Ezekiel 14

Lao Bible 2012 (ພຣະຄຳພີສັກສິ)

← Chapter 13 Jump to: Chapter 15 →

1ຕໍ່ມາ ພວກຜູ້ປົກຄອງບາງຄົນຂອງຊາວອິດສະຣາເອນກໍໄດ້ມາປຶກສາກັບຂ້າພະເຈົ້າ ເຖິງຄວາມປະສົງຂອງອົງພຣະຜູ້ເປັນເຈົ້າ.

2ແລ້ວຖ້ອຍຄຳຂອງພຣະເຈົ້າຢາເວກໍໄດ້ມາເຖິງຂ້າພະເຈົ້າວ່າ,

3“ມະນຸດເອີຍ ຄົນເຫຼົ່ານີ້ໄດ້ມອບຈິດໃຈຂອງພວກເຂົາໃຫ້ແກ່ຮູບເຄົາຣົບ ແລະປ່ອຍຮູບເຄົາຣົບໃຫ້ນຳພວກເຂົາໄປສູ່ການກະທຳບາບ. ເຈົ້າຄິດວ່າເຮົາຈະຕອບພວກເຂົາບໍ?

4ບັດນີ້ ຈົ່ງກ່າວແກ່ພວກເຂົາແລະບອກພວກເຂົາວ່າອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້ວ່າ: ຊາວອິດສະຣາເອນທຸກໆຄົນທີ່ໄດ້ມອບຈິດໃຈຂອງຕົນໃຫ້ແກ່ຮູບເຄົາຣົບ ແລະປ່ອຍຮູບເຄົາຣົບໃຫ້ນຳຕົນໄປສູ່ການບາບ ແລ້ວຊໍ້າມາປຶກສາຫາລືນຳຜູ້ທຳນວາຍຜູ້ໜຶ່ງ ພວກເຂົາກໍຈະໄດ້ຮັບຄຳຕອບຈາກເຮົາ ຄືພຣະເຈົ້າຢາເວຈະຕອບຕາມທີ່ບັນດາຮູບເຄົາຣົບຂອງພວກເຂົາຄວນຈະໄດ້ຮັບ

5ຮູບເຄົາຣົບທັງໝົດເຫຼົ່ານັ້ນໄດ້ເຮັດໃຫ້ຊາວອິດສະຣາເອນ ຫັນໜີໄປຈາກເຮົາ; ແຕ່ໂດຍຄຳຕອບຂອງເຮົານີ້ ເຮົາຫວັງວ່າຈະໄດ້ພວກເຂົາກັບຄືນມາສັດຊື່ຕໍ່ເຮົາ.

6ເພາະສະນັ້ນ ‘ຈົ່ງບອກຊາວອິດສະຣາເອນສິ່ງທີ່ອົງພຣະຜູ້ເປັນເຈົ້າ ພຣະເຈົ້າກ່າວຄື: ຈົ່ງກັບຄືນມາສາ ແລະປະຖິ້ມຮູບເຄົາຣົບອັນໜ້າກຽດຊັງຂອງພວກເຈົ້ານັ້ນເຖີດ.

7ເມື່ອຊາວອິດສະຣາເອນ ຫລືຊາວຕ່າງດ້າວຄົນໜຶ່ງຄົນໃດທີ່ອາໄສຢູ່ໃນຊຸມນຸມປະຊາຊົນອິດສະຣາເອນ ຫັນໜີຈາກເຮົາໄປຂາບໄຫວ້ຮູບເຄົາຣົບ; ແລະຕໍ່ມາໄປປຶກສາຫາລືນຳຜູ້ທຳນວາຍຜູ້ໜຶ່ງ ເມື່ອນັ້ນເຮົາຄືພຣະເຈົ້າຢາເວຈະໃຫ້ຄຳຕອບຂອງເຮົາແກ່ພວກເຂົາເອງ.

