

17ເຈົ້າອວດອົ່ງທະນົງຕົວເພາະຮູບຮ່າງອັນສະຫງ່າງາມຂອງເຈົ້າ ແລະຊື່ສຽງຂອງເຈົ້າກໍໄດ້ພາໃຫ້ເຈົ້າປະພຶດຕົນດັ່ງຄົນໂງ່ຈ້າ. ຍ້ອນເລື່ອງນີ້ ເຮົາຈຶ່ງໂຍນເຈົ້າລົງໄປສູ່ພື້ນດິນ ແລະປ່ອຍປະເຈົ້າໃຫ້ເປັນສິ່ງເຕືອນໃຈແກ່ກະສັດຄົນອື່ນໆ.

18ເຈົ້າໄດ້ທຳມາຄ້າຂາຍຢ່າງຊົ່ວຊ້າ ຈົນບ່ອນນະມັດສະການຂອງເຈົ້າໄດ້ຮັບການເສື່ອມເສຍໝົດ. ສະນັ້ນ ເຮົາຈຶ່ງຈູດໄຟເຜົາຕົວເມືອງຈົນໄໝ້ໝົດກ້ຽງເປັນຂີ້ເຖົ່າ. ບັດນີ້ ທຸກຄົນທີ່ແນມເບິ່ງເຈົ້າກໍຈະເຫັນເຈົ້າເປັນຂີ້ເຖົ່າໄປ.

19ເຈົ້າໄດ້ຈາກໄປສາແລ້ວ ແລະຈາກໄປເລີຍ ແລະຊົນຊາດທັງໝົດທີ່ໄດ້ຮູ້ຈັກເຈົ້າຕ່າງກໍສະທ້ານຢ້ານກົວໃຫຍ່ ເພາະຢ້ານວ່າພວກຕົນຈະໄດ້ຮັບສ່ວນໃນຊາຕາກຳຂອງເຈົ້າ.”’

20ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າກ່າວວ່າ,

21“ມະນຸດເອີຍ ຈົ່ງປະນາມເມືອງຊີໂດນ.

22ຈົ່ງບອກປະຊາຊົນໃນທີ່ນັ້ນ ເຖິງສິ່ງທີ່ອົງພຣະຜູ້ເປັນເຈົ້າ ພຣະເຈົ້າ ກ່າວກ່ຽວກັບພວກເຂົາວ່າ, ‘ເມືອງຊີໂດນເອີຍ ເຮົາເປັນສັດຕູຂອງເຈົ້າ; ປະຊາຊົນຈະສັນລະເສີນເຮົາ ຍ້ອນສິ່ງທີ່ເຮົາໄດ້ເຮັດຕໍ່ເຈົ້າ. ພວກເຂົາຈະຮູ້ວ່າເຮົາແມ່ນພຣະເຈົ້າຢາເວເມື່ອເຮົາສະແດງໃຫ້ເຫັນວ່າ ເຮົາບໍຣິສຸດສໍ່າໃດໂດຍລົງໂທດຊາວເມືອງຂອງເຈົ້າ.

23ເຮົາຈະສົ່ງການເຈັບໄຂ້ໄດ້ປ່ວຍມາສູ່ເຈົ້າ ແລະເຮັດໃຫ້ເລືອດໄຫລນອງຕາມທ້ອງຖະໜົນຫົນທາງ. ເຈົ້າຈະຖືກໂຈມຕີທຸກດ້ານແລະປະຊາຊົນຈະຖືກຂ້າ. ແລ້ວເຈົ້າກໍຈະຮູ້ວ່າເຮົາແມ່ນພຣະເຈົ້າຢາເວ.

24ບໍ່ມີຊາດໃກ້ຄຽງຊາດໃດທີ່ໄດ້ດູຖູກຊາດອິດສະຣາເອນນັ້ນ ຈະເປັນສ້ຽນໜາມ ເໝືອນໜາມຍອກອົກຂອງຊາດອິດສະຣາເອນອີກຕໍ່ໄປ. ແລ້ວພວກເຂົາຈະຮູ້ວ່າເຮົາແມ່ນອົງພຣະຜູ້ເປັນເຈົ້າ ພຣະເຈົ້າ.’

25ອົງພຣະຜູ້ເປັນເຈົ້າ ພຣະເຈົ້າກ່າວວ່າ, ‘ເຮົາຈະນຳປະຊາຊົນອິດສະຣາເອນ ກັບຄືນມາຈາກຊົນຊາດຕ່າງໆທີ່ພວກເຂົາໄດ້ຖືກກະຈັດກະຈາຍໄປນັ້ນ ແລະຊົນຊາດທັງປວງຈະຮູ້ວ່າເຮົາບໍຣິສຸດ. ປະຊາຊົນອິດສະຣາເອນຈະອາໄສຢູ່ໃນດິນແດນຂອງຕົນເອງ ຄືດິນແດນທີ່ເຮົາໄດ້ມອບໃຫ້ຢາໂຄບ ຜູ້ຮັບໃຊ້ຂອງເຮົາ.

26ພວກເຂົາຈະຢູ່ທີ່ນັ້ນຢ່າງປອດໄພ. ພວກເຂົາຈະປຸກບ້ານເຮືອນແລະເຮັດສວນອະງຸ່ນ. ເຮົາຈະລົງໂທດບັນດາປະເທດໃກ້ຄຽງທີ່ໄດ້ດູຖູກພວກເຂົາ ແລະຊາດອິດສະຣາເອນຈະປອດໄພ. ແລ້ວພວກເຂົາກໍຈະຮູ້ວ່າ ເຮົາແມ່ນພຣະເຈົ້າຢາເວ ພຣະເຈົ້າຂອງພວກເຂົາ.”’

← Chapter 27 Jump to: Chapter 29 →