Jeremiah 40

Ilonggo (Maayong Balita nga Biblia (2012))

← Chapter 39 Jump to: Chapter 41 →

1Ang Ginoo naghambal sa akon, sa tapos mabuy-an ako ni Nebusaradan, ang pangulo nga opisyal, didto sa Rama. Gindala ako didto nga nakadenahan, upod sa tanan nga mga tawo gikan sa Jerusalem kag Juda nga gindala subong mga binilanggo sa Babilonia.

2Ginkuha ako sing pahain sang pangulo nga opisyal kag ginsilingan, “Ang Ginoo nga imo Dios nagsiling nga laglagon niya ini nga duta,

3kag karon nahimo na niya ang iya ginsiling nga himuon. Ini tanan natabo tungod kay ang imo mga tawo nagpakasala batok sa Ginoo kag wala nila sia gintuman.

4Karon kuhaon ko ang mga kadena sa imo mga kamot kag hilwayon ko ikaw. Kon luyag ka mag-upod sa akon sa Babilonia, sarang ka makaupod, kay tatapon ko ikaw. Pero kon indi ka luyag, sarang ikaw makapabilin. Sarang ikaw makapili bisan diin nga bahin sang pungsod. Sarang ikaw makakadto sa bisan diin nga luyag mo kadtuan.”

5Sang wala ako magsabat, si Nebusaradan nagsiling, “Balik ka kay Gedalias, anak ni Ahikam kag apo ni Safan, nga ginhimo sang hari sang Babilonia nga gobernador sang mga kabanwahanan sang Juda. Sarang ikaw makaestar upod sa iya kag magkabuhi upod sa mga tawo, ukon sarang ikaw makakadto sa bisan diin nga luyag mo.” Dayon ginhatagan niya ako sing isa ka regalo kag sing kalan-on nga akon madala kag iya ako ginpalakat.

6Naglakat ako kag nag-estar upod kay Gedalias sa Mispa kag nagkabuhi upod sa mga tawo nga nabilin sa duta.

7Ang iban nga mga opisyales kag mga soldado sang Juda wala mag-ampo. Nakabati sila nga ang hari sang Babilonia naghimo kay Gedalias nga gobernador sang duta kag sia ang gintugyanan sang tanan nga wala madala sa Babilonia subong mga binilanggo. Ini nga mga tawo amo ang pinakaimol sa duta.

8Gani si Ismael nga anak ni Netanias, si Johanan nga anak ni Karea, si Seraya nga anak ni Tanhumet, ang mga anak nga lalaki ni Epay nga taga-Netofa, kag si Jesanias nga Maacanhon nagkadto kay Gedalias sa Mispa upod sa ila mga tinawo.

9Si Gedalias nagsiling sa ila, “Ginasumpa ko sa inyo nga indi na kamo dapat magkahadlok sa pag-ampo sa mga taga-Babilonia. Mag-estar kamo sa sini nga duta, alagara ninyo ang hari sang Babilonia, kag ang tanan manginmaayo para sa inyo.

10Ako gid magapabilin sa Mispa kag magapangatubang para sa inyo kon mag-abot ang mga taga-Babilonia. Pero sarang kamo makatipon kag makatago sing bino, bunga sang kahoy, kag lana sang olivo, kag makaestar sa mga barangay nga inyo gin-agaw.”

11Sa pihak nga bahin, ang tanan nga mga Israelinhon nga yara sa Moab, sa Amon, sa Edom, kag sa iban nga mga kapungsoran nakabati nga ang hari sang Babilonia nagtugot sa pila ka mga Israelinhon sa pagpabilin sa Juda, kag ginhimo niya si Gedalias nga ila gobernador.

12Gani naghalin sila sa mga lugar sa diin sila nag-alaplaag, kag nagbalik sila sa Juda. Nagkadto sila kay Gedalias sa Mispa, kag didto nagtipon sila sing madamo nga bino kag mga prutas.

13Sa tapos sini, si Johanan, kag ang mga pangulo sang mga soldado nga wala mag-ampo, nagkadto kay Gedalias sa Mispa

14kag nagsiling sa iya, “Wala ka bala makahibalo nga si Haring Balis sang Amon nagpadala kay Ismael, anak ni Netanias, sa pagpatay sa imo?” Pero indi magpati si Gedalias.

15Dayon si Johanan nagsiling sing tago sa iya, “Ako lang ang malakat sa pagpatay kay Ismael, kag wala sing may makahibalo kon sin-o ang naghimo sini. Ngaa bala pabay-an sia sa pagpatay sa imo? Ina magapaalaplaag sang tanan nga mga Judio nga nagabuylog sa imo, kag magadala ini sing kalaglagan sa tanan nga mga tawo nga nabilin sa Juda.”

16Pero si Gedalias nagsabat, “Indi ina paghimua! Ang ginasiling mo nahanungod kay Ismael indi matuod!”

← Chapter 39 Jump to: Chapter 41 →