Ezekiel 21

Lao Bible 2012 (ພຣະຄຳພີສັກສິ)

← Chapter 20 Jump to: Chapter 22 →

1ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າກ່າວວ່າ,

2“ມະນຸດເອີຍ ຈົ່ງປະນາມນະຄອນເຢຣູຊາເລັມ. ຈົ່ງປະນາມສະຖານທີ່ຕ່າງໆທີ່ປະຊາຊົນຂາບໄຫວ້. ຈົ່ງເຕືອນດິນແດນອິດສະຣາເອນວ່າ

3ພຣະເຈົ້າຢາເວກ່າວດັ່ງນີ້: ‘ເຮົາເປັນສັດຕູຂອງພວກເຈົ້າ. ເຮົາຈະຊັກດາບຂອງເຮົາອອກແລະສັງຫານພວກເຈົ້າທຸກຄົນ ບໍ່ວ່າຄົນດີ ຫລືຄົນຊົ່ວໂດຍບໍ່ເລືອກໜ້າ.

4ເຮົາຈະໃຊ້ດາບຂອງເຮົາຕໍ່ສູ້ທຸກຄົນຈາກທິດເໜືອເຖິງທິດໃຕ້.

5ທຸກຄົນຈະໄດ້ຮູ້ວ່າເຮົາຄືພຣະເຈົ້າຢາເວໄດ້ຊັກດາບອອກ ແລະຈະບໍ່ເອົາເຂົ້າຝັກອີກ.’

6ມະນຸດເອີຍ ຈົ່ງຄໍ່າຄວນເໝືອນຄົນທີ່ກຳລັງອົກຫັກດ້ວຍຄວາມສິ້ນຫວັງສາ. ຈົ່ງຄໍ່າຄວນດ້ວຍຄວາມທຸກໃຈໃນບ່ອນທີ່ທຸກຄົນສາມາດເຫັນເຈົ້າໄດ້.

7ເມື່ອພວກເຂົາຖາມເຈົ້າວ່າ, ‘ເປັນຫຍັງເຈົ້າຈຶ່ງຄໍ່າຄວນ?’ ຈົ່ງບອກພວກເຂົາວ່າ, ‘ເນື່ອງຈາກຂ່າວຮ້າຍທີ່ກຳລັງມາ. ເມື່ອມັນມາຮອດ ຈິດໃຈຂອງພວກເຂົາຈະເຕັມໄປດ້ວຍຄວາມຢ້ານກົວ, ມືຂອງພວກເຂົາຈະອ່ອນເພຍລົງ, ຄວາມກ້າຫານຂອງພວກເຂົາຈະໝົດໄປ ແລະຫົວເຂົ່າຂອງພວກເຂົາກໍຈະສັ່ນເຊັນ.’ ເວລາມາຮອດແລ້ວ; ມັນຈະຢູ່ທີ່ນີ້.” ອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້ແຫຼະ.

8ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າກ່າວວ່າ,

9“ມະນຸດເອີຍ ຈົ່ງທຳນວາຍເຖີດ. ຈົ່ງບອກປະຊາຊົນວ່າ ອົງພຣະຜູ້ເປັນເຈົ້າກ່າວດັ່ງນີ້: ມີດາບດວງໜຶ່ງ ມີດາບດວງໜຶ່ງເດີ ຊຶ່ງຖືກຝົນແລ້ວແລະຂັດໃຫ້ເຫລື້ອມດີດ້ວຍ.

10ເປັນດາບທີ່ຝົນແລ້ວເພື່ອເອົາໄວ້ສັງຫານ ເປັນດາບຖືກຂັດໃຫ້ເຫລື້ອມໃສດັ່ງແສງຟ້າແມບ. ໃນທີ່ນັ້ນຈະບໍ່ມີສຽງຊົມຊື່ນຍິນດີຫຍັງເລີຍ ຍ້ອນຄົນບໍ່ໃສ່ໃຈຕໍ່ຄຳເຕືອນແລະການລົງໂທດ.

11ດາບຖືກຂັດໃຫ້ເຫລື້ອມຕຽມລົງມືທຳງານ ຖືກຝົນໃຫ້ຄົມແວວວັບຢູ່ໃນມືນັກສັງຫານແລ້ວ.

12ມະນຸດເອີຍ ເຈົ້າຈົ່ງຮ້ອງຢ່າງເຈັບປວດສາເຖີດ ດາບດວງນີ້ຖືກໝາຍໄວ້ເພື່ອຄົນຂອງເຮົາແລ້ວ ເພື່ອບັນດາຜູ້ນຳຂອງຊາດອິດສະຣາເອນທຸກຄົນ ພວກເຂົາຈະຕ້ອງຖືກສັງຫານໃຫ້ຈົນໝົດສິ້ນ ພ້ອມກັບປະຊາຊົນທຸກຄົນຂອງເຮົາທີ່ເຫຼືອຢູ່ ຈົ່ງຕີອົກເຈົ້າຢ່າງສິ້ນຫວັງສາ

13ເຮົາກຳລັງທົດສອບເບິ່ງປະຊາຊົນຂອງເຮົາ ແລະຖ້າພວກເຂົາບໍ່ກັບໃຈທຸກສິ່ງເຫຼົ່ານີ້ກໍຈະເກີດຂຶ້ນ. ອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້ແຫຼະ.

