Ezekiel 45

Malagasy (Baiboly Protestanta Malagasy 2011)

← Chapter 44 Jump to: Chapter 46 →

1Rehefa zarainareo araka ny antsapaka ny tany ho lova dia hisy hatokanareo ho fanomezana ho an’NY TOMPO, dia anjara masina eo amin’ny tany; ny lavany dia dimy arivo sy roa alina ary ny sakany dia iray alina. Ho masina any amin’ny faritaniny rehetra manodidina izany.

2Io dia hanalana efamira ho an’ny fitoerana masina, dimanjato ny lavany ary dimanjato koa ny sakany; ary ho dimampolo hakiho ny tany malalaka manodidina azy.

3Eny, ao amin’izany tany voarefy izany, izay dimy arivo sy roa alina ny lavany ary iray alina ny sakany izany, dia handrefesanao faritra ho an’ny fitoerana masina, dia ny masina indrindra.

4Ho faritra masina amin’ny tany izany ka ho an’ny mpisorona, mpanao fanompoana ao amin’ny fitoerana masina, dia izay manakaiky hanao fanompoana ho an’NY TOMPO, ary ho faritra ho an’ny tranony sy ho tany masina hasiana ny fitoerana masina.

5Ity faritra ity, izay dimy arivo sy roa alina ny lavany ary iray alina ny sakany, no ho an’ny levita mpanao fanompoana ao amin’ny Trano; zaratany ho azy izany, misy efitrano roapolo.

6Homenareo koa ny zaratany ho an’ny tanàna, dimy arivo ny sakany ary dimy arivo sy roa alina ny lavany, mifanolotra amin’ny anjara masina voatokana; ho an’ny taranak’Israely rehetra izany.

7Ary ny mpanjaka dia homenareo tany eo an-daniny roa amin’ny anjara masina voatokana sy amin’ny zaratany ho an’ny tanàna, dia ny mifanolotra amin’ny anjara masina voatokana sy ny mifanolotra amin’ny zaratany ho an’ny tanàna, hatreo amin’ny andrefana mikipaka miankandrefana, ary hatreo amin’ny atsinanana mikipaka miantsinanana; ny lavany dia mitovy amin’ny lavan’ny zaratany ho an’ny firenena iray, hatrany andrefana ka hatrany atsinanana.

8Ho taniny izany, dia anjara ho azy ao amin’ny Israely; ireo mpanjakako dia tsy hampahory ny oloko intsony fa hahafoy ny tany ho an’ny taranak’Israely isam-pokony avy.

9Izao no lazain’NY TOMPO Andriamanitra: Aoka izay, ry mpanjakan’ny Israely! Ajanòny ny halozana sy ny fampahoriana ary manaova fitsarana sy fahamarinana. Atsaharo ny fandroahanareo ny oloko, hoy NY TOMPO Andriamanitra.

10Mizana marina sy efaha marina ary bata marina no aoka hotananareo.

11Hitovy habe ny efaha sy ny bata, ary ny bata dia hahalany ny ampahafolon’ny homera, ary ny efaha koa dia ampahafolon’ny homera. Ny homera no handrefesana azy.

12Ny sekela dia roapolo gera; sekela roapolo miampy sekela dimy amby roapolo ary sekela dimy amby folo ny mane eo aminareo.

13Izao no zavatra haloanareo: Ny ampahenin’ny efaha isaky ny homeran’ny varimbazaha iray; haloanareo koa ny ampahenin’ny efaha isaky ny homeran’ny varimbazaha iray hafa.

14Ny didy ny amin’ny diloilo, dia ny diloilo iray bata: Ampahafolon’ny bata isaky ny kora; fa ny homera dia misy bata folo satria bata folo no homera iray.

15Ary ondry iray amin’ny roanjato amin’ny tanin’ny Israely izay azon-drano no haloanareo hatao fanatitra hohanina sy fanatitra dorana manontolo ary fanati-pihavanana, mba hanaovana fanavotana ho an’ny vahoaka, hoy NY TOMPO Andriamanitra.

16Ny vahoaka rehetra no handoa izany ho an’ny mpanjakan’ny Israely.

17Fa ny mpanjaka kosa no hiantoka ny fanatitra dorana manontolo, ny fanatitra avy amin’ny zavamaniry, ny fanatitra aidina amin’ny andro firavoravoana sy ny voaloham-bolana ary ny Sabata, dia amin’ny fotoam-pivavahana rehetra tandreman’ny taranak’Israely; eny, izy no hiantoka ny fanatitra ho fanadiovana, ny fanatitra avy amin’ny zavamaniry, ny fanatitra dorana manontolo ary ny fanati-pihavanana, mba hanaovana fanavotana ho an’ny taranak’Israely.

18Izao no lazain’NY TOMPO Andriamanitra: Amin’ny andro voalohany amin’ny volana voalohany dia haka vantotra ombilahy tsy misy kilema ianao ka hanadio ny fitoerana masina.

19Ary hanalan’ny mpisorona ny ran’ny fanatitra ho fanadiovana ka hatentiny amin’ny tolanan’ny Trano sy amin’ny zorony efatra amin’ny lafin’ny alitara ary amin’ny tolanan’ny vavahadin’ny kianja anatiny.

20Toy izany koa no hataonao amin’ny andro fahafito amin’ny volana ho an’ny olona manota tsy nahy, na noho izy kely saina, koa izany no hanadiovanareo ny Trano.

21Amin’ny andro fahefatra amby folo amin’ny volana voalohany no hanaovanareo ny Paska. Andro firavoravoana hafitoana izany, koa mofo tsy misy masirasira no hohanina.

22Amin’izany andro izany ny mpanjaka dia hanatitra vantotra ombilahy iray hatao fanatitra noho ny ota ho an’ny tenany sy ny vahoaka rehetra.

23Amin’ny andro firavoravoana hafitoana dia hanolotra fanatitra dorana manontolo isanandro mandritra ny hafitoana ho an’NY TOMPO izy, dia vantotra ombilahy fito sy ondrilahy fito tsy misy kilema, ary osilahy iray isanandro hataony fanatitra noho ny ota.

24Ary hanolotra ny fanatitra avy amin’ny zavamaniry koa izy, dia iray efaha isam-bantotra ombilahy sy iray efaha isan’ondrilahy, ary diloilo eran’ny hina isan’efaha.

25Amin’ny andro fahadimy amby folo amin’ny volana fahafito, amin’ny andro firavoravoana, dia hanolotra tahaka izany koa hafitoana izy, na ny fanatitra noho ny ota na ny fanatitra dorana manontolo na ny fanatitra avy amin’ny zavamaniry, na ny diloilo.

← Chapter 44 Jump to: Chapter 46 →