Jeremiah 28

Ilonggo (Maayong Balita nga Biblia (2012))

← Chapter 27 Jump to: Chapter 29 →

1Sa amo man nga tuig, sa ikalima nga bulan sang ikap-at nga tuig nga si Sedequias amo ang hari sang Juda, ang anak ni Azur nga si Hananias nga propeta gikan sa banwa sang Gabaon, naghambal sa akon sa Templo. Ginsingganan niya ako sa atubang sang mga pari kag sang mga tawo,

2nga ang Ginoo sang mga hangaway, ang Dios sang Israel nagsiling: “Gintapos ko ang paggahom sang hari sang Babilonia.

3Sa sulod sang duha ka tuig ibalik ko sa sini nga lugar ang tanan nga mga manggad nga ginkuha ni Haring Nabucodonosor sa Templo, kag gindala pakadto sa Babilonia.

4Pabalikon ko man ang hari sang Juda nga si Joaquin, anak ni Joaquim, upod ang tanan nga mga tawo sang Juda nga ginbihag pa Babilonia. Huo, kuhaan ko sing gahom ang hari sang Babilonia. Ako, ang Ginoo, naghambal sini.”

5Dayon sa atubang sang mga pari kag sa tanan nga mga tawo nga nagatindog sa Templo, nagsiling ako kay Hananias:

6“Kabay pa! Nagalaom ako nga ang Ginoo magahimo sini! Nagalaom gid ako nga ang Ginoo magahimo nga manginmatuod ang tanan nga imo gintagna, kag gikan sa Babilonia ipabalik niya ang tanan nga mga manggad sang Templo kag ang tanan nga mga tawo nga ginbihag subong mga binilanggo.

7Pero pamatii ang akon ginasiling sa imo kag sa mga tawo.

8Sang wala pa ako kag kamo matawo, ang mga propeta nga naghambal sang una nagpanagna nga magaabot ang inaway, gutom kag balatian sa madamo nga mga kapungsoran kag sa gamhanan nga mga ginharian.

9Pero ang propeta nga nagapanagna sang paghidait sarang lamang makilala subong isa ka propeta nga ginpadala gid sang Ginoo kon ang iya mga pulong manginmatuod.”

10Dayon ginkuha ni Hananias ang gota sa akon liog kag iya ini ginbali,

11kag nagsiling sa atubang sang tanan nga mga tawo: “Ang Ginoo nagsiling nga sa sini nga paagi pagabalion niya ang gota nga gintakod ni Haring Nabucodonosor sa liog sang tanan nga mga kapungsoran. Himuon niya ini sa sulod sang duha ka tuig.” Dayon naglakat ako.

12Sa tapos sini ang Ginoo nagsiling sa akon

13sa pagkadto kag sa pagsiling kay Hananias: “Ako ang Ginoo nagsiling nga ayhan mabali mo ang gota nga kahoy, pero ako magailis sini sing gota nga salsalon.

14Ang Ginoo sang mga hangaway, ang Dios sang Israel, nagsiling nga iya butangan sing gota nga salsalon ini tanan nga mga kapungsoran, kag sila magaalagad kay Haring Nabucodonosor sang Babilonia. Ang Ginoo nagsiling pa gani nga paalagaron niya kay Nabucodonosor ang mga sapat sa talon.”

15Dayon ginsingganan ko si Hananias sadto kag ginsingganan pa gid sini, “Pamati ka, Hananias! Ang Ginoo wala magpadala sa imo, kag ginapapati mo ini nga mga tawo sa isa ka butig.

16Gani, ang Ginoo gid nagasiling nga iya ikaw dulaon. Sa wala pa matapos ini nga tuig, mapatay ikaw, tungod kay ginsingganan mo ang mga tawo nga magbato sa Ginoo.”

17Si Hananias nga propeta napatay sa ikapito nga bulan sadto nga tuig.

← Chapter 27 Jump to: Chapter 29 →