14ບັດນີ້ ມະນຸດເອີຍ ຈົ່ງທຳນວາຍເຖີດ. ຈົ່ງຕົບມືແລະດາບຈະຟັນແລ້ວຟັນອີກ. ມັນແມ່ນດາບດວງໜຶ່ງທີ່ຂ້າ ຄືດາບດວງໜຶ່ງທີ່ໜ້າຢ້ານກົວຫລາຍ ທັງໃຊ້ສັງຫານໝູ່.

15ມັນເຮັດໃຫ້ປະຊາຊົນຂອງເຮົາສູນເສຍຄວາມກ້າຫານແລະເຕະສະດຸດ. ເຮົາກຳລັງນາບຂູ່ເມືອງຂອງພວກເຂົາດ້ວຍດາບດວງໜຶ່ງ ເຫລື້ອມດັ່ງແສງຟ້າແມບ ແລະຕຽມພ້ອມທີ່ຈະສັງຫານ.

16ດາບດວງຄົມເອີຍ ຈົ່ງຟັນໄປທາງຂວາແລະທາງຊ້າຍ ຟັນທຸກບ່ອນທີ່ເຈົ້າຫັນໄປ.

17ເຮົາຈະຕົບມືຂອງເຮົາຄືກັນແລະຄວາມໂກດຮ້າຍຂອງເຮົາຈະໝົດໄປ. ເຮົາຄືພຣະເຈົ້າຢາເວໄດ້ກ່າວດັ່ງນີ້ແຫຼະ.”

18ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າກ່າວວ່າ,

19“ມະນຸດເອີຍ ຈົ່ງໝາຍຖະໜົນສອງສາຍໄວ້ໃນເສັ້ນທາງທີ່ກະສັດແຫ່ງບາບີໂລນໄດ້ມາດ້ວຍດາບຂອງລາວ. ທາງສອງສາຍນັ້ນໃຫ້ອອກມາຈາກປະເທດດຽວກັນ. ຈົ່ງເຮັດປ້າຍໄວ້ທີ່ທາງແຍກ.

20ທາງສາຍທີໜຶ່ງຊີ້ໃຫ້ກະສັດມາທາງຣັບບາ ເມືອງຂອງຊາວອຳໂມນ; ແລະຖະໜົນສາຍອື່ນອີກໃຫ້ມາທາງດິນແດນຢູດາຍ ຄືມາສູ່ນະຄອນເຢຣູຊາເລັມເມືອງທີ່ມີປ້ອມລ້ອມດ້ວຍກຳແພງ.

21ກະສັດແຫ່ງບາບີໂລນກໍຢືນຢູ່ຂ້າງປ້າຍທີ່ທາງແຍກນັ້ນ. ເພື່ອຢາກຮູ້ວ່າຈະໄປທາງໃດ ເພິ່ນຈຶ່ງສັ່ນລູກສອນ ແລະປຶກສານຳບັນດາຮູບເຄົາຣົບຂອງຕົນ; ເພິ່ນກວດເບິ່ງຕັບຂອງສັດທີ່ຂ້າຖວາຍບູຊາ.

22ແຕ່ແລ້ວມືຂວາຂອງເພິ່ນກໍຈັບຖືກລູກສອນທີ່ໝາຍວ່າ, ‘ເຢຣູຊາເລັມ’ ມັນໄດ້ບອກເພິ່ນໃຫ້ໄປຕັ້ງເຄື່ອງທະລຸກຳແພງ, ໂຮຮ້ອງເຮັດເສິກ, ຕັ້ງເຄື່ອງທະລຸຕໍ່ສູ້ປະຕູເມືອງ, ຄູນຄັນຄູຂຶ້ນ ແລະຂຸດຮ່ອງປ້ອງກັນໄພ.

23ປະຊາຊົນຊາວນະຄອນເຢຣູຊາເລັມບໍ່ເຊື່ອເລື່ອງນີ້ ຍ້ອນພັນທະສັນຍາທີ່ພວກເຂົາໄດ້ເຮັດໄວ້. ແຕ່ການທຳນວາຍນີ້ແມ່ນເພື່ອເຕືອນພວກເຂົາໃຫ້ລະນຶກເຖິງການບາບຂອງພວກເຂົາແລະໃຫ້ຮູ້ວ່າ ພວກເຂົາຈະຖືກຈັບໄປ.

