Ezekiel 41

Malagasy (Baiboly Protestanta Malagasy 2011)

← Chapter 40 Jump to: Chapter 42 →

1Ary noentiny ho ao amin’ny tempoly aho. Norefesiny ny andry ka enina hakiho ny sakany tamin’ny lafiny iray ary enina hakiho ny sakany tamin’ny lafiny iray; sakan’ny tranolay izany.

2Ny sakan’ny varavarana dia folo hakiho; ny andaniny sy ny ankilany amin’ny varavarana dia dimy hakiho avy; ary norefesiny ny lavany ka efapolo hakiho ary ny sakany dia roapolo hakiho.

3Dia nandroso ho ao anatiny indrindra izy. Norefesiny ny andry teo amin’ny varavarana: Roa hakiho, ary ny varavarana dia enina hakiho, ary ny sakan’ny varavarana dia fito hakiho.

4Norefesiny ny lavany: Roapolo hakiho, ary ny sakany dia roapolo hakiho teo anoloan’ny ati-trano lehibe; dia hoy izy tamiko: Io ny fitoerana masina indrindra.

5Ary norefesiny ny rindrin’ny Trano ka ny hatevin’ny rindrin’ny Trano dia enina hakiho ary ny sakan’ny paosin-trano dia efatra hakiho.

6Ireo paosin-trano ireo dia milahatra ho rihana telo izay miverina intelopolo; ary nitsatoka tamin’ny rindrina izay ho an’ny paosin-trano manodidina izy, fa tsy nitsatoka amin’ny rindrin’ny Trano.

7Ny sakan’ireo paosin-trano ireo dia nihamalalaka isaky ny rihana, fa niampy isaky ny rihana izany ka nihamalalaka araka ny fisandratany; ary ny tombon’ny ambony amin’ny antenantenany dia tahaka ny tombon’ny antenantenany amin’ny ambany.

8Dia hitako fa nisy tokotany nasandratra manodidina ny Trano ho fanorenana ny paosin-trano, ary ny fanorenan’ny paosin-trano dia iray volotara fandrefesana, enina hakiho hatramin’ny fifanohizany.

9Ny hatevin’ny rindrina ivelany amin’ny paosin-trano dia dimy hakiho; ny sisa navela manelanelana ny paosin-trano

10sy ny efitrano dia roapolo hakiho manodidina ny trano manontolo.

11Ary ny varavaran’ny paosin-trano dia mankao amin’ilay sisa navela, dia varavarana iray manatrika ny avaratra, ary iray koa manatrika ny atsimo; ny sakan’ilay sisa navela dia dimy hakiho manodidina.

12Ny vatan-trano izay teo anoloan’ilay kianja voafaritra teo amin’ny lafiny andrefana dia fitopolo hakiho ny sakany, ary ny rindrin’ny trano dia dimy hakiho ny hatevin’ny manodidina ary sivifolo hakiho ny lavany.

13Dia nandrefy ny Trano izy ka zato hakiho ny lavany, ary ilay kianja voatokana sy ny vatan-trano ary ny rindrina dia zato hakiho ny lavany.

14Ary ny sakan’ny Trano eo anoloany sy ilay kianja voafaritra teo atsinanana dia zato hakiho.

15Dia norefesiny ny lavan’ny Trano teo anoloan’ny kianja izay tao ivohony, ary ny lalantsarany teo an-daniny roa, ka zato hakiho. Ny tempoly ao anaty, ny lalantsara ao amin’ny kianja,

16ny tokonana, ny varavarankely makarakara tsy mivoha ary ny rihana telo miantoana manodidina izay manandrify ny tokonana dia nopetahana hazo fisaka manodidina, hatramin’ny tany ka hatramin’ny varavarankely koa, ary nihidy ny varavarankely.

17Teo ambonin’ny varavarana, na amin’ny trano ao anatiny, na ny eny ivelany, mbamin’ny rindrina manodidina, na ny ao anatiny na ny eny ivelany dia namelàna toerana

18hasiana sarin’ny kerobima sy ny hazo palma, koa ny sarin’ny hazo palma dia teo anelanelan’ny kerobima, ary ny kerobima dia samy nanana tarehy roa avy

19ka tarehin’olona no nanatrika ny hazo palma teo an-daniny, ary tarehin-diona tanora kosa no nanatrika ny hazo palma teo an-kilany; ny manodidina ny Trano dia natao tahaka izany avokoa.

20Hatreo amin’ny tany ka hatrany ambonin’ny varavarana no nasiana sarin’ny kerobima sy ny hazo palma, teo amin’ny rindrin’ny tempoly.

21Efamira ny tolanam-baravaran’ny tempoly, ary ny manoloana ny fitoerana masina dia nitovy endrika tamin’izany koa.

22Ny alitara dia hazo ka telo hakiho ny haavony ary roa hakiho ny lavany; nisy zorony koa ka ny lavany sy ny sisiny dia hazo. Ary hoy izy tamiko: Io no latabatra izay eo anatrehan’NY TOMPO.

23Ary ny tempoly sy ny fitoerana masina dia nisy lelam-baravarana roa.

24Ireo lelam-baravarana ireo dia samy kopa-droa avy, lelam-baravarana roa amin’ny iray, ary lelam-baravarana roa koa amin’ny iray.

25Nisy sarin’ny kerobima sy ny hazo palma natao teo amin’ny varavaran’ny tempoly, tahaka izay natao teo amin’ny rindrina ihany; nisy tatao hazo teo anoloan’ny lalantsara fidirana, teo ivelany.

26Ary nisy varavarankely makarakara tsy mivoha sy sarin’ny hazo palma teo an-daniny roa, dia teo anilan’ny lalantsara fidirana sy teo amin’ireo paosin-trano momba ny Trano ary teo amin’ny tatao.

← Chapter 40 Jump to: Chapter 42 →