Jeremiah 35

Ilonggo (Maayong Balita nga Biblia (2012))

← Chapter 34 Jump to: Chapter 36 →

1Sang si Joaquim, anak nga lalaki ni Josias, amo ang hari sang Juda, ang Ginoo nagsiling sa akon,

2“Kadto ka sa kabarangayan sang mga Recabnon kag magpakighambal sa ila. Dayon dalha sila sa sulod sang isa sang mga kwarto sang Templo kag paimna sila sang bino.”

3Gani gindala ko ang bug-os nga kabarangayan sang mga Recabnon—si Hasanias nga anak sang isa pa gid ka Jeremias nga anak ni Habasinias kag ang tanan niya nga mga utod nga lalaki kag mga anak nga lalaki—

4kag gindala sila sa Templo. Gindala ko sila sa kwarto sang mga sumolunod sang propeta nga si Hanan nga anak ni Igdalias nga alagad sang Dios. Ini nga kwarto yara sa ibabaw sang kwarto ni Maseya nga anak ni Salum, isa ka mataas nga opisyal sa Templo kag malapit sa mga kwarto sang iban nga mga opisyales.

5Dayon ginbutang ko ang mga kupa kag mga pitsil nga puno sing bino sa atubang sang mga Recabnon, kag ginsingganan ko sila, “Inom kamo sing bino.”

6Pero nagsabat sila, “Wala kami nagainom sang bino. Ang isa sang amon mga katigulangan nga si Jonadab nga anak ni Recab nagsugo sa amon nga kami kag ang amon mga kaliwat indi gid mag-inom sing bino.

7Nagsugo man sia sa amon nga indi kami magpatindog sing mga balay ukon magpanguma, kag indi kami magtanom sing ubas ukon magbakal sini. Nagsugo sia sa amon sa pag-estar sa mga tolda sa bug-os namon nga pagkabuhi, agod makapabilin kami sa sini nga duta sa diin nagaestar kami subong mga dumoluong.

8Gintuman namon ang tanan nga mga gintudlo ni Jonadab sa amon. Wala gid kami mag-inom sing bino, subong man ang amon mga asawa, mga anak nga lalaki kag babayi.

9Wala kami nagapatindog sing mga balay agod estaran. Nagaestar kami sa mga tolda—kag wala kami sing talamnan sing ubas, kaumhan, ukon mga patubas. Gintuman gid namon ang tanan nga ginsugo sang isa sang amon mga katigulangan nga si Jonadab.

11Pero sang pagsalakay ni Haring Nabucodonosor sini nga pungsod, nagpamat-od kami sa pagkadto sa Jerusalem agod makapalagyo kami sa mga hangaway sang mga taga-Babilonia kag mga taga-Siria. Amo ina ang kabangdanan nga nagaestar kami sa Jerusalem.”

12Dayon ang Ginoo sang mga hangaway, ang Dios sang Israel, nagsugo sa akon sa pagkadto kag sa pagsiling sa mga tawo sang Juda kag Jerusalem, “Ako, ang Ginoo, nagapamangkot sa inyo kon ngaa indi kamo magpamati sa akon kag magtuman sang akon mga ginatudlo?

14Ang mga kaliwat ni Jonadab nagtuman sang iya mga sugo nga indi mag-inom sing bino, kag tubtob karon nga adlaw wala sing bisan isa sa ila nga nagainom sini. Pero ako nagpadayon sa paghambal sa inyo, kag wala kamo magtuman sa akon.

15Nagpadayon ako sa pagpadala sa inyo sang tanan ko nga mga alagad nga mga propeta, kag ginsingganan nila kamo sa pagbiya sang inyo malaut nga mga pagginawi kag sa paghimo sing matarong. Ginpaandaman nila kamo nga indi magsimba kag mag-alagad sa iban nga mga dios, agod nga makapadayon kamo sa pag-estar sa duta nga akon ginhatag sa inyo kag sa inyo mga katigulangan. Pero indi kamo magpamati ukon magsapak sa akon.

16Ang mga Recabnon nagtuman sang sugo nga ginhatag sa ila sang isa sang ila mga katigulangan nga si Jonadab, pero kamo inyo wala magtuman sa akon.

17Gani, ako, ang Ginoo sang mga hangaway, ang Dios sang Israel, magapadala sa inyo nga mga tawo sang Juda kag Jerusalem sang tanan nga kalaglagan nga akon ginsaad. Himuon ko ini tungod kay wala kamo magpamati sa akon ginhambal sa inyo, kag wala kamo magsabat sang pagtawag ko sa inyo.”

18Dayon ginsingganan ko ang kabarangayan sang mga Recabnon nga ang Ginoo sang mga hangaway, ang Dios sang Israel, nagsiling, “Gintuman ninyo ang sugo nga ginhatag sang isa sang inyo mga katigulangan nga si Jonadab, ginsunod ninyo ang iya mga gintudlo, kag ginhimo ninyo ang tanan nga iya ginsugo sa inyo.

19Gani, ako, ang Ginoo sang mga hangaway, ang Dios sang Israel, nagasaad nga si Jonadab nga anak ni Recab sa gihapon may kaliwat nga lalaki sa pag-alagad sa akon.”

← Chapter 34 Jump to: Chapter 36 →