24ເພາະສະນັ້ນ ອົງພຣະຜູ້ເປັນເຈົ້າ ພຣະເຈົ້າຈຶ່ງກ່າວວ່າ ການບາບຂອງພວກເຈົ້າໄດ້ຖືກເປີດເຜີຍແລ້ວ. ຜູ້ໃດກໍຮູ້ວ່າພວກເຈົ້າຜິດສໍ່າໃດ. ການກະທຳຂອງພວກເຈົ້າຊີ້ໃຫ້ເຫັນແຕ່ການບາບທັງສິ້ນ. ພວກເຈົ້າຢູ່ໃນຖານະທີ່ຖືກກ່າວໂທດ ແລະເຮົາຈະມອບພວກເຈົ້າໃຫ້ແກ່ເຫຼົ່າສັດຕູ.

25ເຈົ້າຄົນອະທຳ ຜູ້ປົກຄອງຊາດອິດສະຣາເອນທີ່ຂາດສິນທຳເອີຍ ວັນຂອງເຈົ້າກຳລັງມາຮອດ ຄືວັນແຫ່ງການລົງໂທດຄັ້ງສຸດທ້າຍ.

26ອົງພຣະຜູ້ເປັນເຈົ້າ ພຣະເຈົ້າກ່າວວ່າ ຈົ່ງປົດມົງກຸດແລະຜ້າຄຽນຫົວຂອງເຈົ້າອອກສາ. ບໍ່ມີອັນໃດຈະເປັນໄປຄືເກົ່າອີກແລ້ວ. ຈົ່ງຍົກຄົນທຸກລຳບາກໃຫ້ຂຶ້ນກຳອຳນາດສາ ຈົ່ງປົດພວກທີ່ກຳລັງປົກຄອງລົງ.

27ຈິບຫາຍ ຈິບຫາຍສາແລ້ວ ແມ່ນແລ້ວ ເຮົາຈະເຮັດໃຫ້ເມືອງຈິບຫາຍໝົດ. ແຕ່ເຫດການນີ້ຈະບໍ່ເກີດຂຶ້ນ ຈົນກວ່າຜູ້ໜຶ່ງທີ່ເຮົາໄດ້ເລືອກໄວ້ໃຫ້ລົງໂທດເມືອງນີ້ມາ. ເຮົາຈະມອບເມືອງນີ້ໃຫ້ແກ່ລາວ.”

28“ມະນຸດເອີຍ ຈົ່ງທຳນວຍແລະກ່າວວ່າ ອົງພຣະຜູ້ເປັນເຈົ້າ ພຣະເຈົ້າກຳລັງກ່າວຕໍ່ຊາວອຳໂມນ ຄືພວກທີ່ດູຖູກຊາວອິດສະຣາເອນວ່າ: ‘ດາບດວງໜຶ່ງພ້ອມແລ້ວທີ່ຈະທຳລາຍ ຂັດເຫລື້ອມໃຫ້ສັງຫານເປັນແສງດັ່ງຟ້າແມບ.

29ນິມິດຕ່າງໆທີ່ພວກເຈົ້າໄດ້ເຫັນນັ້ນຈອມປອມ ແລະຄຳທຳນວາຍທີ່ພວກເຈົ້າເວົ້າກໍບໍ່ຈິງ. ພວກເຈົ້າຊົ່ວຊ້າແລະອະທຳ ແລະວັນຂອງພວກເຈົ້າກຳລັງມາ ຄືວັນແຫ່ງການລົງໂທດຄັ້ງສຸດທ້າຍຂອງພວກເຈົ້າ. ດາບກຳລັງຈະຟັນຄໍພວກເຈົ້າຢູ່ແລ້ວ.

30ເອົາດາບຂອງພວກເຈົ້າມ້ຽນສາ ເຮົາຈະຕັດສິນພວກເຈົ້າໃນບ່ອນທີ່ພວກເຈົ້າໄດ້ຖືກສ້າງຂຶ້ນມາ ຄືໃນດິນແດນທີ່ພວກເຈົ້າໄດ້ເກີດມານັ້ນ.

31ພວກເຈົ້າຈະໄດ້ຊີມຣິດແຫ່ງຄວາມໂກດຮ້າຍຂອງເຮົາ ເມື່ອເຮົາໂມໂຫດັ່ງໄຟເຜົາຜານ. ເຮົາຈະມອບພວກເຈົ້າໃຫ້ແກ່ຄົນທີ່ໂຫດຫ້ຽມ ຄືຜູ້ຊ່ຽວຊານໃນການທຳລາຍ.

32ພວກເຈົ້າຈະຖືກທຳລາຍດ້ວຍໄຟ. ເລືອດຈະນອງແຜ່ນດິນແລະຈະບໍ່ມີຜູ້ໃດຈົດຈຳພວກເຈົ້າອີກ. ເຮົາຄືພຣະເຈົ້າຢາເວໄດ້ກ່າວດັ່ງນີ້ແຫຼະ.”’

← Chapter 20 Jump to: Chapter 22 →