Jeremiah 46

Ilonggo (Maayong Balita nga Biblia (2012))

← Chapter 45 Jump to: Chapter 47 →

1Ang Ginoo naghambal sa akon nahanungod sa mga kapungsoran.

2Amo ini ang iya ginsiling nahanungod sa Ehipto. Naghambal sia nahanungod sa hangaway ni Haring Neco sang Ehipto, nga ginlutos ni Haring Nabucodonosor sang Babilonia sa Carquemis malapit sa Suba sang Eufrates, sa ikap-at nga tuig nga si Joaquim anak ni Josias, amo ang hari sang Juda:

3“Ang Ehiptohanon nga mga opisyales nagasinggit, ‘Amana ang inyo mga taming, kag lakat kamo sa pag-away!

4Amana ang inyo mga kabayo, kag sakyi ini! Linya kamo, kag isuksok ang inyo mga helmet! Baira ang inyo mga bangkaw! Isuklob ang inyo mga panaming!’”

5Nagapamangkot ang Ginoo, “Pero ano ang akon makita? Nagabalalik sila sa kakugmat. Ang ila mga soldado nagkalalutos. Tungod sang kahadlok, nagdalagan sila sing madasig, nga wala bulobalikid.

6Ang mga nagadalagan sing madasig indi makaluwas, ang mga soldado indi makapalagyo. Sa aminhan, sa higad sang Eufrates, nagakasandad sila kag nagakapukan.

7Sin-o ini nga nagataas kaangay sang Nilo, kaangay sang isa ka suba nga nagapamangpang ang iya tubig?

8Ini amo ang Ehipto, nga nagataas kaangay sang Nilo, kaangay sang isa ka suba nga nagapamangpang ang iya tubig. Ang Ehipto nagsiling, ‘Magataas ako kag tabunan ko ang kalibutan, laglagon ko ang mga siudad kag ang mga tawo nga nagaestar didto.

9Palakta ang mga kabayo, kag patuwaka ang mga karwahi sa inaway! Pagwaa ang mga soldado, ang mga tawo gikan sa Etiopia kag Libya, nga nagadala sing mga taming, ang matanda nga mga manugpana gikan sa Lidya.’”

10Amo ini ang adlaw sang Ginoong Dios sang mga hangaway: karon nga adlaw magatimalos sia, karon nga adlaw silutan niya ang iya mga kaaway. Ang iya mga espada magakaon sa ila tubtob mabusog ini, kag magainom sang ila dugo tubtob maayawan ini. Karon nga adlaw ang Ginoong Dios sang mga hangaway nagahalad sang iya mga biktima, sa aminhan, sa higad sang Eufrates.

11Mga tawo sang Ehipto, kadto kamo sa Galaad, kag mangita kamo sing bulong! Ang tanan ninyo nga mga bulong nanginwalay pulos, wala gid sing may makaayo sa inyo.

12Ang mga kapungsoran nakabati sang inyo kahuloy-an, ang tanan nakabati sang inyo pagsinggit. Ang isa ka soldado nakabunggo sa isa, kag sila nga duha natumba.

13Ang Ginoo naghambal sa akon sang ginsalakay ni Haring Nabucodonosor sang Babilonia ang Ehipto. Nagsiling sia,

14“Isugid ini sa mga kabanwahanan sang Ehipto, sa Migdol, Memfis kag Tapanes: ‘Maghanda kamo sa pag-apin sang inyo kaugalingon, ang tanan nga inyo ginapanag-iyahan pagalaglagon sa inaway!

15Ngaa bala nga ang inyo gamhanan nga dios nga si Apis napukan? Ang Ginoo nagtumba sa iya!’

16Ang inyo mga soldado nakasandad kag napukan, ang tagsatagsa nagasiling sa isa, ‘Dali! Mapauli kita sa aton mga tawo, kag malagyo sa espada sang kaaway!’

17“Hatagi ang hari sang Ehipto sing bag-o nga ngalan, ‘Palawakal nga Nagapaligad sang Iya Kahigayunan.’

18Ako, ang Ginoo sang mga hangaway, amo ang hari. Ako amo ang Dios nga buhi. Subong nga ang Bukid sang Tabor nagalabaw sa mga kabukiran, kag ang Bukid sang Carmel mas mataas sang sa dagat, subong man ang kusog sang nagasalakay sa inyo.

19Maghanda kamo nga manginbinilanggo, kamo nga mga tawo sang Ehipto! Ang Memfis mangin-isa ka desierto, isa ka kalaglagan nga wala sing may nagaestar.

20Ang Ehipto kaangay sang isa ka matambok nga baka, nga ginkutot sang langaw halin sa aminhan.

21Bisan ang iya binayaran nga mga soldado wala sing mahimo subong sang tinday nga mga baka. Wala sila magtindog kag mag-away, tanan sila nagbalik kag nagdalagan, kay ang adlaw sang ila katapusan nag-abot, ang tion sang ila kalaglagan.

22Ang Ehipto nagapalagyo nga nagasagirit kaangay sang man-og, samtang nagapalapit ang mga hangaway sang kaaway. Ginasalakay nila ini nga may mga wasay, kaangay sang mga tawo nga nagapanapas sang mga kahoy.

23Pagalaglagon nila ang iya madabong nga kagulangan. Ang ila mga soldado tama kadamo nga indi maisip, mas madamo pa sang sa mga apan.

24Ang mga tawo sang Ehipto nahuy-an, gindaog sila sang mga tawo gikan sa naaminhan. Ako, ang Ginoo, naghambal sini.”

25Ang Ginoo sang mga hangaway, ang Dios sang Israel, nagasiling, “Silutan ko si Amon, ang dios sang Tebes, lakip ang Ehipto, kag ang iya sini mga dios kag mga hari. Kuhaon ko ang hari sang Ehipto kag ang tanan nga nagasalig sa iya,

26kag itugyan ko sila sa mga luyag magpatay sa ila, kay Haring Nabucodonosor sang Babilonia kag sa iya mga hangaway. Pero sa ulihi ang mga tawo magaestar liwat sa Ehipto, subong sang ila ginhimo sang una nga mga panahon. Ako, ang Ginoo, naghambal sini.”

27“Mga tawo ko, indi kamo magkahadlok, mga tawo sang Israel, indi kamo magkakugmat. Luwason ko kamo gikan sa malayo nga duta, gikan sa duta sa diin mga binilanggo kamo. Magapauli kamo, kag magakabuhi sa paghidait, indi kamo maano, kag wala sing may mapahadlok sa inyo.

28Magakadto ako sa inyo, kag magaluwas sa inyo. Laglagon ko ang tanan nga mga kapungsoran sa diin ginpaalaplaag ko kamo, pero indi ko kamo paglaglagon. Silutan ko kamo, pero kon ako magsilot sa inyo, wala ako sing may pinasulabi. Ako, ang Ginoo, naghambal sini.”

← Chapter 45 Jump to: Chapter 47 →