Jeremiah 1

Ilonggo (Maayong Balita nga Biblia (2012))

Jump to: Chapter 2 →

1Ini nga libro nagasugid nahanungod sang ginsiling ni Jeremias nga anak ni Helkias nga isa sang mga pari sang banwa sang Anatot sa kadutaan ni Benjamin.

2Ang Ginoo naghambal kay Jeremias sang ika-13 nga tuig nga si Josias, anak ni Haring Amon, amo ang hari sang Juda,

3kag naghambal sia liwat sa iya sang si Joaquim, anak ni Josias, amo ang hari. Sa tapos sini, ang Ginoo naghambal sa iya sing madamo nga beses, tubtob nga ang mga tawo sang Jerusalem ginbihag sa ikalima nga bulan sang ika-11 nga tuig nga si Sedequias, anak ni Josias, amo ang hari.

4Ang Ginoo nagsiling sa akon,

5“Sa wala ko pa ikaw mahatagi sing kabuhi ginpili ko na ikaw, kag sa wala pa ikaw matawo, ginpain ko na ikaw nga manginpropeta sang mga kapungsoran.”

6Nagsabat ako, “O Ginoo nga Gamhanan, pamatan-on pa ako kag indi ako makahibalo maghambal.”

7Pero ang Ginoo nagsiling sa akon, “Indi ka magsiling nga pamatan-on pa ikaw, kundi kadto ka sa mga tawo sa diin ipadala ko ikaw, kag isugid sa ila ang tanan nga ginsugo ko nga imo ihambal.

8Indi ka magkahadlok sa ila, kay manginkaupod nimo ako sa pag-apin sa imo. Ako, ang Ginoo, naghambal sini!”

9Dayon gin-untay sang Ginoo ang iya kamot, gintandog ang akon mga bibig, kag nagsiling sa akon, “Pamati, ginahatag ko sa imo ang mga pulong nga imo dapat ihambal.

10Karon nga adlaw, ginahatag ko sa imo ang gahom sa mga kapungsoran kag mga ginharian, sa paggabot kag sa pagtumba, sa pagguba kag sa pagpukan, sa pagpatindog kag sa pagtanom.”

11Ang Ginoo nagpamangkot sa akon, “Jeremias, ano ang nakita mo?” Nagsabat ako, “Isa ka sanga sang kahoy nga almendro.”

12Ang Ginoo nagsiling, “Husto ikaw kag ginabantayan ko nga manginmatuod ang akon ginasiling.”

13Dayon ang Ginoo naghambal liwat sa akon, kag nagpamangkot, “Ano pa ang nakita mo?” Nagsabat ako, “Nakita ko sa aminhan ang isa ka kolon nga nagaindakal, kag daw maula ini pakadto diri.”

14Nagsiling sia sa akon, “Ang kalaglagan magaindakal halin sa aminhan sa tanan nga nagaestar sa sini nga duta,

15tungod kay ginatawag ko ang tanan nga mga kapungsoran sa aminhan sa pagpalapit. Ang ila mga hari magapaabot kag magapahamtang sang ila mga trono sa mga pwerta sang Jerusalem kag sa palibot sang mga pader sini, kag subong man sa palibot sang iban nga mga siudad sang Juda.

16Silutan ko ang akon mga tawo tungod kay nagpakasala sila, nagbiya sila sa akon, nagdulot sing mga halad sa iban nga mga dios, kag naghimo sang mga diosdios kag ginsimba nila ini.

17Maghanda ka! Lakat ka, kag isugid sa ila ang tanan nga akon ginsugo sa imo nga isiling. Karon, indi ka magkahadlok sa ila, kay kon indi ka magtuman sa akon, pahadlukon ko pa gid ikaw kon yara ka kaupod nila.

18Pamati ka, Jeremias! Ang tagsatagsa nga nagaestar sa sini nga duta—ang mga hari sang Juda, ang mga opisyales, ang mga pari, kag ang mga tawo—magapamatok sa imo. Pero karon nga adlaw, ihatag ko sa imo ang ikasarang sa pagbato sa ila. Manginkaangay ikaw sang isa ka siudad nga napamakuran sing maayo, sang isa ka haligi nga salsalon, kag sang isa ka pader nga bronsi. Indi sila makadaog sa imo, kay manginkaupod nimo ako sa pag-apin sa imo. Ako, ang Ginoo, naghambal sini.”

Jump to: Chapter 2 →