Jeremiah 48

Ilonggo (Maayong Balita nga Biblia (2012))

← Chapter 47 Jump to: Chapter 49 →

1Amo ini ang ginsiling sang Ginoo sang mga hangaway nahanungod sa Moab: “Kaluoyi man ang mga tawo sang Nebo, ang ila banwa nalaglag! Ang Kiryataim naagaw, ang iya sini malig-on nga pamakod narumpag, kag ang iya mga tawo nahuy-an,

2ang katahom sang Moab wala na. Ang kaaway nag-agaw sang Hesbon, kag nagplano sa paglaglag sang pungsod sang Moab. Ang banwa sang Madmena pagapahipuson, ang mga hangaway magasalakay batok sini.

3Ang mga tawo sang Horonaim nagasinggit, ‘Palugos! Kalaglagan!’

4“Ang Moab nalaglag, pamatii ninyo ang mga kabataan nga nagahinibi.

5Pamatii ang gahod sang ila pagnguyngoy sa dalan pataklad sa Luhit, ang mga paghinibi sang kalisod, sa dalanon padulhog sa Horonaim.

6Nagasiling sila, ‘Palagyo, luwasa ang inyo kabuhi! Dalagan kamo kaangay sang isa ka asno nga talunon sa desierto!’

7“O Moab, nagsalig ka sa imo kusog kag manggad, pero karon, bisan ikaw pagaagawan, kag si Kemos nga imo dios pagabihagon, upod ang iya mga prinsipe kag mga pari.

8Wala sing banwa nga indi malaglag, ang kapatagan kag ang wayang manginyara sa kalaglagan. Ako, ang Ginoo, naghambal sini.

9Himoi sing isa ka lapida ang Moab, sa indi madugay pagalaglagon ini. Ang iya sini mga kabanwahanan malaglag, kag wala sing isa nga magaestar didto liwat.”

10Pakamalauton ang tawo nga wala nagahimo sang bulohaton sang Ginoo sa bug-os niya nga tagipusoon! Pakamalauton ang tawo nga wala nagapatay paagi sa iya espada!

11Ang Ginoo nagsiling, “Ang Moab nagkabuhi sa gihapon nga malig-on kag wala pa gid mabihag. Ang Moab kaangay sang bino nga ginpalugdang kag wala ginhuwad halin sa isa ka tadyaw pakadto sa isa. Ang iya sini lalim wala maglain, kag ang iya sini sabor maayo man gihapon.

12“Gani karon, magaabot ang tion nga magapadala ako sing mga tawo nga magabubo sang Moab kaangay sang bino. Pagaulaon nila ang bino nga unod sang mga tadyaw kag pamuongon ini.

13Dayon ang mga Moabnon mapaslawan sa ila dios nga si Kemos, subong sang mga Israelinhon nga napaslawan kay Betel, isa ka dios nga ila ginsaligan.

14“Mga tawo sang Moab, ngaa bala nagapakabaganihan kamo, mga maisog nga soldado nga natilawan sa inaway?

15Ang Moab kag ang iya sini mga siudad nalaglag, ang iya pinili nga mga pamatan-on nga lalaki ginpamatay. Ako amo ang Hari, ang Ginoo sang mga hangaway, kag ako naghambal sini.

16Ang katapusan sang Moab nagahilapit, ang iya sini kalaglagan manug-abot na.

17“Maglalaw kamo tungod sina nga pungsod, kamo nga nagaestar malapit sa iya, tanan kamo nga nakahibalo sang iya kabantugan. Magsiling kamo, ‘Ang iya gamhanan nga paggahom natapos, ang iya dungog kag kusog wala na.’

18Kamo nga nagaestar sa Dibon, panaog kamo gikan sa inyo trono kag magpungko sa duta nga yab-ukon. Yari na ang manuglaglag sang Moab, kag naglaglag sang iya sini mga pamakod.

19Kamo nga nagaestar sa Aroer, tindog kamo sa higad sang dalan kag maghulat, pamangkuta ninyo ang bisan sin-o nga nagapalagyo, hibalua sa ila kon ano ang natabo.

20Magasabat sila, ‘Ang Moab napukan, maghibi kamo tungod sa iya, kay nahuy-an sia. Ipahibalo ninyo sa Suba sang Arnon nga ang Moab nalaglag!’

21“Ang paghukom nag-abot sa mga siudad sang kapatagan: sa Holon, sa Jaza, sa Mefaat,

22sa Dibon, sa Nebo, sa Bet-diblataim,

23sa Kiryataim, sa Betgamul, sa Betmeon,

24sa Keryot, kag sa Bozra. Ang paghukom nag-abot sa tanan nga mga siudad sang Moab, sa malayo kag sa malapit.

25Ang Moab ginkuhaan sing kusog, kag ang iya gahom ginlaglag. Ako, ang Ginoo, naghambal sini.”

26Ang Ginoo nagsiling, “Huboga ang Moab, tungod kay nagbato ini sa akon. Ang Moab magaligid sa iya kaugalingon nga suka, kag ang mga tawo magakadlaw sa iya.