8ເຮົາຈະຕໍ່ສູ້ພວກເຂົາ. ເຮົາຈະເຮັດໃຫ້ເປັນໝາຍສຳຄັນ ແລະເປັນສຸພາສິດ. ເຮົາຈະຕັດພວກເຂົາອອກຈາກຊຸມນຸມປະຊາຊົນຂອງເຮົາ ເພື່ອພວກເຈົ້າຈະໄດ້ຮູ້ວ່າເຮົາແມ່ນພຣະເຈົ້າຢາເວ.

9ຖ້າຜູ້ທຳນວາຍຜູ້ໜຶ່ງຫລອກລວງຄົນໜຶ່ງຄົນໃດ ໂດຍໃຫ້ຄຳຕອບຢ່າງຜິດພາດວ່າ ເປັນເພາະເຮົາຄືພຣະເຈົ້າຢາເວໄດ້ຫລອກລວງລາວ. ເຮົາຈະຢຽດມືຂອງເຮົາອອກຕໍ່ສູ້ລາວ ແລະເຮົາຈະທຳລາຍລາວອອກຈາກທ່າມກາງປະຊາຊົນອິດສະຣາເອນ.

10ທັງຜູ້ທຳນວາຍ ແລະຜູ້ທີ່ໄປປຶກສາຫາລືນຳລາວນັ້ນ ຈະໄດ້ຮັບໂທດຢ່າງດຽວກັນ.

11ເຮົາຈະເຮັດເຊັ່ນນີ້ເພື່ອປ້ອງກັນບໍ່ໃຫ້ຊາວອິດສະຣາເອນໜີໄປຈາກເຮົາ ແລະເປັນມົນທິນໂດຍການເຮັດບາບຂອງພວກເຂົາ. ພວກເຂົາຕ້ອງເປັນປະຊາຊົນຂອງເຮົາ ແລະເຮົາຈະເປັນພຣະເຈົ້າຂອງພວກເຂົາ.’ ອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້ແຫຼະ.”

12ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າວ່າ,

13“ມະນຸດເອີຍ ຖ້າປະເທດໜຶ່ງເຮັດບາບ ແລະບໍ່ສັດຊື່ຕໍ່ເຮົາ ເຮົາຈະຢຽດມືອອກໄປທຳລາຍສະບຽງອາຫານຂອງປະເທດນັ້ນ. ເຮົາຈະສົ່ງການອຶດຢາກໄປຂ້າມະນຸດຕະຫລອດສັດທັງຫລາຍດ້ວຍ.

14ເຖິງແມ່ນວ່າສາມຄົນນີ້ ຄືໂນອາ, ດາເນນ, ແລະໂຢບອາໄສຢູ່ທີ່ນັ້ນກໍຕາມ; ຄຸນງາມຄວາມດີຂອງພວກເຂົາກໍຊ່ວຍໄດ້ແຕ່ຊີວິດຂອງພວກເຂົາເອງເທົ່ານັ້ນ.” ອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້ແຫຼະ.

15“ຫລືເຮົາອາດສົ່ງສັດປ່າໄປທຳລາຍປະຊາຊົນ ໂດຍກະທຳໃຫ້ດິນແດນເຕັມແຕ່ອັນຕະລາຍ ຈົນບໍ່ມີຜູ້ໃດທ່ອງທ່ຽວໄປມາໄດ້

16ເຖິງແມ່ນວ່າສາມຄົນນີ້ໄດ້ອາໄສຢູ່ທີ່ນັ້ນກໍຕາມ; ແຕ່ເຮົາຄືອົງພຣະຜູ້ເປັນເຈົ້າ ພຣະເຈົ້າ ເຮົາມີຊີວິດຢູ່ຢ່າງແນ່ແທ້ສັນໃດ; ພວກເຂົາກໍບໍ່ສາມາດຊ່ວຍແມ່ນແຕ່ລູກຂອງພວກເຂົາໄດ້ສັນນັ້ນ. ພວກເຂົາສາມາດຊ່ວຍຊີວິດຂອງພວກເຂົາເອງໄດ້ເທົ່ານັ້ນ ແລະດິນແດນກໍຈະກາຍເປັນຖິ່ນແຫ້ງແລ້ງກັນດານ.

