Ezekiel 35

Lao Bible 2012 (ພຣະຄຳພີສັກສິ)

← Chapter 34 Jump to: Chapter 36 →

1ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າກ່າວວ່າ,

2“ມະນຸດເອີຍ ຈົ່ງປະນາມພູເຂົາເອໂດມ ແລະທຳນວາຍຕໍ່ສູ້ມັນ.

3ຈົ່ງບອກປະຊາຊົນສິ່ງທີ່ອົງພຣະຜູ້ເປັນເຈົ້າ ພຣະເຈົ້າກ່າວ: ພູເຂົາຕ່າງໆແຫ່ງເອໂດມເອີຍ ເຮົາເປັນສັດຕູຂອງເຈົ້າ ເຮົາຈະເຮັດໃຫ້ເຈົ້າເປັນດິນແດນເປົ່າປ່ຽວຮົກຮ້າງ.

4ເຮົາຈະປະປ່ອຍໃຫ້ເມືອງຂອງເຈົ້າທັງຫລາຍ ກາຍເປັນດິນແດນທີ່ເພພັງແລະຮ້າງເປົ່າ ແລະດິນແດນຂອງເຈົ້າຈະງຽບເຫງົາເປົ່າປ່ຽວ ແລ້ວເຈົ້າກໍຈະຮູ້ວ່າເຮົາແມ່ນພຣະເຈົ້າຢາເວ.

5ເຈົ້າເປັນສັດຕູສະເໝີມາຂອງຊາດອິດສະຣາເອນ ແລະປ່ອຍໃຫ້ປະຊາຊົນໃນຊາດນັ້ນຖືກຂ້າໃນຄາວເກີດໄພພິບັດ ຄືເວລາທີ່ພວກເຂົາໄດ້ຖືກລົງໂທດຄັ້ງສຸດທ້າຍເພາະການບາບຂອງພວກເຂົາ.

6ເພາະສະນັ້ນ ອົງພຣະຜູ້ເປັນເຈົ້າ ພຣະເຈົ້າກ່າວວ່າ, ເຮົາມີຊີວິດຢູ່ຢ່າງແນ່ແທ້ສັນໃດ; ຄວາມຕາຍແມ່ນຊາຕາກຳທີ່ພວກເຈົ້າປົບໜີໄປບໍ່ໄດ້ສັນນັ້ນ. ພວກເຈົ້າມີຄວາມຜິດ ໃນຖານຂ້າຄົນ ແລະການຄາດຕະກຳກໍຈະຕາມສະໜອງພວກເຈົ້າ.

7ເຮົາຈະເຮັດໃຫ້ເນີນພູຂອງເອໂດມຮ້າງເປົ່າງຽບເຫງົາ ແລະເຮົາຈະຂ້າທຸກຄົນທີ່ທ່ອງທ່ຽວຜ່ານໄປມາທາງນັ້ນ.

8ເຮົາຈະເຮັດໃຫ້ບັນດາພູຕ່າງໆເຕັມໄປດ້ວຍຊາກສົບ ຄືຜູ້ທີ່ຖືກຂ້າໃນສະໜາມຮົບກອງເຕັງກັນເຕັມເນີນພູຕ່າງໆແລະຮ່ອມພູ.

9ເຮົາຈະປະໃຫ້ເຈົ້າເປົ່າປ່ຽວຕະຫລອດໄປ ແລະຈະບໍ່ມີຜູ້ໃດອາໄສຢູ່ໃນເມືອງຕ່າງໆຂອງເຈົ້າອີກ. ແລ້ວພວກເຈົ້າກໍຈະຮູ້ວ່າເຮົາແມ່ນພຣະເຈົ້າຢາເວ.

10ເຈົ້າໄດ້ກ່າວວ່າຢູດາຍແລະອິດສະຣາເອນເປັນຂອງເຈົ້າ ຕະຫລອດທັງດິນແດນຂອງສອງຊົນຊາດນີ້ ແລະຍັງເວົ້າວ່າ ເຈົ້າເປັນກຳມະສິດເໜືອພວກເຂົາ; ເຖິງແມ່ນວ່າເຮົາຄືພຣະເຈົ້າຢາເວ ເປັນພຣະເຈົ້າຂອງພວກເຂົາກໍຕາມ.

11ເພາະສະນັ້ນ ອົງພຣະຜູ້ເປັນເຈົ້າ ພຣະເຈົ້າຈຶ່ງກ່າວວ່າ ເຮົາຊົງພຣະຊົນຢູ່ຢ່າງແນ່ແທ້ສັນໃດ; ເຮົາຈະຕອບຄືນເຈົ້າ ຕໍ່ສິ່ງທີ່ເຈົ້າໄດ້ໂກດຮ້າຍ, ອິດສາບັງບຽດ ແລະກຽດຊັງປະຊາຊົນຂອງເຮົາສັນນັ້ນ. ພວກເຂົາຈະຮູ້ວ່າເຮົາກຳລັງລົງໂທດເຈົ້າ ກໍເພາະສິ່ງທີ່ເຈົ້າໄດ້ເຮັດຕໍ່ພວກເຂົານັ້ນ.

12ແລ້ວເຈົ້າກໍຈະຮູ້ວ່າເຮົາຄືພຣະເຈົ້າຢາເວໄດ້ຍິນເຈົ້າເວົ້າຫຍໍ້ຫຍັນ ໃສ່ພູທັງຫລາຍຂອງຊາດອິດສະຣາເອນວ່າ ມັນຮ້າງເປົ່າທັງຕົກເປັນຂອງເຈົ້າ ເພື່ອໃຫ້ເຈົ້າທຳລາຍຖິ້ມ.

13ເຮົາໄດ້ຍິນຄຳເວົ້າໂອ້ອວດອັນປ່າເຖື່ອນທີ່ເຈົ້າໄດ້ກ່າວຕໍ່ສູ້ເຮົາ.

14ອົງພຣະຜູ້ເປັນເຈົ້າ ພຣະເຈົ້າກ່າວວ່າ ເຮົາຈະເຮັດໃຫ້ເຈົ້າຮ້າງເປົ່າ ຈົນວ່າທົ່ວໂລກຈະຍິນດີໃນການລົ້ມລົງຂອງເຈົ້າ

15ເໝືອນກັນກັບເຈົ້າໄດ້ຍິນດີ ເມື່ອຊາດອິດສະຣາເອນຄືກຳມະສິດຂອງເຮົາໄດ້ຖືກໄພພິບັດ. ພູຂອງເສອີຄືດິນແດນທັງໝົດຂອງເອໂດມຈະຮ້າງເປົ່າ. ແລ້ວພວກເຂົາກໍຈະຮູ້ວ່າເຮົາແມ່ນພຣະເຈົ້າຢາເວ.”

← Chapter 34 Jump to: Chapter 36 →