27O Moab, dumdoma kon daw ano ang pagyaguta mo sa mga tawo sang Israel? Ginkabig mo sila nga daw sa nadakpan upod sa isa ka guban sang mga makawat.

28“Kamo nga mga tawo nga nagaestar sa Moab, bayai ninyo ang inyo mga banwa! Lakat kamo kag mag-estar sa mga pil-as! Manginkaangay kamo sang alimokon nga nagahimo sang iya pugad sa mga bibi sang pulopil-as.

29Bugalon kaayo ang Moab! Nabatian ko kon daw ano ka bugalon, hambog kag matinaastaason ang mga tawo, kon daw ano ang hunahuna nila sa ila kaugalingon.

30Ako, ang Ginoo, nakahibalo sang ila pagpahambog. Wala sing pulos ang ila mga pagpabugal, kag ang mga butang nga ila ginahimo indi magpadayon.

31Gani, magahibi ako para sa bug-os nga Moab kag para sa mga tawo sang Kir-heres.

32Magahibi ako para sa mga tawo sang Sibma, labi pa sang sa mga tawo sang Jazer. O Siudad sang Sibma, kaangay ikaw sang isa ka balagon sang ubas nga nagatabok sa Patay nga Dagat, kag nagalambot tubtob sa Jazer. Pero karon ang imo mga patubas sa tingadlaw kag mga ubas ginlaglag.

33Ang kalipay kag kasadya ginkuha sa mapatubason nga duta sang Moab. Ginpauntat ko ang pag-ilig sang bino sa mga pulogaan. Wala na sing bisan isa nga nagahimo sing bino kag nagasinggit sa kalipay.

34“Ang mga tawo sang Hesbon kag Eleale nagasinggit, kag ang ila singgit sarang mabatian tubtob sa Jahaz. Mabatian ini sang mga tawo sa Zoar, kag mabatian tubtob sa Horonaim kag sa Eglat-selisiya. Bisan pa ang Sapa sang Nimrim nagmala.

35Pauntaton ko ang mga tawo sang Moab sa pagdulot sang mga halad nga sinunog sa mataas nga lugar kag sa pagdulot sang mga halad sa ila mga dios. Ako, ang Ginoo, naghambal sini.

36“Gani ang akon tagipusoon nagapangalisod tungod sa Moab kag tungod sa mga tawo sang Kir-heres, kaangay sang isa ka tawo nga nagatukar sang kalantahon para sa patay sa isa ka plawta, tungod kay wala na ang tanan nila nga mga pagkabutang.

37Ang tagsatagsa nagpakalbo sang iya ulo kag nagpamarbas. Tanan sila nagpilas sang ila mga kamot, kag ang tagsatagsa nagabayo sing sako.

38Sa tanan nga mga atop sang balay sa Moab kag sa mga plasa, ang mga tawo nagalalaw, kay ginbuong ko ang Moab kaangay sang isa ka tadyaw nga wala maluyagi sang bisan sin-o.

39Ang Moab nabuka! Magsinggit kamo! Ang Moab nahuy-an. Nalaglag ini, kag ang tanan nga mga kapungsoran sa palibot nagayaguta sa iya. Ako, ang Ginoo, naghambal sini.”

40Ang Ginoo nagsaad nga ang isa ka pungsod magadagit sang Moab kaangay sang isa ka agila nga nagahumlad sang iya mga pakpak.

41Ang mga kabanwahanan kag ang mga pamakod pagaagawon. Sa sadto nga adlaw ang mga soldado sang Moab magakahadlok subong sang isa ka babayi nga manugbata nga ginasakitan.

42Ang Moab pagalaglagon kag indi na mangin-isa ka pungsod, tungod kay nagbato sia sa akon.

43Ang kakugmat, ang mga tugalbong, kag ang mga tiglapak nagahulat sa mga tawo sang Moab. Ang Ginoo naghambal sini.

44Ang bisan sin-o nga nagatinguha sa pagpalagyo sa kakugmat mahulog sa mga tugalbong, kag ang bisan sin-o nga nagasaka pa gwa sa tugalbong madakpan sa tiglapak, tungod kay gintalana sang Ginoo ang tion sang paglaglag sang Moab.

45Ang makaluluoy nga mga nakapalagyo nagatinguha sa pagpangita sing palanaguan sa siudad sang Hesbon pero ini nga siudad nga gingamhan anay ni Haring Sihon nagadabadaba sa kalayo. Ang kalayo nagsunog sang mga pamakod sa dulonan kag sang mataas nga mga bukid sang mga tawo sang Moab nga maluyagon sa inaway.

46Kaluoyi man ang mga tawo sang Moab! Ang mga tawo nga nagsimba kay Kemos nalaglag, kag ang ila mga anak nga lalaki kag babayi ginbihag subong mga binilanggo.

47Pero sa palaabuton nga mga inadlaw pauswagon liwat sang Ginoo ang Moab. Tanan ini nga ginsiling sang Ginoo mahanabo sa Moab.

← Chapter 47 Jump to: Chapter 49 →