Ezekiel 2

Lao Bible 2012 (ພຣະຄຳພີສັກສິ)

← Chapter 1 Jump to: Chapter 3 →

1ພຣະອົງກ່າວຕໍ່ຂ້າພະເຈົ້າວ່າ, “ມະນຸດເອີຍ ຈົ່ງລຸກຂຶ້ນ ເຮົາຕ້ອງການເວົ້າກັບເຈົ້າ.”

2ໃນຂະນະທີ່ສຽງນັ້ນກຳລັງກ່າວຢູ່ ພຣະວິນຍານຂອງພຣະເຈົ້າກໍລົງມາສະຖິດ ແລະຍົກຂ້າພະເຈົ້າຂຶ້ນ ແລະຂ້າພະເຈົ້າກໍໄດ້ຍິນສຽງພຣະອົງກ່າວຕໍ່ໄປວ່າ,

3“ມະນຸດເອີຍ ເຮົາຈະສົ່ງເຈົ້າໄປຫາປະຊາຊົນອິດສະຣາເອນ. ພວກເຂົາກະບົດຕໍ່ສູ້ເຮົາ ແລະຍັງສືບຕໍ່ກະບົດຢູ່ດັ່ງບັນພະບຸລຸດຂອງພວກເຂົາ.

4ພວກເຂົາດື້ດ້ານແລະບໍ່ນັບຖືເຮົາ; ສະນັ້ນ ເຮົາຈະສົ່ງເຈົ້າໄປບອກພວກເຂົາວ່າ, ‘ອົງພຣະຜູ້ເປັນເຈົ້າ ພຣະເຈົ້າກ່າວດັ່ງນີ້.’

5ເຖິງແມ່ນວ່າຄົນກະບົດເຫຼົ່ານັ້ນຈະຟັງເຈົ້າຫລືບໍ່ກໍຕາມ ພວກເຂົາກໍຈະຮູ້ວ່າຍັງມີຜູ້ທຳນວາຍຄົນໜຶ່ງໃນທ່າມກາງພວກເຂົາ.

6ແຕ່ມະນຸດເອີຍ ເຈົ້າບໍ່ຕ້ອງຢ້ານພວກເຂົາ ຫລືຢ້ານສິ່ງທີ່ພວກເຂົາເວົ້ານັ້ນເລີຍ. ພວກເຂົາຈະທ້າທາຍ ແລະດູຖູກຢຽບຫຍາມເຈົ້າ ດັ່ງກັບວ່າເຈົ້າຢູ່ທ່າມກາງແມງງອດ. ເຖິງປານນັ້ນກໍຕາມ ຢ່າສູ່ຢ້ານຄົນກະບົດເຫຼົ່ານັ້ນ ຫລືຢ້ານສິ່ງທີ່ພວກເຂົາເວົ້າເລີຍ.

7ເຖິງແມ່ນວ່າພວກເຂົາຈະຟັງເຈົ້າຫລືບໍ່ກໍຕາມ ເຈົ້າຈະຕ້ອງບອກສິ່ງທີ່ເຮົາບອກເຈົ້າໃຫ້ກ່າວ. ຈົ່ງຈຳໄວ້ວ່າພວກເຂົາກະບົດຕໍ່ສູ້ເຮົາ.

8ມະນຸດເອີຍ ຈົ່ງຟັງສິ່ງທີ່ເຮົາບອກເຈົ້າ. ຢ່າເປັນຄົນກະບົດເໝືອນດັ່ງພວກເຂົາ. ຈົ່ງອ້າປາກ ແລະກິນສິ່ງທີ່ເຮົາຈະໃຫ້ເຈົ້າ.”

9ແລ້ວຂ້າພະເຈົ້າກໍເຫັນມືເບື້ອງໜຶ່ງ ຖືໜັງສືມ້ວນເດ່ອອກມາທາງຂ້າພະເຈົ້າ.

10ມືນັ້ນພືໜັງສືມ້ວນອອກ ແລະຂ້າພະເຈົ້າກໍໄດ້ເຫັນຄຳຂຽນໄວ້ທັງສອງໜ້າ ເປັນບົດຮ້ອງໄຫ້ອາໄລອາວອນ ແລະຄໍ່າຄວນ.

← Chapter 1 Jump to: Chapter 3 →