17ຫລືເຮົາອາດນຳສົງຄາມມາສູ່ປະເທດນັ້ນ ທັງນຳອາວຸດອັນຮ້າຍແຮງທີ່ສຸດມາທຳລາຍຊີວິດມະນຸດ ຕະຫລອດທັງສັດທັງຫລາຍໃຫ້ພິນາດໄປໝົດ

18ແລະເຖິງແມ່ນວ່າສາມຄົນນີ້ອາໄສຢູ່ໃນທີ່ນັ້ນກໍຕາມ, ອົງພຣະຜູ້ເປັນເຈົ້າ ພຣະເຈົ້າກ່າວວ່າເຮົາມີຊີວິດຢູ່ຢ່າງແນ່ແທ້ສັນໃດ ພວກເຂົາກໍບໍ່ສາມາດຊ່ວຍລູກຂອງພວກເຂົາເອງໄດ້ສັນນັ້ນ; ຊ່ວຍໄດ້ແຕ່ພວກເຂົາເອງເທົ່ານັ້ນ.

19ຖ້າເຮົາສົ່ງໂຣກລະບາດມາສູ່ປະເທດນັ້ນ ແລະດ້ວຍຄວາມໂກດຮ້າຍເຮົາໄດ້ເຮັດໃຫ້ຫລາຍຊີວິດສູນເສຍ ໂດຍຂ້າມະນຸດຕະຫລອດສັດທັງຫລາຍ

20ເຖິງແມ່ນວ່າໂນອາ, ດານີເອນ ແລະໂຢບໄດ້ອາໄສຢູ່ທີ່ນັ້ນກໍຕາມ; ອົງພຣະຜູ້ເປັນເຈົ້າ ພຣະເຈົ້າກ່າວວ່າເຮົາມີຊີວິດຢູ່ຢ່າງແນ່ແທ້ສັນໃດ ພວກເຂົາກໍບໍ່ສາມາດຊ່ວຍແມ່ນແຕ່ຊີວິດລູກຂອງພວກເຂົາເອງໄດ້ສັນນັ້ນ. ຄຸນງາມຄວາມດີຂອງພວກເຂົາຈະຊ່ວຍຊີວິດຂອງພວກເຂົາເອງເທົ່ານັ້ນໄດ້.”

21“ເຫດວ່າອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້: ເຮົາຈະສົ່ງການລົງໂທດອັນຮ້າຍແຮງທີ່ສຸດສີ່ຢ່າງມາສູ່ນະຄອນເຢຣູຊາເລັມເຊັ່ນ: ສົງຄາມ, ການອຶດຢາກ, ເຫຼົ່າສັດປ່າທັງຫລາຍ ແລະການເຈັບໄຂ້ໄດ້ປ່ວຍ ເພື່ອທຳລາຍມະນຸດກັບຝູງສັດທັງຫລາຍ.

22ຖ້າຜູ້ໃດຜູ້ໜຶ່ງລອດຊີວິດແລະຊ່ວຍລູກຂອງຕົນໄດ້ ຈົ່ງເບິ່ງພວກເຂົາໃຫ້ດີໆ ເມື່ອພວກເຂົາມາຫາພວກເຈົ້າ. ຈົ່ງເບິ່ງວ່າພວກເຂົາຊົ່ວຮ້າຍສໍ່າໃດ ແລະຈົ່ງໝັ້ນໃຈວ່າ ການລົງໂທດທີ່ເຮົາກຳລັງນຳມາສູ່ນະຄອນເຢຣູຊາເລັມນັ້ນ ເປັນການຍຸດຕິທຳ;

23ແລ້ວພວກເຈົ້າກໍຈະຮູ້ວ່າ ທຸກສິ່ງທີ່ເຮົາໄດ້ເຮັດນັ້ນມີເຫດຜົນດີທັງໝົດ. ອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້ແຫຼະ.”

← Chapter 13 Jump to: Chapter 15 →